HOSEA 7 - KITAB NU TUMPU ALLA LELE MA'IMAI'

¹ Tumpu notatae, “De Aku kahanda'mo mompa alin mian-Ku Israel anu palesayamo ka' po ule'mo mompokopiani kalakuan nu aha, panyo anu Ku toa ola ka'idekan tiba dosa' nu aha. Aha mompaha bale-baleko'i, aha mompinsoopi laigan nu mian ka' mombulingi, ka'aha mongagoi anu nu mian i jalan-jalan.

² Madi' toho' tonginau' i uno nu pikilan nu aha saba' Aku na saja' ahi' monginau' iwi-iwi' na palabuatan anu ma'idek haha aijo'. Panyo iwi-iwi' na dosa' nu aha nongkukubimo aha sahingga nanasamo hondo na Aku nontoa aha.”

Kasangaja'an mombau anu ma'idek i laigan nu tomundo'

³ Tumpu notatae, “Tiba kalakuan nu aha anu talalo hondo baleko' ka' ma'idek aha mian da'isan mompagalamo momposanang kinyonyoa nu tomundo' tiba to paga-pagawe nu pamalentah.

⁴ Aha iwi-iwi' to mia-mian anu ma'idek na palabuatannyo ka' madi' tulu-tulutan. Pongka'ideki nu aha sumomo apu i uno nu tolukun anu madi' opomoak nu aha anu montunu roti salatan ma'isa pe'e opotunu na adonannyo.

⁵ Sinaa pombauanmo bau-bauon i tomundo' tiba to paga-pagawenyo pino inumanmo nu aha anggur sampe aha nalangumo, ka' nombaumo hahan anu ponga'. Ahennyo i tomundo' aijo' binalasanangmo tiba to mia-mian anu palalente.

⁶ Susumo apu iuno nu tolukun sumo aijo'mo ahi' na niat anu ma'idek tiba kapusan nu aha ola nu una' i uno nu kinyonyoa sampahu-pahu, ka' de subu-subumo kinyonyoa nu aha ko suhu-suhutmo timbalimo moak susumo apu anu mapanas hondo.

⁷ I uno nu napisu nu pusa nu aha, aha nompateimo to pola-polaya' nu aha. Iwi-iwi' na tomundo' nu aha pinateanmo toto samian. Panyo maumo sumo aijo' na ka ada'an nu aha madi'mo tinalakana' madi' ahi' ko samian pe'e na balado'a mae hi beleng-Ku momoita tulung.”

Israel tiba bansang sangga'at

⁸ Tumpu notatae, “Bansa Israel nosa'angu'mo tiba to bansa-bansa anu mompaha ohani aha, sahingga aha tinimbalimo susumo roti ola sambiha' nanasasak.

⁹ Madi' sinumbu' nu aha saba' kalana nosa'angu'mo tiba bansa sangga'at haha aijo' sahingga kahosonan nu aha imadi'anmo. Pupusnyo nu aha kinosisikonnyo ohanimo mingkot panyo madi' nu sumbu' nu aha.

¹⁰ Katabuulan nu aha mian Israel nanasamo hondo na otoa ka' tinimbalimo bukuti' nu kasala'an nu aha. Maumo iwi-iwi' aijo' jinadimo panyo aha madi' ahi' molio Aku kabai minsusule' mae hi beleng-Ku Tumpu Allah nu aha.

¹¹ Israel naha lajanganmo mokiijo' ka' mo uuka mae sumomo tomonsi' malapati' anu ponga'. Momonanyo mian haha aijo' nomoitamo bantuan hi aha mian nu Mesir, lapas aijo' aha nalaimo namba i Asyur!

¹² Panyo de aha motulumo Kupokonamo na so'o ka' ohakopmo na aha susumo mian mohakop tomonsi'. Ku hukumo na aha kalana iwi-iwi' na palabuatan nu aha anu ma'idek aijo' sinumbu'-Kumo.

¹³ Silakamo na aha kalana aha nompala'imo Aku. Aha hansunmo kalana aha madi'mo nontuluti Aku. Aku ko kahanda' momposalamat aha panyo aha toka mae monsombah Aku madi' buke-buke' na kinyonyoa.

¹⁴ Aha madi totu tou na balado'a hi edeng-Ku. Kalu aha balado'a aha matimaleo, i tampat kahoyotan, ka tumando susumo anu binau nu mian anu madi palesaya hi beleng-Ku. Kalu aha balado'a mompoita gandum, ka anggur, aha momboyo boyoto butong susumo anu lewa nu bau nu mian anu lewa monsombah pilogot. Aha memang ahi totu touu molawan Aku!

¹⁵ Moumo sumo aijo Aku na nompodoka ka nompohoson aha panyo aha la saja mogoyaya'an molawan mae Aku.

¹⁶ Aha lasaja mombatuki topilo pilogot anu madi kokuasa apa-apaa. Aha madi bisa otahaimani sumo panah anu madi mayontok. To tana tanaas nu aha la saja motatae sombong. Mokanyo aitu aha tionyo opatei nu bajak ka nu kokojoi nu tomia mian nu Mesir.”