IBRANI 10 - KITAB NU TUMPU ALLA LELE MA'IMAI'

¹ Atulan nu agama Yahudi ola mombee'i gambalan anu opiha-pihau' mongkona han anu ma'ima' anu tokaje mae, misa' gambalan anu sahondo-hondonyo mongkona han aijo'. Atulan aijo' madi' moko ala mompokopiani mian anu toka monsombah Tumpu ka' momboa mae anu osombahkon, mau mule' sataun-toka sataun saja' monsombahkon kolobaan anu susumo aijo'.

² Bisuannyo to mia-mian anu monsombah Tumpu aijo' totu-totu'u binelesi'mo i dosa', aha madi'mo daagi' ko pikilan montutugi dosa', ka' koloban madi'mo daagi' osombahkon.

³ Panyo koloban haha aijo' anu osombahkon sataun-toka sataun ola salaku mompo'ingat mian i to dosa-dosa' nu aha,

⁴ kalana memang baso' nu sapi' ka' baso' nu mee' lakinyo madi' moko ala mongalini dosa'.

⁵ Mokonyo aijo' salatan i Kristus ninsoopmo i dunia, Ia notataemo hi Tumpu, “Belento madi' mongkahanda'i koloban ka' anu osombahkon; panyo ola mule' ahi' Belento nompotoukamo butong-Ku.

⁶ Belento madi' situju i koloban anu opotunu; kabai koloban bau pongampuni dosa'.

⁷ Lantas Aku notataemo, ‘Aiyamo na Aku; o Tumpu! Aku toka da mombau anu okahanda'i nu Belento susumo anu tinulismo i uno nu Kitab nu Tumpu mongkona butong-Ku.’ ”

⁸ Momonanyo i Kristus notataemo, “Belento madi' mongkahanda'i koloban, ka' anu osombahkon: Belento madi' situju binatang na okolobanakon ka' opotunu salaku anu osombahkon ka' okolobanakon anu bau pongampuni dosa'.” I Kristus notatae sumo aijo', mau mule' iwi-iwi na koloban aijo' sinombahkonmo susumo koonyo nu atulan nu agama Yahudi.

⁹ Lapas aijo' i Kristus notatae, “Aiyamo na Aku, o Tumpu Allah! Aku toka da mombau anu okahanda'i nu Belento.” Jadi Tumpu Allah nohapusmo iwi-iwi' na koloban anu pininmo aijo', ka' binolosannyomo nu koloban i Kristus.

¹⁰ I Yesus Kristus nombaumo apaa na anu nukahanda'i nu Tumpu Allah ka' butong-Nyo sinombahkonnyomo, salaku koloban. Kalana Ia nonsombahkonmo sumo aijo', ka' Ia nombaumo sumo aijo' ola ninsan sampe toka sidu-sidutu'; kita iwi-iwi' pinobelesi'mo i dosa'.

¹¹ Batu-batu imam nu aha Yahudi mombau kalajanyo salaku imam sansina-sinaa, ka' saja' opo'uli-ulit na ia monsombahkon anu susumo aijo'. Panyo koloban haha aijo' madi' hondo moko alini dosa'.

¹² Panyo i Kristus nonsombahkon poso' sa'angu' na koloban bau pongampuni dosa', ka' koloban aijo' montanggungimo sampe toka sidu-sidutu'. Noko lapas na nonsombahkon koloban aijo', i Kristus sinumuhangmo i sasu koanan nu Tumpu ka' nompalentahmo hingga-hinggat tiba Ia.

¹³ Ka' tempo' uuka i Kristus montanda'imo sampe Tumpu mombaumo to sampo-sampo bali'-Nyo matundu'mo hi Ia.

¹⁴ Jadi anu ola sa'angu' na koloban aijo', i Kristus nompokopianimo to mia-mian anu pinobelesi'mo na dosa'nyo.

¹⁵ Mongkona han aijo' Roh nu Tumpu suele nonsisikakonmo hi kita. Roh nu Tumpu notatae,

¹⁶ “ ‘Aiyamo na palajanjian anu kubaumo hi aha i sina-sinaa anu tokaje mae,’ koonyo nu Tumpu, ‘Ku po'una'je na to atu-atulan-Ku i uno nu kinyonyoa nu aha, ka' Ku tulis i uno nu pikilan nu aha.’ ”

¹⁷ Tumpu mule' notatae, “Ku kolilimimo na to dosa-dosa' ka' anu binaumo nu aha na kalakuan, anu toto ide-idek.”

¹⁸ Jadi to dosa-dosa' ka' anu binaumo nu aha na kalakuan anu toto ide-idek ingampunanmo, sahingga madi'mo palalu osombahkon na koloban bau pongampuni dosa'.

Imbo' da kita mongohani Tumpu

¹⁹ Yo, to utu-utus, kalana i Yesus sinilakamo sumo aijo', kita uuka aiya baanimo na minsoop i Salipi' anu Susi' hondo.

²⁰ Binuka'mo i Yesus na jalan sa'angu' anu bu'ou hi kita, aijo'mo jalan anu mombee'i kantumuu'an. Jalan aijo' montului lalanse', aijo'mo posi butongnyomo i Yesus.

²¹ Ka' kita uuka aiya daagi'mo ko samian na Imam Daka', anu mompangakuimo pakalaja'an i Laigan nu Tumpu.

²² Kalana aijo', imbo' da kita mongohanimo Tumpu ka' kinyonyoanto hodi'mo ka' palesayamo totu-totu'u; ka' kinyonyoanto anu pinosusi'mo ka' madi'mo ko kasala'an o oa'i, ka' butongto pinobelesi'mo nu uee anu molino.

²³ Kita tionyo ahi' mintoongmo hoso-hoson i anu otaha'imaninto, anu ingakuantomo kalana Tumpu timbali opalesaya, ka' apaa na anu jinanji'-Nyomo tionyo ahi' Nupodaagi'.

²⁴ Ka' kita tionyo ahi' mompaha toa-toa samian ka' samian da kita timbali mompaha kake-kakeha'i bau pongkalibosi sangalu ka' mombau hahan anu ma'ima'.

²⁵ Kita tionyo ahi' saja' sihuk hingga-hinggat, ka' boli moluluk susumo mian sangga'at. Ka' kita tionyo ahi' saja' mompaha poho-pohoson kinyonyoa, kalana osumbu'to madi'mo daagi' pin na Tumpu tokamo.

²⁶ Kalana de lele anu totu'u lengkat mae hi Tumpu pinotokamo hi kita, panyo saja' kita mombau dosa' ototonggolakon, saba' madi'mo daagi' ko koloban anu bau pongalini dosa'to.

²⁷ Me sa'a-sa'angu'nyomo na anu daagi' hi kita, aijo'mo mongahopimo pomputusian nu Tumpu, ka' apu nu tambuha'-Nyo anu mongangoti to mia-mian anu mongewa Ia!

²⁸ Mian anu madi' nontuluti atulan anu binee'mo i Musa, o hukum mate madi' ko ampunnyo, de ko sakisimo ohua' kabai totolu' na mian anu mompoto'i tukoonyo ia sinala'mo.

²⁹ Palias na koboatnyo na hukuman anu opokona hi mian anu talalomo monguesani Anak nu Tumpu. Mian aijo' monsangka madi' ko angga'nyo na baso' nu palajanjian nu Tumpu, aijo'mo i Kristus sinilaka da mompobelesi' dosa'nyo. Ia madi' mongangga'i Roh anu momombee'i balakat.

³⁰ Osumbu'to ihe na Ia anu notataemo, “Ku balosije! Ku hukumje!” ka' anu notataemo, “Tumpu momputusije mian anu palesayamo hi ia.”

³¹ Palias na ko sansalanyo de manabu' i lima nu Tumpu Anu Tumuu'!

³² Potutugakon mosia na ka'ada'annyo na to utu-utus i tempo' anu i hikuhakonmo. Tempo'nyo aitu salatan jingka nu Tumpu nonjingkai komiu, komiu nongoa'imo manjoo' hondo na kasansala'an, panyo komiu sabole-bole ahi palesaya totu-totu'u.

³³ Toto minsan komiu pinopo'ambang, ka' lewa' kinabisa'an madi' ma'ima' i ahop nu mian da'isan. Toto minsan komiu suele nongoa'imo sansala tiba aha anu lewa' kinabisa'an susumo aijo',

³⁴ ka' komiu suele lewa'mo nonginau' kasusa'an nu mian anu tinalungku'mo. Ka' tempo'nyo iwi-iwi' na anu miu ingagoanmo, komiu madi' notambuha', kalana osumbu' miu, daagi' ko apa-apaa anu lebe ma'ima' itina' hi komiu anu montahan sampe toka sidu-sidutu'.

³⁵ Mokonyo aijo' opohoson na kinyonyoa, kalana de komiu tataap palesaya, saba' tambonyo nu han aijo' daka' hondo!

³⁶ Komiu palalu sabaan, da komiu moko ala mombau anu nukahanda'i nu Tumpu, sahingga mohumpak anu jinanji'-Nyomo.

³⁷ Kalana i uno nu Kitab nu Tumpu tinulismo, “Madi'mo pin; Ia anu tokaje mae aijo', malia-lia'mo toka; Ia madi'mo montanda'i pipin pa'hipianje na Ia toka.

³⁸ Ka' mian-Ku anu madi'mo ko sala'nyo palesayamo ka' tumuu'mo; panyo de daagi' ko anu aijo' hi aha na anu tolo sule', tantu Aku madi'mo sanang hi ia.”

³⁹ Kita aiya misa' mian anu tolo sule' ka' sala' na jalan. Panyo kita mian anu pinalesayamo hi Tumpu ka' anu pinosalamatmo.