HOSEA 9 - KITAB NU TUMPU ALLA LELE MA'IMAI'

Hukuman anu opokona hi aha mian nu Israel binebakonmo

¹ O bansa Israel, bolimo daagi' molame'akon iwi-iwi' na sinaa daka' nu belemiu susumo to bansa-bansa sangga'at. Belemiu nompala'imo Tumpu nu belemiu ka' madi'mo nontuluti Ia. I tampat pongututan gandum belemiu mompobalukmo butong nu belemiu salaku anu masala' hi pilogot Baal, ka' sanangmo na montalima gandum anu osangka nu belemiu salaku pontamboi mae nu pilogot aijo' hi belemiu!

² Panyo madi'mo daagi pin belemiu kamadi'anmo i gandum tiba lanya' nu zaitun, ka' tiba anggur suele mingkotmo.

³ Belemiu o bansa Israel madi'mo daagi tataap jojoong i tano' anu binee'mo nu Tumpu hi belemiu. Belemiu tionyo ahi' minsusule'mo i Mesir, ka' tionyo ahi' mongkaanmo kaanon anu madi' toho' okaan kiijo' mae i Asyur.

⁴ Ilipu' haha aijo' belemiu madi'mo moko ala monsombahkon anggur tiba koloban binatang salaku bau pomposanang kinyonyoa nu Tumpu. Anu okaan nu belemiu monsaduakonmo belemiu anu nongkaanmo aijo' mahumimi'mo sususmo anu okaan de mombaumo adatnyo kona hi mian anu sinilakamo ka' olamunmo. Anu okaan aijo' ola ahi' da mobosumo padahan mau ola sangkiding madi' ko anu oboa mamba I Laigan nu Tumpu da osombahkon kiijo' mae.

⁵ Tempo'nyo nu sinaa daka' nu agama da moholomatimo Tumpu belemiu madi' moko ala mombau apa-apaa salaku bau polame'akon.

⁶ De balaa' tokamo mae hi belemiu ka' mule' oboamo ilipu' sangga'at saba' anu daagi jinojoong nu posihukmo nu aha mian Mesir da opateimo ka' olamunmo kiijo' i Memfis! Hemput tiba hii' tumuu'mo mae ka' mongkukubimo iwi-iwi' na tampat anu pinombauan nu belemiu laigan tiba bala-balang salaka anu mahan na olinyo.

⁷ Tinokamo mae na tempo'nyo anu pohukumanmo, tempo'nyo nu pontalimanmo balosnyo nu palabuatan nu aha. Nu oa'imo nu Israel! Belemiu nontaloakon, “Nabi anu kinuasanmo nu roh aiya ponga'! Ulawon na ia!” Belemiu nontaloakon sumo aijo' kalana belemiu mongka'ideki mae hondo aku ka' dosa' nu belemiu talalo hondo daka' na koonyo nu nabi aijo'.

⁸ Tumpu nonsai mae aku salaku nabi da mompokinde'i belemiu mian-Nyo, anu palesayamo, panyo maumo ahi' pa' moya paku mamba belemiu mompagala monso'o aku susumo tomonsi'. Ilipu' anu Tumpu na tumpunyo kami to nabi-nabi nu ka'ideki nu mian da'isan.

⁹ Talalo hondo ma'idek na palabuatan nu belemiu sumo anu toho'mo binau nu aha mian Gibea, Tumpu monginau'mo kasala'an nu belemiu ka' mohukumo belemiu kalana dosa' nu belemiu.

Dosa' nu Israel tiba apaa na anu jinadimo

¹⁰ Tumpu notatae, “Momonanyo Aku nongkabot aha mian nu Israel, Aku najama'mo hondo susumo mian anu nohumpakmo bua' nu anggur i padang anu mateges. Momonanyo aku nontoa mompolee' nu belemiu sinanangmo hondo na Aku susumo mian nontoamo bua'nu kau' ara anu ai-aijo'je na nimbua'. Panyo salatan aha nambamo ibungkutnyo nu Peor aha nontampu'unimo nonsombah Baal sahingga aha nahumimi'mo susumo pilogot anu nu nu kalibosi nu aha aijo'.

¹¹ Katalasanggoan nu Israel tontilapmo susumo tomonsi'; madi'mo daagi ko anu poboa ka' madi'mo daagi ko to ana-anak anu ohampeakon.

¹² Panyo maumo ahi' daagi ko to ana-anak anu ohampeakon ka' opodaka'mo, aha po ule' ahi' Ku ala; madi' ko samian pe'e na Ku pobee' tumuu'. Silakamo na belemiu o bansa Israel de Ku pala'imo na belemiu!”

¹³ O Tumpu tinoangkumo na to ana-anak nu aha pinototumputan ka' pinateanmo.

¹⁴ Apaa na anu pantas ahi' ku poita hi Belento da bau pontulungi mian haha aijo'. Pojadiakonmo na to bou-boune nu aha da lengke'mo! Pojadiakonmo da aha madi'mo moko ala momposusu anak nu aha.

Tumpu mohukumo Israel

¹⁵ Tumpu notatae, “Iwi-iwi' na palabuatan anu ma'idek nu aha aijo' lengkat pe'e mae i Gilgal. Kiijo' pe'e mae na Aku nontampu'unimo nongka'ideki aha. Kalana palabuatan nu aha anu ma'i-ma'idek aijo', Kulaa'mo na aha da bolimo jojoong ilipu'-Ku aiya. Madi'mo daagi Ku kalibosi na aha, iwi-iwi' na polaya' nu aha madi'mo nontuluti Aku.

¹⁶ Mian nu Israel Ku hukumo. Aha tinimbalimo susumo sosuanon anu madi'mo mimbua' ka' to baka-bakatnyo nanggasmo. Aha madi'mo mohumpak anak; panyo maumo ahi' aha mohumpak anak Ku pateimo na to ana-anak anu nunu kalibosi nu aha aijo'.”

Nabi notataemo mongkona Israel

¹⁷ Tumpu anu kuku bau na anu nu pokauhakon aijo', madi'mo daagi montalima mian-Nyo anu palesayamo hi Ia, kalana aha madi'mo mongka'oho' montuluti Ia. Aha solidi' mae memo saja' mamba momoya hi to bansa-bansa sangga'at.