IMAMAT 27 - KITAB NU TUMPU ALLA LELE MA'IMAI'

Atulan nu anu osombahkon hi Tumpu

¹ Tumpu nombee'mo hi Musa,

² atulan haha aiya da ogunakon hi bansa Israel. De samian osombahkonmo hi Tumpu bau pontobus anu i niatnyomo samata-mata obee' hi Tumpu, mian aijo' timbalimo otobus nu doi konjoo'nyo,

^3-7 angga'nyo sumo anu biasa opake i Kemah nu Tumpu: – anu molabimo 60 na taun: mo'ane 15 na doi salaka boune 10 na doi salaka – 20-60 na taun: mo'ane 50 na doi salaka boune 30 na doi salaka – 5-20 na taun: mo'ane 20 na doi salaka boune 10 na doi salaka – i aluknyo nu 5 na taun: mo'ane 5 na doi salaka boune 3 na doi salaka

⁸ De mian anu binalaniatmo talalo kasiasi ka' susa' na mombayan olinyo anu tinantukanmo, ia tionyo ahi' momboa mian anu sinombahkonmo hi Tumpu aijo' mamba hi imam. Imam tionyo ahi' montantukan olinyo anu lebe dengke ka' anu nupoko ala nu mian aijo'.

^9-10 De anu i niatnyomo aijo' binatang anu timbali okaan ka' timbali otalima salaku bau palasombahan hi Tumpu, mian anu binalaniatmo aijo' madi' timbali mombolosi nu binatang sangga'at, kalana iwi-iwi' na anu osombahkon hi Tumpu anumo nu Tumpu. De ia sabole-bole mombolosi, ohu-ohua' na binatang aijo' timbalimo anu nu Tumpu.

¹¹ Panyo de anu i niatnyomo aijo' binatang anu madi' timbali okaan ka' anu madi' timbali o ala salaku bau palasombahan hi Tumpu, mian anu binalaniatmo aijo' tionyo ahi' momboa binatang aijo' hi imam.

¹² Imam na montantukan olinyo otoa i ka'ada'an nu binatang aijo'. Ka' olinyo anu tinantukanmo aijo' olinyo anu madi'mo timbali obabali'i.

¹³ De mian aijo' ka'oho' montobus binatangnyo, ia tionyo ahi' mombayan olinyo ka' otuangi mule' uampulu' na palasen.

¹⁴ De ko mian monsombahkon laigannyo hi Tumpu, imam na montantukan olinyo otoa i ka'ada'an nu laigan aijo'. Olinyo anu tinantukanmo aijo', olinyo anu madi'mo timbali obabali'i.

¹⁵ De mian aijo' kahanda' montobus laigannyo ia tionyo ahi' mombayan olinyo ka' montuangi mule' uampulu' na palasen.

¹⁶ De ko mian monsombahkon sambahagian na tano'nyo hi Tumpu, olinyo tionyo ahi' otantukan sumo konjoo'nyo nu bibit anu opalalui bau ponsu'ani tano'nyo aijo'. Toto uampulu' na kilogram na gandum olinyo sampulu' na doi salaka.

¹⁷ De tano' aijo' sinombahkonmo salatanmo pe'e Taun Monsule'akonmo, olinyo tionyo ahi' osaimbaya-bayanmo.

¹⁸ De tano' aijo' sinombahkon noko lapasmo na Taun Monsule'akon, imam tionyo ahi' montantukan olinyo anu madi' timbali osamaya' ka' otoa i konjoo'nyo nu taun anu daagi' sampe toka i Taun Monsule'akonmo aiya mae i ahop, lantas montantukanmo olinyo anu lebe dengke.

¹⁹ De mian anu nonsombahkon ale'nyo aijo' kahanda'mo montobus, ia tionyo ahi' mombayan olinyo, ka' montuangi mule' uampulu' na palasen.

²⁰ De ia mompobaluk ale'nyo aijo' panyo madi' montobus pe'e hi Tumpu, ia madi'mo daagi' ko hak montobus ale'nyo aijo'.

²¹ I Taun Monsule'akonmo aiya mae i ahop ale' aijo' anumo nu Tumpu sampe toka sidu-sidutu'; ka' obee'mo hi to ima-imam.

²² De samian monsombahkon hi Tumpu sa'angu' na ale' anu ingolinyomo,

²³ imam tionyo ahi' montantukan olinyo sumo konjoo'nyo nu taun anu daagi' sampe toka i Taun Monsule'akonmo anu aiya mae i ahop. Lantas mian aijo' tionyo ahi' mombayan olinyo i sinaamo ai-aijo', doi aijo' anumo nu Tumpu.

²⁴ I Taun Monsule'akonmo, ale' aijo' tionyo ahi' osule'akonmo hi tumpunyo momona kabai hi lee'nyo.

²⁵ Iwi-iwi' na olinyo tionyo ahi' otantukan sumo angga'nyo anu biasa opake i Kemah nu Tumpu.

²⁶ Binatang anu momona pino anak anu nu Tumpu, jadi madi' timbali osombahkon bau koloban kasanangan nu kinyonyoa. Anak nu sapi', anak nu domba kabai anak nu mee' anu momona pino anak anu nu Tumpu.

²⁷ Panyo binatang anu madi' timbali okaan anu momona pino anak timbali otobus sumo angga'nyo anu biasa opake i Kemah nu Tumpu ka' otuangi mule' uampulu' na palasen. De madi'mo otobus, binatang aijo' timbalimo opobaluk hi mian sangga'at sumo angga'nyo anu biasa opake i Kemah nu Tumpu.

²⁸ Madi' ko samian pe'e na timbali mompobaluk kabai montobus apaa na anu samata-mata obee'mo hi Tumpu, pa' aijo' manusia, binatang kabai tano'. Aijo' anumo nu Tumpu sampe toka sidu-sidutu'.

²⁹ Maumo manusia anu samata-mata obee'mo hi Tumpu da osilakaimo madi' timbali otobus ia tionyo ahi' opateimo.

³⁰ Sampulu' na bagian na hasinnyo nu ale', sambagian na o ala pa' aijo' gandum kabai to bua-bua' nu kau', aijo' na obee' hi Tumpu.

³¹ De ko mian mongka'oho' montobus sambagian na hasinnyo aijo' ia tionyo ahi' mombayan olinyo anu tinantukanmo otuangi mule' uampulu' na palasen.

³² Toto sampulu' na potuu'on o ala sa'angu' na potuu'on aijo' na obee' hi Tumpu. De potuu'on aijo' obilang toto sa'angu', saba' potuu'on anu ko sampulu'nyomo aijo' na obee' hi Tumpu.

³³ Tumpunyo nu potuu'on aijo' madi' timbali mompile'i iya na anu ma'ima', ka' pa' iya na anu ma'idek. Ia mule' madi' timbali montolosi. De ia sabole-bole ahi' montolosi saba' ohu-ohua' na potuu'on aijo' timbalimo anu nu Tumpu ka madi'mo timbali otobus.

³⁴ Aijo'mo na to pale-palentah anu binee'mo nu Tumpu aita' i Bungkutnyo nu Sinai hi Musa da ogunakon hi bansa Israel.