IBRANI 11 - KITAB NU TUMPU ALLA LELE MA'IMAI'

Iman

¹ Bala'iman alati'nyo palesayamo totu-totu'u i hahan anu otaha'imani, alati'nyo ko katantuan i unonu kinyonyoa mongkona hahan anu madi' otoa.

² Kalana bala'iman, sahingga to mia-mian naipuan mae kina'ima'anmo nu Tumpu.

³ Kalana bala'iman, sahingga osumbu'to na dunia aiya taalu' pinotimbali nu potatae nu Tumpu; jadi, apaa na anu otoanto, pinotimbalimo nu anu madi' otoanto.

⁴ Kalana bala'iman, sahingga i Habel nonsombahkonmo hi Tumpu Allah koloban anu lebe ma'ima' molingkudui koloban i Kain. Kalana ia bala'iman sumo aijo', i Habel tinalimamo nu Tumpu salaku mian anu ma'ima', kalana inyata'mo na Tumpu nontalimamo anu sinombahkonnyo. I Habel sinilakamo, panyo kalana ia bala'iman, sahingga ia daagi' basisik sampe uuka aiya.

⁵ Kalana bala'iman, sahingga i Henokh madi' sinilaka, panyo i hangkat ka' binoa hi Tumpu. Madi' ko samian na nongkabot ia, kalana ia i hangkatmo nu Tumpu. I uno nu Kitab nu Tumpu Allah tinulismo, ma'isa pe'e i Henokh i hangkat, ia nomposanangmo kinyonyoa nu Tumpu.

⁶ De madi' bala'iman, madi' ko samian pe'e timbali moko ala momposanang kinyonyoa nu Tumpu. Kalana mian anu toka hi bele nu Tumpu tionyo ahi' palesaya saba' Tumpu daagi', ka' Tumpu mombalosije mian anu molio Ia.

⁷ Kalana bala'iman, sahingga i Nuh pinoto'imo nu Tumpu mongkona hahan anu jadi aiya mae i ahop, anu madi' pinoko ala tinoanyo. I Nuh tulu-tulutan hondo hi Tumpu, sahingga ia nombaumo sa'angu' na kapan anu ahennyo nomposalamatmo butongnyo tiba aha sampoto'utus. Tiba jalan anu sumo aijo', dunia i hukumo, panyo i Nuh kalana ia bala'iman, sahingga koonyo nu Tumpu ia mian anu ma'ima'.

⁸ Kalana bala'iman, sahingga i Abraham tulu-tulutan hondo hi Tumpu, tempo'nyo Tumpu nolagamo ia ka' nonsaimo ia namba i lipu' anu jinanji'mo nu Tumpu hi ia. Lantas i Abraham nambamo, padahan madi' nusumbu' pa' moya na kalambanannyo.

⁹ Kalana bala'iman, i Abraham mian anu lengkat mae i salipu'an jinojoongmo i lipu' anu jinanji'mo nu Tumpu hi ia aijo'. I Abraham jinojoongmo kiijo' i kemahnyo. Sumo aitu mule' na i Ishak ka' i Yakub, anu nontalimamo palajanjian pokakana sumo aijo' lengkat mae hi Tumpu.

¹⁰ Kalana i Abraham montanda'imo kota anu pinopikinakonmo ka' nupotinjomo nu Tumpu ka' opotinjo i mesen anu mahoson hondo.

¹¹ Kalana bala'iman, sahingga i Abraham nohumpakmo lee' hi Sarah, maumo i Abraham i langkai'mo hondo, ka' i Sarah mule' i lengke'mo. Pinalesayamo hondo na kinyonyoa i Abraham, kalana nusumbu' tionyo nuganapi nu Tumpu na palajanjian-Nyo.

¹² Mau mule' i Abraham tempo'nyo aitu sumomo mian anu sinilakamo na butongnyo, panyo ia nohumpak manjoo' hondo na lee'nyo anu konjoo'nyo madi' opoko ala o bilang – sumo konjoo' nu mandala' i langit, ka' bone' i biwi nu ambai.

¹³ Iwi-iwi' na mian haha aijo' tataap bala'iman sampe silaka. Aha madi'mo mohumpak hahan anu jinanji'mo nu Tumpu, panyo ola montanggalakon ka' molabot aijo' mae jo'o-jo'on. Ka' aijo' mule' aha mongakui, saba' aijo' aha ola mian anu lengkat mae i salipu'an ka' anu ola jojoong madi' pin i dunia aiya.

¹⁴ Mian anu montaloakonmo sumo aijo', saba' aha mompoto'imo totu-totu'u daagi' molio lipu' anu timbali tano' kajojoongan nu aha.

¹⁵ Misa' lipu' anu pinala'ianmo mae nu aha aijo' na anu lewa' nu popikinakon nu aha. Kalana desumo aijo' nanjoo'mo na kasampatan hi aha po'ule'mo minsusule' i lipu' aijo'.

¹⁶ Panyo aha memang ahi' monginde'i sa'angu' na lipu' anu lebe ma'ima', aijo'mo lipu' anu kiita' i Suluga'. Aijo' na sababnyo Tumpu madi' ma'ambang de aha monsanggo Ia Tumpu nu aha, kalana Tumpu nomposadiamo sa'angu' na kota bau kajojoongan nu aha.

¹⁷ Ola kalana bala'iman, sahingga i Abraham nonsombahkonmo i Ishak salaku koloban tempo'nyo ia inguji' nu Tumpu. Tumpu nombee'mo anu jinanji'-Nyomo hi Abraham, panyo i Abraham i halala'mo na nombee' anaknyo anu ola sa'a-sa'angu'nyomo aijo'.

¹⁸ Tumpu notataemo hi Abraham, “Hi Ishakje aiya na beleyum mohumpak lee' anu jinanji'kumo hi beleyum.”

¹⁹ I Abraham palesaya totu-totu'u hi Tumpu, moko ala po'ule' mompotumuu' i Ishak maumo ia sinilakamo – jadi, timbalimo otaloakon, i Abraham po'ule'mo nontalima i Ishak anu sini-sinilakamo po'ule'mo tinumuu'.

²⁰ Kalana bala'iman, sahingga i Ishak nonjanji'mo balakat hi Yakub ka' hi Esau anu aiya mae o ahopi.

²¹ Kalana bala'iman, sahingga ma'isa pe'e i Yakub sinilaka ia nombalakatimo to ana-anak i Yusuf – aijo'mo aha natiseha i pulu nu tokonnyo ka' nonsombah Tumpu.

²² Kalana bala'iman, sahingga i Yusuf – salatan ohanimo na ia silaka – nonsisikakonmo sampoto'utusannyo mian nu Israel anu palesayamo hi Tumpu lengkat mae i Mesir, ka' nompotunmo mosia na tionyo mongkalesang butongnyo de ia silakamo.

²³ Kalana bala'iman, sahingga tina tuuma i Musa nomposulukmo ia tinotolu' na bitu'on na kopinnyo salatan ia i hampemo. Tinoa nu aha, saba' ia aijo' samian na anak anu ma'ima' ka' aha madi' nabuhuk na nonggagakon palentah i tomundo'.

²⁴ Kalana bala'iman, sahingga salatan i Musa dinaka'mo, madi' mongka'oho' osanggohi anak nu osoa nu Tomundo Mesir.

²⁵ Ia lebe mongka'ima'i hingga-hinggat mongoa'i sansala tiba mian anu palesayamo hi Tumpu, asan boli mongoa'i kasanangan i kantumuu'an anu baladosa' anu ola sasaingoni'.

²⁶ Nu oa'i i Musa lebe ko angga'nyo na opopo'ambang kalana palesaya hi Tomundo anu Momposalamat anu jinanji'mo nu Tumpu Allah aijo', pojohok mau madi' mohumpak iwi-iwi' na halata' nu lipu' Mesir, kalana i Musa montaha'imani tambonyo i sinaa anu aiya mae o ahopi.

²⁷ Kalana bala'iman, sahingga i Musa nompala'imo Mesir ka' madi'mo mabuhuk maumo nu tambuha'i nu tomundo'. I Musa nolausakonmo patujunyo sumomo ia nontoamo Tumpu anu madi' otoa-toa.

²⁸ Kalana bala'iman, sahingga i Musa nombaumo Paskah ka' nompalentahkonmo da baso'nyo opipi'akon i tumban nu laigan nu aha mian nu Israel da Malaekat anu Monsilakai boli mompatei to ana-anak tumpe nu aha.

²⁹ Kalana bala'iman, sahingga to mia-mian nu Israel noko potaap i Ambai Momea', sumomo aha i lumajang i bawo nu tano' kantisan, padahan to mia-mian nu Mesir i lonyomo nu ambai aijo' tempo'nyo aha suele nompisoba notaap.

³⁰ Kalana bala'iman, sahingga to mia-mian nu Israel nombaumo da pagan mesen nu Yerikho nohobo' salatan pinitun sinaamo na aha nontikubi.

³¹ Ola kalana bala'iman, sahingga i Rahab, boune anu lewa-lewa' masala' aijo', madi' pinatean hingga-hinggat tiba to mia-mian anu madi' tunduk hi Tumpu; kalana ia na nontalima ima-ima' mian nu Israel anu namba nondoyoni.

³² Jadi, aku timbalije mule' sabole-bole motatae, panyo tempo' na madi'mo sukup hi belengku. Aitu pe'e ma'isa sinanggongku na i Gideon, i Barak, i Simson, i Yefta, i Daud, i Samuel ka' to nabi-nabi.

³³ Kalana bala'iman, sahingga aha nompatundu'mo iwi-iwi' na kalaja'an. Aha nombaumo anu totu'u imata nu Tumpu, sahingga nohumpakmo apaa na anu jinanji'mo nu Tumpu. Ginunggumanmo nu aha na nganga' nu to singa-singa,

³⁴ nompateimo apu anu daka' na moaknyo, madi' pinoko ala tinabas nu bajak. Aha madi' mahoson, panyo tinimbalimo nahoson; aha baani na mahampate sahingga nompatundu'mo suludadu nu bansa anu i salipu'an.

³⁵ Kalana bala'iman, sahingga po'ule'mo i humpak nu to bou-boune na to mia-mian anu sinilakamo. Daagi' mule' ko anu i halala'mo na osakisa sampe sinilakamo, ka' madi'mo ko kahanda' opotumuu', kalana mongka'ima'imo po'ule' opotumuu' da mohumpak kantumuu'an anu lebe ma'ima'.

³⁶ Daagi' ko anu i le-letakon, pinohos, pinungu nu lante ka' pinosoop i uno nu talungku'.

³⁷ Aha pinahambunu'akon nu batu sampe sinilaka, daagi' mule' ko anu kinolong nu galagaji, ka' anu pinatean nu bajak. Aha anu namba momoya, ola mibaju' nu kilit nu domba kabai kilit nu mee'; aha kasiasi, okabisa'i, ka' osakisa.

³⁸ Dunia aiya misa' tampat anu lebe ma'ima' hi aha. Aha saja' jinojoong nolali-lalin i padang mateges ka' i bungkutnyo, ka' jinojoong i to lia-liang nu batu ka' i to bolo-bolo' nu tano'.

³⁹ Palias na kodaka'nyo na ka'untungan anu i humpakmo nu iwi-iwi' mian haha aijo', kalana iman nu aha! Panyo aha madi' mohumpak apaa na anu jinanji'mo nu Tumpu,

⁴⁰ kalana Tumpu ko tanga'an anu lebe ma'ima' hi kita. Tanga'an-Nyo aijo'mo saba' ola ahi' palesaya hingga-hinggat tiba kita, yo aha timbali ma'ima'.