HOSEA 5 - KITAB NU TUMPU ALLA LELE MA'IMAI'

¹ Tumpu notatae, “Potombihing mae o to ima-imam! Palahatikan o mian nu Israel. Potombihing mae o to mia-mian lee' nu tomundo'! Hukuman opokonamo hi belemiu. Kalana sabenanyo adin ahi' na belemiu momputusi palakala, panyo belemiu ola mule'ahi' susumo totumban kiijo' i Mizpa ka' susumo so'o i bungkutnyo nu Tabor,

² ka' susumo bolo' anu maleeng kiijo' i Sitim. Kalana aijo' Aku mohukumo belemiu iwi-iwi'!

³ Kusumbu' iwi-iwi' na kalakuan nu belemiu Israel! Madi' bisa na belemiu molahasiakon apa-apaa hi beleng-Ku. Beleyum nonsombahmo pilogot, ka' madi'mo nontuluti Aku. Kalana aijo' belemiu anu jojoong ikiijo' madi'mo daagi nonsombah Aku.”

Pokinde' mongkona palasombahan hi pilogot

⁴ Palabuatan ma'idek anu binaumo nu mian Israel nonsaduakonmo aha madi'mo po ule' namba hi Tumpu Allah nu aha. Aha kinuasanmo hondo nu monsombah pilogot sahingga aha madi'mo daagi nompajuli Tumpu.

⁵ Katabuulan nu mian Israel talalomo hondo inyata' ka' tinimbalimo bukuti' nu kasala'an nu aha. Dosa' nu aha nonsaduakonmo aha tinosumpun ka' notua', ka' bansa Yehuda suele notua'mo tiba aha.

⁶ Aha nambamo nolio Tumpu ka' nomboamo domba tiba sapi' da bau koloban panyo iwi-iwi' aijo' madi'mo kinogunanyo. Kalana Tumpu nompala'imo aha ka' mule' aha madi'mo daagi nompahakabot tiba Ia.

⁷ Aha madi'mo nontuluti Tumpu ka' mule' to ana-anak nu aha misa'mo to ana-anaknyo. Kalana aijo' madi'mo daagi pin na aha ohansunimo tiba iwi-iwi' na ale' nu aha.

Nahampatemo na Yehuda tiba Israel

⁸ Puuhimo na tolompet kiijo' i Gibea! Po'onyi'mo na tanda polaga mahampatemo kiijo' mae i Rama! Poloaismo salaku tanda mahampatemo kiijo' mae i Betel! Soba mian nu Benyamin ahopimo ka' pahampatemo!

⁹ Israel mahungku'mo kalana tinokamo na tempo'nyo pohukumanmo ia. Potombihing mae belemiu mian da'isan nu Israel, han aijo' memang jadimo.

¹⁰ Tumpu notatae, “Aku notambuha'mo kalana to pola-polaya' nu Yehuda nahampatemo nongewamo Israel ka' nongagoimo tano' nu aha. Kalana aijo' Ku bee'imo hukuman na aha susumo iaba'.

¹¹ Israel osakisamo; ia madi'mo ko hak hi tano' nu aha, kalana ia talalomo ahi' nomoita tulung hi aha anu madi' moko ala montulungi ia.

¹² Aijo' na sababnyo sahingga Aku mohansunimo bansa nu aha Israel ka' mule' monsilakaimo aha bansa nu Yehuda.

¹³ Bansa Israel tiba bansa Yehuda sininsumbu'mo i kalakuan nu aha anu ma'i-ma'idek aijo' sahingga Israel nambamo i Asyur momoita bantuan hi tomundo' anu talasanggo. Panyo tomundo' aijo' madi' noko ala nontulungi kabai nompoko ima'i palabuatan nu aha.

¹⁴ Susumo singa montumbuhi sumo aijo'mo na Aku montumbuhi mian nu Israel tiba Yehuda. Posi Akumo na mombea-beak aha lantas Ku pala'imo. De Ku hela'mo na aha mamba madi' ko samian pe'e na moko ala mompolapas aha.

¹⁵ Mian-Ku anu palesayamo Ku pala'imo sampe aha talalomo hondo sansala kalana iwi-iwi' na dosa'nu aha lantas aha molioje Aku. Ku gantang i unoje nu kasusa'an nu aha, aha pagalaje molio Aku.”