IMAMAT 1 - KITAB NU TUMPU ALLA LELE MA'IMAI'

Koloban anu Otunui

¹ Lengkat mae aijo' i Kemahnyo, Tumpu nolagamo i Musa ka' nombee'i ia atulan haha aiya,

² anu tionyo ahi' nutuluti nu aha mian Israel. De ko mian monsombahkon binatang anu opotunu bau koloban hi Tumpu ia timbali monsombahkon sapi', domba kabai mee'nyo.

³ De anu osombahkon sa'angu' na sapi', binatang aijo' tionyo ahi' lakinyo ka' madi' ko panyakitnyo. Sapi' aijo' tionyo ahi' nu boa i sabatan nu Kemah nu Tumpu, da nutalima nu Tumpu na mian aijo'.

⁴ Lantas ia tionyo ahi' mompotiik limanyo i ubak nu binatang aijo', sahingga anu sinombahkonnyo aijo' nutalimamo nu Tumpu bau pongampuni dosa'nyo.

⁵ Lapas aijo' okolotmo na sapi' aijo' i ahop nu sabatan nu Kemah. Baso'nyo tionyo ahi' osombahkonmo nu to ima-imam lee' mae i Harun hi Tumpu, lantas odudu'akonmo i sulapa'nyo opa-opat nu mezbah i ahop nu sabatan nu Kemah.

⁶ Lapas mae mian aijo' mongkilitimo ka' mompado-padotmo binatang aijo'.

⁷ To ima-imam tionyo ahi' momposulimo apu aita' i mezbah lantas mompaha posulonmo kau' anu oposun aijo' i mezbah.

⁸ To pado-padotan nu koloban tibamo ubaknyo ka' lompo'nyo tionyo ahi' nupotunu nu aha i apu.

⁹ Lantas mian aijo' tionyo ahi' mombaso'i isi nu kompongnyo tiba pa'anyo nu sapi' aijo', ka' imam anu mokalaja tionyo ahi' mompotunu iwi-iwi'. Hongohisnyo nu koloban anu pinotunumo aijo' momposanangmo kinyonyoa nu Tumpu.

¹⁰ De anu osombahkon sa'angu' na domba kabai mee', binatang aijo' tionyo ahi' lakinyo ka' madi' ko panyakitnyo.

¹¹ Mian aijo' tionyo ahi' mongkolot binatang aijo' i sasu Utara mezbah, lantas to ima-imam tionyo ahi' mondudu'akon baso'nyo i sulapa'nyo opa-opat nu mezbah aijo'.

¹² Salatan opoko pado-padotmo na binatang aijo', iwi-iwi' na padotannyo tibamo ubaknyo ka' lompo'nyo tionyo ahi' nupotunumo nu imam i apu aijo' i mezbah.

¹³ Lantas mian aijo' tionyo ahi' mombaso'i isi nu kompongnyo ka' pa'a nu binatang aijo'. Lapas aijo' imam tionyo ahi' monsombahkonmo iwi-iwi' hi Tumpu ka' mompotunu aijo' i mezbah. Hongohisnyo nu koloban anu pinotunu aijo' momposanangmo kinyonyoa nu Tumpu.

¹⁴ De anu osombahkon sa'angu' na tomonsi', tionyo ahi' sapatau kabai malapati' bata'nyo.

¹⁵ Imam tionyo ahi' momboa tomonsi' aijo' i mezbah lantas mompijak gogohongnyo ka' mompotunu ubaknyo aijo' i mezbah. Baso'nyo nu tomonsi' aijo' opinjitakon duhu-duhuk aijo' i mezbah.

¹⁶ Bokungnyo tiba iwi-iwi' na isinyo tionyo ahi' o alinakon, lantas o'alin i sasu kabete'an nu mezbah i tampat pongalinan abu'.

¹⁷ Lapas mae tomonsi' aijo' tionyo ahi' o sampan i pu'un nu polipiknyo panyo polipiknyo madi' timbali opolaus na monsampan. Lantas tomonsi' aijo' tionyo ahi' opotunu aijo' i mezbah. Hongohis nu koloban aijo' momposanangmo kinyonyoa nu Tumpu.