IMAMAT 17 - KITAB NU TUMPU ALLA LELE MA'IMAI'

Atulan mongkona baso' nu binatang

¹ Tumpu nompokaumo i Musa

² da mombee' atulan haha aiya hi Harun, to ana-anaknyo ka' iwi-iwi' na aha bansa Israel.

^3-4 De ko samian na aha bansa Israel monsombahkon sapi', domba kabai mee' hi Tumpu, binatang aijo' tionyo ahi nu kolot i ahop nu sabatan nu Kemah nu Tumpu. De nu kolotmo i tampat sangga'at, ia molanggaimo atulan kalana mombubusakonmo baso'. Ia madi'mo daagi' minsoop mian anu pinalesayamo hi Tumpu.

⁵ Kahanda' nu palentah aijo' da bansa Israel momboa mokiijo' i Kemah nu Tumpu iwi-iwi' na binatang anu osombahkon, kalana biasa nu kolotmo nu aha i pongale'an. Aha tionyo ahi' momboa anu osombahkon aijo' hi imam i ahop nu sabatan nu Kemah nu Tumpu ka' o kolot ikiijo' bau koloban pompodame.

⁶ Imam tionyo ahi' momdudu'akon baso' nu binatang aijo' i sulapa'nyo opa-opat nu mezbah i ahop nu sabatan nu Kemah nu Tumpu lantas opotunu na lompo'nyo da hongohisnyo momposanangmo kinyonyoa nu Tumpu.

⁷ Bansa Israel tionyo ahi' saja' tulu-tulutan hi Tumpu ka' madi' timbali mongkolot binatang iyaya mae na pongale'an anu osombahkon hi to tomi-tominuat anu ma'idek. Atulan aijo' tionyo ahi' otuluti sampe toka sidu-sidutu'.

⁸ De ko samian na aha Israel kabai samian anu lengkat mae i salipu'an anu tataapmo jojoong hi aha mian Israel monsombahkonmo koloban anu opotunu kabai koloban sangga'at,

⁹ hi Tumpu ia tionyo ahi' monsombahkon i ahop nu Sabatan nu Kemah nu Tumpu. De ia monsombahkon i tampat sangga'at ia madi' timbali minsoop mian anu pinalesayamo hi Tumpu Allah.

¹⁰ De ko samian na aha Israel kabai samian anu lengkat mae i salipu'an, anu tataapmo jojoong hi aha mian Israel mongkaanmo baso', ia nu hukumo nu Tumpu ka' madi'mo daagi' oposoop mian anu pinalesayamo hi la.

¹¹ Nyawa nu anu pinotimbalimo nu Tumpu kiijo' i baso'nyo, kalana aijo' Tumpu nompalentahkon da iwi-iwi' na baso' odudu'akon i mezbah da to dosa-dosa' nu mian opobelesi'mo. Baso' aijo'mo nyawa, mompobelesi' dosa'.

¹² Mokonyo aijo' bansa Israel kabai mian anu lengkat mae i salipu'an anu tataapmo jojoong hi aha madi' timbali mongkaan baso'.

¹³ De samian na aha Israel kabai samian anu lengkat mae i salipu'an anu tataapmo jojoong hi aha bansa Israel mohakop tomonsi' kabai binatang sangga'at anu timbali okaan, ia tionyo ahi' mongalini baso'nyo nu binatang aijo' ka' otabuhi nu tano'.

¹⁴ Nyawa nu anu pinotimbalimo nu Tumpu kiijo' i baso'nyo, mokonyo aijo' Tumpu montewa'mo aha bansa Israel boli mongkaan baso'. Batu-batu mian anu mombau anu madi' opobee' aijo' madi'mo oposoop mian anu pinalesayamo hi Tumpu Allah.

¹⁵ Batu-batu aha mian Israel kabai mian anu lengkat mae i salipu'an anu mongkaan antoknyo nu binatang anu nosi pate kabai nate sina'u nu binatang mahangas anu mongkaan sangko binatangnyo tionyo ahi' mombaso'i baju'nyo lantas mindi', ka' jojoong sangkutnyo sinaa makakinsapmo, atina'je ka' ia binelesi'mo.

¹⁶ De ia madi' mombau sumo aijo', ia tionyo ahi' mongoa'imo hukumannyo.