IBRANI 2 - KITAB NU TUMPU ALLA LELE MA'IMAI'

Kasalamatan anu madi' ko gampanyo

¹ Mokonyo aijo' kita tionyo lebe totu-totu'u mintoong i pangajalan anu i hongontomo, da kita boli mompala'i kapalesaya'anto.

² Iwi-iwi' na anu pinotuunmo ka' pinotokakonmo nu to mala-malaikat hi mompolee'to i nyata'mo hondo, ka' mian anu madi' montuluti, kabai mian anu madi' montapali mohumpak hukuman anu konanyomo na o hukum sumo aijo'.

³ Pakalaus mule' de kasalamatan anu lebe daka' na angga'nyo ka' anu molingkuduimo potuunon haha aijo'! De kita madi' saja' monginau' kasalamatan aijo', tantu kita madi' molapas i hukuman. Kalana Tumpu na momonanyomo nompoto'i kasalamatan aijo', ka' to mia-mian anu momonanyo nohongo nomponyata'mo anu totu'unyo hi kita.

⁴ Ka' mumle' Tumpu nompaka pototu'umo apaa na anu sinakisianmo nu mian haha aijo', aijo'mo Tumpu nombaumo iwi-iwi' nu ngahan anu okabangangi ka' hahan anu madi' ko gampanyo ka' posi pongka'oho'-Nyo na nombagi-bagiakonmo to bala-balakat nu Roh nu Tumpu.

Pombukai jalan da mian oposalamat

⁵ To mala-malaikat madi' nohumpak kuasa lengkat mae hi Tumpu Allah da mompalentah dunia bu'ou anu saidi' mae toka, aijo'mo dunia anu hau-haunyo obisalakonto aiya.

⁶ Panyo mule', i sa'angu' na bahagian i uno nu Kitab nu Tumpu Allah tinulismo sumo uuka, “Mian aijo' apaa, o Tumpu, sahingga Belento mongka'oho' monginau' ia? Mian ola ahi' mian, panyo Belento mompalahatikan ia!

⁷ I tempo' anu madi' pinin Belento nompotimbalimo ia gagana' tinau'akon i aluknyo nu malaikat. Belento nombee'mo pangkat hi ia anu opopodaka' ka' o'adati,

⁸ ka' nompotimbalimo ia anu mongkuasai iwi-iwi na apaa.” Jadi, de koonyo, Tumpu na nompotimbali mian, “anu nongkuasai iwi-iwi na apaa”, aijo' alati'nyo saba' madi' ko sangga'atan pe'e na anu madi' i aluk nu kakuasa'an nu mian. Mau mule' sumo aijo', kita madi' montoa uuka aiya mian mongkuasai iwi-iwi na apaa.

⁹ Panyo kita nontoamo i Yesus ko kuasa! Ia pinotimbalimo gagana' i aluknyo nu malaikat ola i tempo' anu sasaingoni', da kalana kanonongan nu kinyonyoa nu Tumpu Ia timbali silaka bau pontokong mian iwi-iwi'. Kita nontoamo uuka aiya Ia binee'anmo pangkat anu talasanggo ka' o'adati kalana Ia nongoa'imo kasansala'an sampe sinilaka.

¹⁰ Memang konanyomo na Tumpu – anu nompotimbalimo iwi-iwi na apaa bau kapentingan-Nyo – ka' nompotimbalimo i Yesus anu momposalamat totu-totu'u, Ia nongoa'imo kasansala'an. Tiba jalan anu sumo aijo' na Tumpu nolagamo mian iwi-iwi' da suele opopodaka' tiba i Yesus. Kalana Iamo na pombuka' jalan hi aha da timbali oposalamat.

¹¹ I Yesus nompolomasmo mian i dosa' nu aha iwi-iwi'; ka' Ia anu nompoloasmo, tiba aha anu pinoloasmo aijo', hingga-hinggat nontuumamo Tuuma samian. Mokonyo aijo' i Yesus madi' ma'ambang na mongakui aha aijo' sumomo to utu-utus-Nyo.

¹² I Yesus notatae hi Tumpu, “Ku poto'ije hi to utu-utus-Ku na Belento. Ku poto'ije na Belento de aha singkabotmo, ipogombuan.”

¹³ I Yesus notatae mule', “Tumpu na anu Ku taha'imani.” Ka' Ia notatae mule', “Aiyamo na Aku, tiba to ana-anak anu binee'mo nu Tumpu hi beleng-Ku.”

¹⁴ Kalana to mia-mian anu sinanggo-Nyo anak aijo', atina'mo mian anu timbali silaka, jadi i Yesus tinimbalimo pokakana sumo aha ka' tinumuu'mo pokakana sumo mian. Ia nombau sumo aijo', da kalana Ia sinilaka sumo aijo' Ia timbali mohopu'i Ibilis anu mongkuasai kapatean.

¹⁵ Tiba jalan anu sumo aijo' Ia nompobebasmo to mia-mian anu i uno nu kantumuu'annyo saja' obotuani kalana mabuhuk dumo mate.

¹⁶ Jadi sinumbu'mo saba' misa' malaikat na tinulungan-Nyo, panyo lee' mae i Abraham.

¹⁷ Aiyamo na alati'nyo sahingga Ia tionyo timbali pokakana sumo to utu-utus-Nyo i uno nu iwi-iwi na han. Ka' tiba jalan anu sumo aijo' Ia noko alamo tinimbali Imam Daka' anu mohongo-hongo ka' anu ko kalibosan-Nyo. Kalana Ia nombaumo anu sumo aijo', sahingga dosa' nu mian ingampunanmo.

¹⁸ Ka' kalana Ia toho'mo nongoa'i kasansala'an ka' sinobaan, sahingga Ia noko alamo nontulungi to mia-mian anu kinonamo nu soba'an, kalana Ia toho'mo sinobaan ka' nongoa'imo kasansala'an.