IBRANI 7 - KITAB NU TUMPU ALLA LELE MA'IMAI'

I Imam Melkisedek

¹ I Melkisedek aiya atina'mo na tomundo anu lengkat mae i Salem ka' imam nu Tumpu Anu Talasanggo. Tempo'nyo i Abraham ninsusule'mo lengkat mae namba nahampate nompatundu' to tomu-tomundo, i Melkisedek tinokamo nompolabot ia ka' nombalakati.

² Jadi, i Abraham nombee'imo i Melkisedek anu i humpaknyo namba nahampate binagi sampulu' na bagian, sambahagian na binee'nyo. (Sanggo i Melkisedek alati'nyo, anu momonanyo, “Tomundo nu Ka'adilan”; ka' kalana ia tomundo lengkat mae i Salem, sahingga sanggonyo alati'nyo mule' “Tomundo Ka'ima'an”.)

³ Mongkona i Melkisedek aiya madi' ko katalangan maumo pa' iyamae, pa' ia ko tuuma kabai tina kabai mompolee'; ka' suele madi' ko katalangannyo mongkona kinahampeannyo, kabai mule' ia sinilaka. Ia pokakana sumo Anak nu Tumpu; ia atina'mo na imam anu sampe toka sidu-sidutu'.

⁴ Jadi otoantomo i aiya palias na kodaka'nyo na i Melkisedek aiya; ia sumo aijo' na kodaka'nyo sahingga i Abraham, Tuuma nu mompolee' nu bansanto, nombee'mo hi ia anu binagi sampulu' na bagian, sambagian na binee'nyo, anu i humpaknyo lengkat mae nahampate aijo'.

⁵ I uno nu atulan nu agama Yahudi tinantukanmo saba' to ima-imam tulunan nu aha Lewi tionyo mongala sambagian hi anu binagimo sampulu' na hasin nu polioan nu aha mian nu Israel, aijo'mo posi to utu-utus nu aha, mau mule' aha bubuu' tulunan mae i Abraham.

⁶ I Melkisedek misa' tulunan nu aha Lewi, panyo ia suele mohumpak ahi' sambagian hi anu binagimo sampulu' apaa na anu i humpak mae i Abraham, ka' nombalakati mule' i Abraham anu sabenannyo ia nontalimamo ahi' janji' hi Tumpu.

⁷ Memang madi' ahi' timbali ogagakon au'aitu mian anu binalakatanmo atina' na lebe i aluknyo nu mian anu nombalakatimo.

⁸ To ima-imam anu mohumpak sambagian hi anu binagi sampulu' na bagian aijo'mo mian anu timbali silaka. Panyo de o hongo i Kitab nu Tumpu, i Melkisedek anu nohumpakmo bagi sambagian hi anu binagi sampulu' na bagian aijo' atina'mo mian anu tataap tumuu'.

⁹ Timbali otaloakon, saba' aha Lewi – anu tulunannyo molimu' sambagian i uno nu sampulu' na bagian lengkat hi aha mian nu Israel anu palesayamo – nombayan suele bagian haha aijo', hi Abraham, lantas i Abrahamje na mombee' hi Melkisedek, de i Abraham mombayanmo hi Melkisedek.

¹⁰ Mau mule' aha Lewi ma'isa pe'e i hampe, panyo timbali otaloakon ia kiijo'mo i uno nu butong i Abraham mompolee'nyo, tempo'nyo i Melkisedek siningkabotmo tiba i Abraham.

¹¹ Tempo'nyo to ima-imam Lewi nompalentah, atulan nu agama Yahudi binee'mo hi mian Israel anu palesayamo. Kalana to ima-imam Lewi naipuan mae aijo' madi' moko ala mombau apaa na anu tionyo nubau nu aha ma'i-ma'ima', jadi tionyo ko imam sangga'at, aijo'mo anu sumo i Imam Melkisedek, ka' misa'mo anu lengkat mae i gombuan nu Imam Harun!

¹² Jadi, de pangkat nu to ima-imam o babali'i, atulan nu agama Yahudi suele tionyo o babali'imo ahi'.

¹³ Anu nupatui nu sisik aiya aijo'mo Tumpunto: Ia nolengkat mae i tulunan sangga'at ka' ma'isa toho' kino samian pe'e na tulunan-Nyo binapangkat susumo imam.

¹⁴ Iwi-iwi' na mian monsumbu' saba' Tumpunto nolengkat mae i tulunan nu Yehuda; ka' i Musa madi' toho' nonsanggo tulunan aijo' tempo'nyo ia nombisalakonmo to ima-imam.

Samian na Imam sangga'at sumo i Melkisedek

¹⁵ Anu sinisik aiya timbali lebe talang mule', kalana samian na imam sangga'at tinokamo anu sumo i Melkisedek.

¹⁶ Ia i hangkat tinimbali imam, misa' mimpu'u i to atu-atulan nu mian, panyo mimpu'u i kantumuu'annyo anu talalo hondo ko kuasanyo ka' anu madi' ko kamingkotannyo.

¹⁷ Kalana i uno nu Kitab nu Tumpu tinaloakon, “Beleyum atina'mo na imam sampe toka sidu-sidutu', susumo i Imam Melkisedek.”

¹⁸ Jadi uuka aiya atulan anu pininmo o una'mo i sohipi' saba' madi'mo mahoson ka' madi'mo ko gunanyo.

¹⁹ Atulan nu agama Yahudi madi' moko ala mombau apa-apaa da timbali ma'ima'. Aijo' na sababnyo kita uuka aiya binee'anmo anu timbali otaha'imani anu lebe ma'ima'; tiba jalan aijo' kita moko alamo ohani hi Tumpu.

²⁰ Ka' mule', iwi-iwi' aijo' pinohosonmo nu sumpa' nu Tumpu Allah. Madi' toho' ko sumpa' sumo aijo' tempo'nyo imam sangga'at haha aijo' i hangkat binau imam.

²¹ Panyo i Yesus i hangkat binau imam sinumpa', tempo'nyo Tumpu notataemo hi Ia, “Tumpu binasumpa'mo, ka' Ia madi' mongabali' na kahanda'-Nyo, ‘Beleyum atina'mo na imam sampe toka sidu-sidutu'.’ ”

²² Tiba jalan aiya mule' i Yesus na anu tinimbalimo bau pintoongan ka' anu lebe ma'ima' ka' lebe mahoson mongkona han anu jinanji'mo aijo'.

²³ Daagi' mule' ko sa'angu' na han: imam haha aijo' sangga'at manjoo', kalana aha toto samian silaka, sahingga madi' moko ala sabole-bolemo bapangkat.

²⁴ Panyo i Yesus tumuu' sampe toka sidu-sidutu', jadi pangkat-Nyo salaku imam madi' molalin hi mian sangga'at.

²⁵ Mokonyo aitu sampe toka sidu-sidutu' i Yesus timbali momposalamat to mia-mian anu toka hi Tumpu, montului Ia, mokonyo aijo' Ia tumuu' sampe toka sidu-sidutu' da mompotokakon apaa na anu nu poita nu to mia-mian hi Tumpu.

²⁶ Jadi, i Yesus aijo'mo na Imam Daka' anu opalaluinto. Ia susi'; hi Ia madi' ko anu i humpak na kasala'an kabai pa' dosa' apaa. Ia gina'atakon nompala'i to mia-mian anu baladosa', ka' i liba'akon nokiita' i tampat anu lebe matangkas moliu-liu langit.

²⁷ Ia madi' sumo to ima-imam daka' sangga'at, anu toka sansina-sinaa tionyo monsombahkon koloban kalana posi dosa'nyo iwi-iwi', lapas aijo' atina'je ka' kalana to dosa-dosa' nu mian anu palesayamo. I Yesus nonsombahkon koloban ola ninsan panyo tinanggungnyomo sampe toka sidu-sidutu', tempo'nyo Ia nonsombahkonmo posi butong-Nyo salaku bau koloban.

²⁸ Atulan nu agama Yahudi mohangkat mian anu madi' ma'ima' da timbali imam daka'. Panyo salatan noko lapasmo na atulan aijo', Tumpu nojanji'mo ka' sinumpa'nyomo tukoonyo Ia mohangkatmo anu salaku bau Imam Daka', Anak anu pinotimbalimo bau Pomposalamat totu-totu'u ma'ima' sampe toka sidu-sidutu'.