IMAMAT 11 - KITAB NU TUMPU ALLA LELE MA'IMAI'

Binatang anu timbali okaan ka' binatang anu madi' timbali okaan

¹ Tumpu mombee'mo atulan haha aiya hi Musa ka' hi Harun

^2-3 kona hi bansa Israel. Iwi-iwi' na binatang anu tumuu' i katano'an anu mongotot nu lonyom panyo po'ule' nu ama' ka' konukunyo mobiha' ohua' aijo' timbali okaan.

^4-6 Boli mongkaan unta, pelanduk kabai kelinci. Binatang aijo' madi' timbali okaan kalana mau mule' mongotot nu lonyom ka' po'ule' nu ama', konukunyo madi' mobiha' ohua'.

⁷ Boli mongkaan bau'. Binatang aijo' madi' timbali okaan, kalana mau mule' konukunyo mobiha' ohua', ia madi' mongotot nu lonyom ka' po'ule' nu ama'.

⁸ Antoknyo madi' timbali okaan ka' bangke'nyo mule' madi' timbali osala' kanyang kalana binatang aijo' madi' timbali okaan.

⁹ Belemiu timbali mongkaan iwi-iwi' na ngahan nu ikan anu ko sonukunyo ka' ko sisi'nyo.

^10-12 Binatang anu tumuu' i uno nu uee panyo madi' ko sonukunyo ka' madi' ko sisi'nyo aijo' madi' timbali okaan, ka' bangke'nyo madi' timbali osala' kanyang.

^13-19 To tomo-tomonsi', aiya na anu madi' timbali okaan kalana mahumimi'; tomonsi' tomundo' wali, mongkoek, iwi-iwi' na ngahan nu bonyia', nasar, papa', tomonsi' unta, camar, blekok, ka' iwi-iwi' na ngahan nu kohong, undan, tomonsi' kasa, ka' poniki'.

²⁰ Iwi-iwi' na binatang anu toto ise-ise' hondo, ka' ko polipiknyo aijo' madi' timbali okaan,

²¹ ola anu timbali ko lumpa-lumpat, yo timbali okaan.

²² Jadi kihi-kihi', leleng ka' kihi-kihi' anu mobilu' timbali okaan.

²³ Panyo iwi-iwi' na binatang anu ise' hondo sangga'at anu ko polipiknyo ka' mule' ola jumolo aijo' madi' timbali okaan.

^24-28 Toto samian timbali mahumimi' sangkutnyo sinaa makakinsapmo de ia monsala' kanyangmo sala'sa'angu' na bangke' nu binatang haha aiya: binatang anu ko konukunyo, tala kasuali anu ko konukunyo mobiha' ohua' ka' mongotot nu lonyom panyo po'ule' nu ama', ka' binatang anu ko tengkenyo opat ka' ko konukunyo mantan. Ihe na momboa bangke' nu binatang anu sumo aijo' tionyo ahi' mombaso'i baju'nyo, panyo ia tataap mahumimi' sangkutnyo sinaa makakinsapmo.

^29-30 Bokoti' anu jojoong i tano', pongka, bokoti' layano', bongkila', iwi-iwi' na ngangahan nu bahangkakak, landak, giwang, bengkarung, see' ka' bunglon aijo' madi' timbali okaan.

³¹ Ihe na monsala' kanyang binatang aijo', kabai bangke'nyo timbali mahumimi' sangkutnyo sinaa makakinsapmo.

³² De bangke' nu binatang aijo' manabu' i sa'angu' na balang, saba' balang aijo' timbalimo suele mahumimi'. Han aijo' suele mahumimi' de kona hi iwi-iwi' na ngahan nu balang anu kau' na binau, hude, kilit, kabai kalung, ka' madi' ko apa-apaanyo de balang aijo' opake pa' bau apaa. Balang aijo' tionyo ahi' opo omok pe'e i uee, panyo tataap mahumimi' sangkutnyo sinaa makakinsapmo.

³³ De bangke' aijo' manabu' i uno nu kuhon tano', iwi-iwi' na anu i uno nu kuhon aijo' timbalimo mahumimi', ka' kuhon aijo' tionyo ahi' oposo'mo.

³⁴ Kaanon anu nukona nu uee lengkat i kuhon aijo' timbalimo mahumimi', ka' uee anu o inum i uno nu kuhon aijo' suele timbalimo mahumimi'.

³⁵ Maumo pa' apaa na anu nukonamo nu bangke' aijo' timbalimo mahumimi'. Anglo kabai tampat pompotunuan, anu tano' na binau de nukonamo nu bangke' aijo' tionyo ahi' oposo'mo kalana nahumimi'mo.

³⁶ Ola mata nu uee kabai bubung yo madi' mahumimi', iwi-iwi' na sangga'at timbalimo mahumimi' de nukonamo nu bangke'.

³⁷ De bangke' aijo' manabu' i bine' anu kahanda'mo osau, bine' aijo' tataap ma'ima' madi' mahumimi'.

³⁸ Panyo de bine' aijo' hau-haunyo o omoki nu uee lantas nukonamo nu bangke' aijo' saba' bine' aijo' timbalimo mahumimi'.

³⁹ Ihe na monsala' kanyangmo bangke' nu binatang anu timbali okaan, timbalimo mahumimi' sangkutnyo sinaa makakinsapmo.

⁴⁰ Mian anu momboa kabai mongkaan bangke' aijo' tionyo ahi' mombaso'i baju'nyo, panyo ia tataap sabole-bole mahumimi' sangkutnyo sinaa makakinsapmo.

^41-42 Iwi-iwi' na binatang anu lumajang i tano' mau mule' anu jumolo ka' opat na tengkenyo kabai ko kangkamnyo manjoo', aijo' madi' timbali okaan.

⁴³ Boli mohumimi'i butong nu belemiu kalana mongkaanmo binatang anu mahumimi' aijo'.

⁴⁴ Akumo na Tumpu Allah nu belemiu, kalana aijo' ojagai na butong nu belemiu da belemiu tataap susi' kalana Aku Susi'.

⁴⁵ Akumo na Tumpu Allah anu nomboamo mae belemiu nosabat lengkat mae i Mesir, da Aku timbalimo Tumpu Allah nu belemiu. Tionyo ahi' belemiu susi', kalana Aku Susi'.

⁴⁶ Aijo'mo na atulannyo kona hi binatang, tibamo tomonsi', binatang anu tumuu' i uno nu uee ka' anu lumajang i tano'.

⁴⁷ Belemiu tionyo ahi' moko ala montoa mosia na pompahasala'annyo anu madi' mahumimi' tiba anu mahumimi', binatang anu timbali okaan ka' binatang anu madi' timbali okaan.