IMAMAT 10 - KITAB NU TUMPU ALLA LELE MA'IMAI'

Dosa' i Nadap ka' i Abihu

¹ Daagi' kino sansinaan i Nadab ka' i Abihu, to ana-anak i Harun, nongalamo tampat pombauan nu aha apu toto samian ka' ingisianmo nu aha nu oba. Lantas inguna'anmo nu aha kamangian na apu aijo' ka' nonsombahkonmo hi Tumpu. Panyo apu aijo' anu madi' halala' kalana Tumpu madi' nompokau aha monsombahkon.

² Sahingga Tumpu nontau'akonmo mae apu anu nontoyo'imo aha sahingga i natemo i Kemah nu Tumpu.

³ Lantas i Musa notataemo hi Harun, “Aijo'mo na anu kokoonyo nu Tumpu tempo'nyo Ia notatae, 'Iwi-iwi' na anu mombau apaa na anu Ku poto'i tionyo ahi' mongadati kasusi'an-Ku. Aku mompotoamo katalasanggoan-Ku hi aha iwi-iwi' bansang-Ku.' ” Panyo i Harun ola nomohokot.

⁴ Lapas aijo' i Musa nolagamo i Misael ka' i Elsafan, to ana-anak i Uziel, babo' i Harun. Ia notataemo hi aha, “Mamba mae aiya, ala na bangke' nu tominsan nu belemiu aiya i Kemah nu Tumpu ka' mamba potimpas i sambiha' nu Kemah.”

⁵ Aha tinokamo ka' nomboa bangke'nyo haha aijo' panyo daagi' ahi ko baju'nyo puso-pusok, binoamo i sambiha'nyo nu Kemah susumo anu pinalentahkonmo i Musa.

⁶ Lantas i Musa notataemo hi Harun ka' hi to ana-anaknyo sangga'at, aijo'mo i Eleazar ka' i Itamar, “Boli opojohok na ubak nu belemiu tapuhakak ka' boli obeak na baju' nu belemiu salaku tanda taalu' belemiu sinusa'mo ka' nohangimo. De belemiu mombau sumo aijo' belemiu silakamo, ka' iwi-iwi' na aha mian Israel nutambuha'imo nu Tumpu. Panyo iwi-iwi' na aha mian Israel sangga'at timbali mohangi ua-ua'aha aijo' anu pinateanmo nu apu lengkat mae hi Tumpu.

⁷ Boli opala'i na Kemah nu Tumpu da belemiu boli silaka, kalana belemiu binalakatanmo nompake lanya' anu opa-opake mombalakati da mombau anu nupalentahkon nu Tumpu.” Aha nombaumo susumo apaa na anu tinaloakonmo i Musa.

Atulan kona hi to ima-imam

⁸ Tumpu notataemo hi Harun,

⁹ “Moko inum anggur kabai inumon anu moko palangu beleyum ka' to ana-anak nu beleyum madi'mo timbali minsoop i Kemah-Ku. De belemiu molanggaimo atulan aijo' belemiu silakamo. Palentah aijo' tionyo ahi' otuluti totu-totu'u nu iwi-iwi' na lee' nu belemiu.

¹⁰ Belemiu tionyo ahi' moko ala monggihanakon apaa na anu samata-mata bagi nu Tumpu Allah ka' apaa na anu misa' bagi nu Tumpu Allah, anu mahumimi', ka' anu madi' mahumimi'.

¹¹ Iwi-iwi' na atulan anu Ku bee' hi belemiu anu nupotoka i Musa, tionyo ahi' belemiu moko ala mongajanakon hi bansa Israel.”

¹² I Musa notataemo hi Harun ka' hi anaknyo ohu-ohua', i Eleazar ka' i Itamar, “Ala na gandum labinyo nu anu kinakaanmo anu sinombahkonmo hi Tumpu. Labu aijo' obau roti anu madi' ogalo'i ragi, lantas okaan na aijo' i sohipi' nu mezbah, kalana koloban aijo' talalo hondo susi'.

¹³ Roti aijo' tionyo ahi' okaan i tampat anu susi' kalana ingala lengkat i kaanon anu sinombahkonmo hi Tumpu, roti aijo' timbalimo bau bagi nu belemiu ka' to ana-anak nu beleyum anu to momo'ane. Aijo'mo na palentah nu Tumpu hi belengku.

¹⁴ Panyo beleyum tiba to ana-anak nu beleyum anu to momo'ane ka' to bou-boune timbali mongkaan saha'annyo anu binoamo sinombahkon ka' pa'anyo anu sinombahkonmo samata-mata baumo anu nu Tumpu. Aijo'mo na bahagian nu to ima-imam o'ala i koloban anu bau pompodame bansa Israel. Belemiu timbali mongkaan iyayamo na tampat anu madi' mahumimi'.

¹⁵ Pa'a palasombahan anu samata-mata baumo bagi nu Tumpu, ka' saha'annyo nu palasombahan anu oboa aijo' tionyo ahi' oboa hingga-hinggat tiba lompo'nyo da bau koloban anu opotunu salaku palasombahan anu samata-mata baumo bagi nu Tumpu. Bahagian haha aijo' beleyumo na tumpunyo tiba to ana-anak nu beleyum sampe toka sidu-sidutu', susumo anu pinalentahkonmo nu Tumpu.”

¹⁶ Lapas aijo' i Musa nompokilawamo mongkona mee' anu okolobanakon pongampuni dosa'. Ia pinoto'i tukoonyo mee' aijo' pinotunumo. Han aijo' nombaumo i Musa da notambuha'mo hi Eliazar ka' hi Itamar, ka' ia notataemo hi aha,

¹⁷ “Kadaka' koloban bau pongampuni dosa' aijo' madi' kinaan nu belemiu i tampat anu susi'? Koloban aijo' talalo hondo susi', Tumpu nombee'mo hi belemiu, da dosa' nu aha mian Israel o ampunimo.

¹⁸ Baso' nu mee' aijo' madi' binoa i Kemah nu Tumpu, jadi' sapantasnyo ahi' koloban aijo' okaan nu belemiu ikiijo' susumo anu pinalentahkonkumo.”

¹⁹ Tinaaman i Harun, “Memang sinaa aiya aha mian Israel nonsombahkonmo koloban pongampuni dosa' ka' koloban anu opotunu na sinombahkonmo hi Tumpu. Mau mule' sumo aijo', balaa' aiya nontokaimo mae aku. De sinaa aiya aku mongkaanmo ahi' koloban bau pongampuni dosa' aijo', pa' han aijo' sanangmo na Tumpu?”

²⁰ I Musa sinanangmo na nohongo potaamnyo aijo'.