IBRANI 5 - KITAB NU TUMPU ALLA LELE MA'IMAI'

¹ Batu-batu Imam Daka' opile'i hi aha mian anu palesayamo hi Tumpu, ka' o hangkat da mompojalan palentah nu Tumpu salaku wakin nu aha. Kalajanyo aijo'mo monsombahkon hi Tumpu, apa-apaa na obee' ka' okolobanakon bau pongampuni dosa'.

² Imam Daka' aijo' manjoo' na anu madi' nupoko ala nu bau, ka' kalana aijo' ia tionyo ahi' mingkalakuan manonong hi to mia-mian anu madi' ko anu nu pisumbu-sumbu' ka' anu sinala'mo na jalannyo.

³ Ka' kalana ia madi' moko ala mombau apa-apaa, ia tionyo ahi' monsombahkon koloban, misa' ola kalana dosa' nu mian anu palesayamo hi Tumpu, panyo suele kalana dosa'nyo.

⁴ Madi' ko samian anu mosi hangkat posi butongnyo timbali Imam Daka'. Mian timbali Imam Daka' de Tumpu na molaga ia da mompojalan palentah aijo' – pokakana sumo i Harun.

⁵ Sumo aijo'mo na i Kristus. Ia madi' nohangkat posi butong-Nyo da timbali Imam Daka'. Posi Tumpu na nohangkatmo Ia. Tumpu notatae hi Ia, “Anak-Ku na Beleyum; sinaa aiya Akumo na Tuuma nu Beleyum.”

⁶ I tampat sangga'at Tumpu suele notatae, “Beleyumo na Imam Daka' sampe toka sidu-sidutu', susumo i Imam Melkisedek.”

⁷ Tempo'nyo i Yesus daagi' tutuu' i dunia aiya, Ia binalado'a ka' noloboo' na nongkakase ka' i humaang hi Tumpu, anu moko ala momposalamat i balaa' nu kapatean. Ka' kalana Ia mohongo-hongo Tumpu ka' mongadati, sahingga i hongonyomo mae na Ia.

⁸ I Yesus atina'mo na Anak nu Tumpu, panyo maumo sumo aijo', Ia binala gulu'mo da timbali tulu-tulutan, aijo'mo Ia nongoa'imo kasansala'an.

⁹ Sahingga salatan Ia pinotimbalimo anu momposalamat totu-totu'u, Ia tinimbalimo pinolengkatan nu kasalamatan anu sampe toka sidu-sidutu' kona hi iwi-iwi'na mian anu tulu-tulutan hi Ia,

¹⁰ ka' Tumpu suele nompoto'imo Ia aijo' salaku i Imam Daka' susumo i Imam Melkisedek!

Pokinde'

¹¹ Mongkona pangkat i Yesus salaku Imam Daka', manjoo' na palalu opoto'i mami hi komiu, panyo mahan na montutuhakon kalana komiu madi' sampa' mangalati.

¹² Sabenannyo tempo'nyomo na komiu timbali gulu', panyo nanasamo taalu' komiu daagi' ahi' palalu balagulu' pe'e hi mian sangga'at mongkona alati'nyo nu pangajalan nu Tumpu. Komiu ma'isa timbali mongala kaanon anu mokuut; komiu daagi' tionyo ola monginum susu.

¹³ Mian anu daagi' monginum susu alati'nyo ia daagi' bunga mea'; ia ma'isa ko'anu nu pisumbu-sumbu' mongkona apaa na anu totu'u ka' apaa na anu sala'.

¹⁴ Kaanon anu mokuut aijo' bau bagi nu mian anu motu'amo, anu kalana ko'anumo nu sumbu-sumbu', timbalimo monggihanakon iya na anu ma'ima' tiba iya na anu ma'idek.