HOSEA 4 - KITAB NU TUMPU ALLA LELE MA'IMAI'

Tumpu nontudumo Israel

¹ Tumpu ko palakala tiba mian da'isan i lipu' aiya. O Israel, potombihing pe'e apaa na anu tinaloakon-Nyo, “I lipu' aiya madi'mo daagi' ko anu tulu-tulutan kabai mompaha kali-kalibosi, ka' mian da'isan madi'mo monsumbu' Aku salaku Tumpu Allah.

² Aha binasumpa'mo, panyo aha madi' mongganapi; aha baleko', mompatei, montomang ka' masala'. Palabuatan ma'idek mompaka pintuangmo ka' mompatei saja'mo obau.

³ Kalana aijo' lipu' aiya timbalimo mateges ka' batu-batu anu tumuu' ikiijo' matemo. Batu-batu binatang anu i langa ka' i katano'an ka' i ambai mohopu'mo.”

Tumpu nontudumo aha to imam-imam

⁴ Tumpu notatae, “O to imam-imam, bolimo ko anu mompisala'i kabai montambuha'i mian-Ku anu palesayamo, kalana belemiu ahi' anu Ku pisala'i!

⁵ Sinaa ka' pihi belemiu saja' mombau kasala'an, sumo aijoi'mule' na to nabi-nabi. Kalana aijo' Aku mohansunimo Israel, tina nu beleyum.

⁶ Belemiu to imam-imam, madi' mongadati Aku, sahingga mian-Ku anu palesayamo suele madi'mo mongadati Aku, sahingga aha nohumpakmo balaa'. Belemiu madi'mo montalima to aja-ajalan-Ku. Jadi Aku suele madi'mo montalima belemiu ka' to ana-anak nu belemiu madi'mo Ku talima salaa-Ku to imam-imam-Ku.

⁷ Belemiu mompaka manjoo'mo, mompaka baladosa'mo mule' na belemiu hi beleng-Ku, o to imam-imam! Kalana aijo' kalakuan nu belemiu. Ku babali'imo: Belemiu madi'mo daagi' o holomati, panyo lewa'mo o alu.

⁸ Belemiu kinayamo kalana dosa' nu mian-Ku, anu palesayamo, kalana aijo' belemiu mongka'ima'i da aha saja' baladosa'.

⁹ Sahingga belemiu saja'mo sansala pokakanamo mian da'isan! Ku hukumo na belemiu sitimbang tiba palabuatan nu belemiu.

¹⁰ Belemiu mongkaan to kolo-loloban anu osombahkon, panyo belemiu tataap mo'ohop. Belemiu monsombahmo to pilo-pilogot anu moko polumba', panyo belemiu mian da'isan tataap madi' mintuang, kalana belemiu nohikumo Aku ka monsombahmo, to pilo-pilogot sangga'atan.”

Tumpu nohukumo anu monsomba pilogot

¹¹ Tumpu notataemo, “O mian-Ku anu palesayamo, mau anggur anu pininmo, mau anggur anu salaje nongalinimo kamampuan bapikin ihan anu ma'ima'.

¹² Belemiu nomoitamo da nu potingan nu sangkolong na kau'! Sangkau na tokon mompoto'i hi belemiu apaa na anu nu ka'ima'i nu belemiu da osumbu'! Belemiu sumomo samian na bengkele' anu tinimbalimo anu masala'; belemiu nohikumo Aku ka' nombee'mo butong nu belemiu hi to pilo-pilogot.

¹³ I tampat-tampat ponsomban pilogot i puge'nyo ka' i bungkutnyo belemiu nonsombahkonmo koloban ka' nompapuimo kamangian i patu nu to kau-kau' anu daka' ka' hoopi' nahonnyo kalana ikiijo mae tampat anu koongon. Panyo apaa na ka'ahenannyo? To lalangkoyang nu belemiu nasala'mo, ka' to moni-monian nu belemiu boune nasala'mo!

¹⁴ Panyo Aku madi' mohukum kalakuan nu aha aijo', kalana belemiu suele nambamo hi aha anu masala', anu mokalaja i laigan bau ponsomban tominuat, ka' tiba aha mule' belemiu nonsombahkonmo koloban hi tominuat. Totu'umo na potatae aiya: Bansa anu madi' mangalati' mongkona Tumpu, madi' moko ala tatahan.

¹⁵ O belemiu mian nu Israel, belemiu madi' tulu-tulutan hi beleng-Ku! Panyo, Ku taha'imani Yehuda madi' mombau kasala'an anu sumo aijo! Bolimo mogaleja i Gilgal kabai i Betel. Boli basumpa' ikiijo' mae tiba sanggo nu Tumpu anu tumuu'.

¹⁶ Belemiu o mian nu Israel, talalo hondo panggaga! Mosia na Aku molaya' belemiu susumo domba i hemput padang?”

¹⁷ Mian nu Israel talalomo hondo tinoongan nu pilogot. Kalana aijo' pojohokmo na aha.

¹⁸ Salatan aha malangu'mo kalana monginumo manjoo' na anggur, sanangmo na kinyonyoa nu aha masala'. Aha lebe mongka'ima'i o alu ka' madi' mongka'ima'i oholomati.

¹⁹ Kalana aijo' aha mingkotmo susumo anu nu puhakonmo nu mombun. Aha nohumpak alu kalana iwi-iwi' na koloban nu aha anu sinombahkonmo hi to pilo-pilogot.