IBRANI 6 - KITAB NU TUMPU ALLA LELE MA'IMAI'

¹ Kalana aijo', imbo' da kita mondensu'akonmo i panga-pangajalan anu lebe tongkohimona mongkona kantumuu'an nu mian Kristen anu sinsumbu'mo, da lebemo mangalati', ka' boli ola mongkamata pu'u-pu'unyo momona nu pangajalan nu agamanto. Boli kita po'ule' mule' mongulit pu'unyo nu pangajalan au'aitu mian madi'mo timbali mombau hahan anu madi'mo mingguna ka' tionyomo ahi' palesaya hi Tumpu,

² kabai pu'unyo nu pangajalan mongkona palamandian kabai mongkona mompotudu lima i ubak nu mian, kabai mongkona mian anu silakamo, po'ule' mule' tumuu' kabai hukumannyo anu sampe toka sidu-sidutu'.

³ Imbo'mo na kita, de Tumpu mompobee'mo mondensu'akon i panga-pangajalan anu lebemo matangkas!

⁴ Kalana daagi' ko to mia-mian anu noteba'mo, madi'mo opoko ala, po'ule' o ajan. Aha naipuan mae jinojoongmo i uno nu jingka anu no lengkat mae hi Tumpu, ka' nongoa'imo anu binee'-Nyomo. Aha mule' suele kinuasanmo nu Roh nu Tumpu.

⁵ Aha nonsumbu'mo kalana apaa na hi anu sinumbu'mo nu aha aijo'mo potatae nu Tumpu aijo' ma'ima', ka' aha nongoa'imo to bala-balakat anu kinuasanmo nu kuasa anu tokaje mae.

⁶ Panyo lapas aijo' aha moteba'mo! Madi'mo po'ule' opoko ala o'ajan na aha da balatobat i to dosa-dosa' nu aha. Kalana aha po'ule' mule' nonsalib Anak nu Tumpu ka' nonsaduakonmo Ia pinopo' ambang i ahop nu mian da'isan.

⁷ Tano' anu monsosop uee nu ujan anu toto minsan tudun i bawonyo, lantas mohasinakon to sosu-sosu'anon anu mingguna hi mian anu mokalaja, tano' aijo' binalakatanmo nu Tumpu.

⁸ Panyo de tano' aijo' mohasinakon to pada-padang ka' anu tumuu' kohii'nyo, saba' tano' aijo' madi' ko gunanyo ka' saidi' mae nu kutukimo nu Tumpu ka' ahennyo opapui sampe mingkot.

⁹ Panyo to utu-utus anu okanonongi, mau mule' kami motatae sumo aijo', panyo opalesaya hondo mami na komiu. Opalesaya mami totu-totu'u kalana komiu nontalimamo hahan anu lebe ma'ima', aijo'mo to bala-balakat anu tinimbalimo kasalamatan nu belemiu.

¹⁰ Tumpu misa' Tumpu anu madi' adin. Ia madi' mongkolilimi apaa na anu kinalajamo miu hi Ia, ka' kalibosan anu pinotoamo miu hi Ia, tempo'nyo komiu nontulungimo to utu-utus anu sa'a-sa'angu' na kapalesaya'an, tu'utu mae ka' uuka aiya.

¹¹ Okahanda'i mami da komiu toto samian saja' bala usaha toka-toka imihinyo, sahingga komiu mohumpak apaa na anu o ima-imani miu aijo'.

¹² Kami madi' mongka'oho' komiu timbali moluluk. Panyo okahanda'i mami da komiu tumuu' sumo to mia-mian anu mohumpak apaa na anu jinanji'mo nu Tumpu, kalana palesaya hi Ia ka' kalana sabaan na montanda'i Ia.

Janji' nu Tumpu madi' mongabali'

¹³ Tempo'nyo Tumpu binajanji' hi Abraham, Ia binasumpa'mo tukoonyo, nu bauje apaa na anu jinanji'nyomo. Ka' kalana madi' ko anu lebe matangkas molingkudui Tumpu, sahingga Ia binasumpa'mo i posi sanggo-Nyo.

¹⁴ Ia notatae, “Aku bajanji' mombalakatije beleyum ka' mompotimbalije lee' nu beleyum timbali manjoo'!”

¹⁵ I Abraham sinabaan na nontanda'i sahingga ia nohumpak apaa na anu jinanji'mo nu Tumpu hi ia.

¹⁶ De mian basumpa', ia basumpa' hi sanggo nu mian sangga'at anu lebe matangkas molingkudui ia, sahingga madi'mo ko'anu lewa' monggagakon kalana iwi-iwi' sinumpa'mo.

¹⁷ Tumpu ko kahanda' lebe momponasa hi to mia-mian anu nontalimamo janji'-Nyo, tukoonyo Ia madi'mo mombali'i anu ingatun-Nyomo. Aijo' na sababnyo pinaka tuangan-Nyomo na sumpa'nyo anu jinanji'-Nyomo aijo'.

¹⁸ Ohua' na han aijo' madi'mo daagi' mongabali': Tumpu madi' toho' baleko' i janji'-Nyo ka' sumpa'-Nyo. Kalana aijo', kita anu ningkongmo hi Tumpu, kinakeha'mo da mahoson na mintoong hi anu otaha'imani anu naningkoyamo i ahopto.

¹⁹ Anu otaha'imaninto aijo' sumomo tapu nanimpasokmo leleeng anu mahoson na pintoongan ka' madi'mo ko'anu mompoposia i uno nu kantumuu'anto. Anu otaha' imani aijo' so'mo noliu-liu lalanse' i Salipi' anu Susi' hondo i Laigan nu Tumpu i suluga'.

²⁰ I Yesus nombuka'mo jalan mamba i tampat aijo' bau kajalananto ka' ninsoopmo nokiita' binaumo Imam Daka'to sampe toka sidu-sidutu', susumo i Imam Melkisedek.