IMAMAT 21 - KITAB NU TUMPU ALLA LELE MA'IMAI'

Kasusi'an nu to ima-imam

¹ Tumpu nompokaumo i Musa da mompotokakon palentah aiya hi to ima-imam lee' i Harun, “Samian na imam madi' timbali mohumimi'i butongnyo kalana mambamo mongatuhi pongkubulan sangalunyo

² ola anu timbali de tinanyo na silaka, tuumanyo, anaknyo, utusnyo mo'ane,

³ kabai utusnyo boune anu ma'isa no'osoa anu jojoong salaigan tiba ia.

⁴ Ia madi' timbali mohumimi'i butongnyo kalana mongatuhimo pongkubulan julu nu bengkele'nyo.

⁵ Samian na imam madi' timbali mongkis sambagian na ubaknyo ka' madi' timbali monggunting jangkutnyo kabai momboyo-boyot butongnyo nu balang anu matajom bau pompotoa saba' ia hau-haunyo susa' kalana ko anumo sinilaka.

⁶ Ia samata-matamo anung-Ku ka' mombau anu Ku palentahkon ka' madi'mo timbali mombusiki sanggong-Ku. Ia monsombahkon koloban kaanon hi beleng-Ku, jadi ia tionyo ahi' susi'.

⁷ Samian na imam madi' timbali mo'osoa tiba samian na langkoyang anu lewa'mo nasala' kabai samian na boune anu toho'mo no'osoa kabai anu noga'atmo kalana imam aijo' anung-Ku'mo.

⁸ Bansa Israel tionyo ahi' mongakui Imam salakumo mian anu samata-matamo mokalaja hi beleng-Ku kalana ia monsombahkonmo koloban kaanon hi beleng-Ku. Akumo na Tumpu; Aku aiya susi' ka' Aku aiya momposusi' mian anu pinalesayamo hi beleng-Ku.

⁹ De ko anak boune nu iamam masala'mo, ia mongambangimo tuumanyo ka' tionyo opapui sampe mate.

¹⁰ Imam Daka' binalakatanmo, ia dinudu'anmo nu lanya' anu bau pombalakati i ubaknyo ka' nompopusokmo baju' nu imam daka' hi ia. Kalana aijo' ia madi'mo timbali mompojohok ubaknyo tapuhakak kabai mombeakmo baju'nyo salaku tanda sinusa'mo kalana ko anumo sinilaka.

^11-12 Ia nonsombahkonmo hi beleng-Ku anu baumo baging-Ku jadi madi'mo timbali mohumimi'i butongnyo. Ia mule madi'mo timbali mohumimi'i Kemah-Ku, kalana mosabat ikiijo', lantas minsoopmo i laigan anu ko mian sinilakamo, mau mule' aijo' anu sinilaka tuumanyo kabai posi tinanyo.

^13-14 Ia ola timbali mo'osoa tiba samian anu ma'isa toho' no'osoa i posi bansanyo. Ia madi' timbali mo'osoa tiba samian na balu kabai samian na boune anu gina'atakonmo, kabai samian na boune anu toho'mo lewa' nasala'.

¹⁵ De ia molanggaimo atulan aijo', saba' to ana-anaknyo anu sabenanyo ahi' susi' timbalimo mahumimi'. Akumo na Tumpu ka' Aku nompile'imo ia da samata-mata bau Imam Daka'.”

¹⁶ Tumpu nompokaumo i Musa,

¹⁷ da mompoto'i aiya hi Harun, “Samian na lee' nu beleyum anu madi' mahoson na butongnyo madi' timbali monsombahkon koloban kaanon hi beleng-Ku. Aijo' saja' obau sampe toka sidu-sidutu'.

¹⁸ Mian anu monsombahkon koloban madi' timbali de madi' mahoson na butongnyo, atina'mo mian mapisok kabai mian anu kapi', mian anu madi' talakana' na ohupnyo kabai bahagian nu butongnyo sangga'at madi' talakana',

¹⁹ anu kapi' na limanyo kabai mian pengko' na tengkenyo,

²⁰ anu tadungkung kabai anu kodo' hondo anu ko panyakitnyo na matanyo, kabai kumahuton ka' anu okabili'.

²¹ Batu-batu lee' i Imam Harun anu madi' mahoson na butongnyo madi' timbali monsombahkon koloban kaanon hi beleng-Ku.

²² Panyo ia timbali mongkaan kaanon anu sinombahkonmo maumo koloban kaanon anu sinombahkonmo maumo koloban kaanon anu susi' mau pe'e koloban kaanon anu susi' hondo.

²³ Kalana mian aijo' madi' mahoson na butongnyo ia madi' timbali mongohani lalanse' anu pinongoloti Salipi' anu Susi' kabai mezbah. Ia madi' timbali mohumimi'i to bala-balang anu opake samata-mata hi beleng-Ku, kalana Akumo na Tumpu, ka' Akumo na nontantukan balang haha aijo' samata-mata opake bau kapalaluan-Ku.”

²⁴ Aijo'mo na to atu-atulan anu pinotokakonmo i Musa hi Harun ka' mule' hi to ana-anaknyo, ka' hi iwi-iwi' aha bansa Israel.