IMAMAT 20 - KITAB NU TUMPU ALLA LELE MA'IMAI'

Hukuman kona hi mian anu madi' tulu-tulutan

¹ Tumpu nompokaumo i Musa

² da mompoto'i han aiya hi aha bansa Israel, “Toto samian anu atina' hi belemiu kabai mian anu lengkat mae i salipu'an anu jojoongmo tataap atina' hi belemiu, anu mongkolobanakon anaknyo hi Molokh, tionyo ahi' opahambunu'akon nu batu, nu mian da'isan sampe mate.

³ Mian anu mongkolobanakon anaknyo hi Molokh, mohumimi'imo Kemah-Ku ka' mongambangimo sanggong-Ku anu susi'. Ia Ku hukumo ka' madi'mo daagi' Ku posoop mian anu pinalesayamo hi beleng-Ku.

⁴ De mian da'isan mompojohokmo palabuatan nu mian aijo' ka' madi'mo mombee'i hukuman mate hi ia,

⁵ saba' posi Akumo na mohukum ia, ka' aha salaigan, ka' iwi-iwi' na mian anu mosangalumo tiba ia nompala'imo Aku ka' nompalesayamo Molokh. Aha madi'mo Ku posoop mian anu pinalesayamo hi beleng-Ku.

⁶ Mian anu mamba momoita pikilan hi sando anu mompaha sumbu' tiba to santu-santuu' nu mian anu sinilakamo Ku hukumo ka' madi'mo Ku posoop mian anu pinalesayamo hi beleng-Ku.

⁷ O inau' da belemiu tataap susi', kalana Akumo na Tumpu Allah nu belemiu.

⁸ Otuluti na atulan-Ku haha aiya, kalana Akumo na Tumpu anu nolagamo belemiu da samata-mata mombau anu Ku palentahkon.”

⁹ Tumpu nombee'mo atulan haha aiya, “Mian anu montotobi'akon tuumanyo ka' tinanyo tionyo ahi' o hukum mate. Ia mate kalana posi kasala'annyo.

¹⁰ De samian na aha Israel masala' tiba bengkele' nu mian anu bubuu' bansa nu aha, ia ka' boune aijo' tionyo ahi' o hukum mate.

¹¹ Samian na mo'ane anu moduhusmo tiba sala' samian bengkele' nu tuumanyo, monggagoimo hak nu tuumanyo. Mo'ane ka' boune aijo' tionyo ahi' o hukum mate. Aha mate, kalana posi kasala'an nu aha.

¹² De samian na mo'ane moduhusmo tiba boune bengkele' nu anaknyo, ua-ua'aha aijo' tionyo ahi' o hukum mate. Aha nasala'mo, ka' i natemo kalana posi kasala'an nu aha.

¹³ De ko mo'ane moduhusmo tiba sangko mo'anenyo sangga'at aha nombaumo palabuatan anu ma'idek ka' moko ambang, ka' ua-ua'aha tionyo o hukum mate. Aha nate kalana posi kasala'an nu aha.

¹⁴ De ko samian na mo'ane mo'osoa tiba samian na boune, ka' nu osoaimo suele na tina nu boune aijo', aha toto-totolu' tionyo ahi' opapui sampe mate, kalana aha nombaumo palabuatan anu madi' talakana'. Palabuatan anu sumo aitu madi' timbali obau miu.

¹⁵ De ko samian na mo'ane masala'mo tiba binatang, mian ka' binatang aijo' tionyo ahi' opatei.

¹⁶ De ko samian na boune masala'mo tiba binatang, boune ka' binatang aijo' tionyo ahi' opatei. Aha mate kalana posi kasala'an nu aha.

¹⁷ De ko samian na mo'ane moduhusmo tiba utusnyo boune kabai tiba utusnyo anu sa'a-sa'angu' na tuuma panyo madi' sa'a-sa'angu' na tina, kabai sa'a-sa'angu' na tina panyo madi' sa'a-sa'angu' na tuuma, aha madi'mo daagi' oposoop mian anu pinalesayamo hi Beleng-Ku. Aha nombaumo palabuatan anu madi' talakana', ka' tionyo ahi' mohumpak hukuman.

¹⁸ De ko samian na mo'ane moduhusmo tiba samian na boune anu hau-haunyo tinokamo na adat nu boune, aha madi'mo timbali oposoop mian anu pinalesayamo hi beleng-Ku.

¹⁹ De ko samian na mo'ane moduhusmo tiba dada'nyo, ua-ua'aha tionyo ahi' mohumpak hukuman, kalana nombaumo kasala'an aijo'.

²⁰ De ko samian na mo'ane moduhusmo tiba bengkele' nu babo'nyo, ia mongambangimo babo'nyo. Mo'ane ka' boune aijo' tionyo ahi' mohumpak hukumannyo. Sampe mate aha madi' mohumpak anak.

²¹ De ko samian na mo'ane mongaggoi bengkele' nu utusnyo, ia mongambangimo utusnyo, ka' nombaumo palabuatan anu madi' talakana'. Sampe mate aha madi' mohumpak anak.”

²² Tumpu notatae, “Otuluti iwi-iwi' na atulan ka' palentah-ngKu, da belemiu madi' o laa' mompala'i lipu' nu Kana'an, ka' maumo pa' iyaya mae na pomboan-Ku belemiu.

²³ Boli montiho adat nu bansa anu jojoong ikiijo' mae. Kinindotnyomo na Aku nu kalakuan nu aha anu toto ide-idek. Aijo' na sababnyo aha i laa'-Kumo da belemiu timbali minsoop i lipu' aijo'.

²⁴ Tano' anu kaya ka' ma'omuk aijo' jinanji'-Kumo hi belemiu, jadi Ku bee'mo hi belemiu da timbalimo anu nu belemiu. Akumo na Tumpu Allah nu belemiu anu madi'mo nompogalum tiba to bansa-bansa sangga'at.

²⁵ Mokonyo aijo' belemiu tionyo ahi' monsumbu' totu-totu'u binatang anu timbali okaan tiba anu madi' timbali okaan. Boli mongkaan binatang anu madi' timbali okaan. Binatang aijo' tinaloakon-Kumo madi' timbali okaan, jadi de okaan nu belemiu, belemiu timbalimo mahumimi'.

²⁶ Belemiu madi'mo Ku pogalum tiba bansa-bansa sangga'at da belemiu timbalimo anung-Ku. Belemiu tionyo ahi' susi' kalana Aku na Tumpu ka' mule' Aku susi'.

²⁷ Toto samian na mo'ane kabai boune anu montunde' santuu' nu mian anu sinilakamo opahambunu'akon nu batu sampe mate. Mian aijo' nate kalana posi kasala'annyo.”