HOSEA 14 - KITAB NU TUMPU ALLA LELE MA'IMAI'

¹ Samaria tionyo ahi' ohukumo kalana notomuhukmo madi'mo nohongo-hongo Aku. Mian da'isan nu aha saidi' mae mohopu'mo i uno nu pahampatean; to ana-anak anu daagi bungamea osilakaimo ka' to bou-boune anu hau-haunyo poboa obiha'mo na kompong nu aha.”

Pinoita i Hosea da Israel balatobatmo

² Pinsusule'mo mae hi Tumpu na belemiu o bansa Israel! Dosa' nu belemiu nonsaduakonmo sahingga belemiu tinompaleda'mo ka' tinombahangkangmo.

³ Pinsusule'mo mae hi Tumpu ka' pongkakaase do'a salaku palasombahan nu belemiu hi Ia, otaloakon sumo uuka: “O Tumpu ampuniakon mae na dosa' mami ka' talimakon iwi-iwi' na do'a mami aiya, da kami mompuji'mo Belento susumo anu jinanji'mo mami.

⁴ Asyur madi' moko ala momposalamat kami, ka' ajahan anu bau pahampate suele madi' ahi' moko ala montulungi kami. Kami madi'mo daagi motatae hi to pato-patong nu pilogot anu pinosi bau mami, anu osangka mami aijo'mo na Tumpu mami. O Tumpu Belento mongkalibosi to mia-mian anu madi' ko anu nu taha'imani nu aha maumo pa' ihe.”

Tumpu nonyanyiakonmo hi aha Israel da po ule'mo obali'i na kantumuu'an

⁵ Tumpu notatae, Mian-Ku anu palesayamo nonoteba'mo na kalakuannyo po ule'mo Ku ala, ka' kinyonyoang-Ku totu-totu'u mongkalibosimo aha madi'mo daagi Ku tambuha'i.

⁶ Kona hi aha mian nu Israel Aku sumo ujan anu mohumpisimo tano' nana tegesmo. Aha po ule'mo timboka susumo buhak nu kau' ka' susumo kau' cemara anu bakatnyo maleeng.

⁷ Aha po ule'mo tumuu' ka' mompaka pintuangmo susumo sosu'anon anu minsumpemo iyaya mae na tampat. Ko ima'nyo sumomo ahi' kau' zaitun manohong sumo kau' cemara!

⁸ Aha po ule'mo mae minsusule' hi beleng-Ku ka aha Ku jagaimo. Ka' malia'mo hondo na aha mohumpak kasanangan i uno nu kantumuu'an nu aha sumomo gandum tumuu' i ale' anu tano'nyo ma'omuk, ka' susumo ale' nu anggur susumo uee nu anggur nu Libanon sanggo nu aha talasanggomo i yaya mae.

⁹ Mian nu Israel mongalinmo iwi-iwi' na patong nu pilogot nu aha aha Ku jagaimo ka' mule' Ku talimamo na do'a nu aha. Susumo kau' anu tambok na honnyo, Kujagaimo na aha. Akumo na polengkatan mae nu balakat, iwi-iwi' anu nu humpak nu aha. Akumo na Tumpu anu notataemo.

Pontudui sisik

¹⁰ O'amalakon da iwi-iwi' na mian anu pande, mompangalati'i apaa na anu tinulismo aiya ka' saja' ahi' mompalahatikan. Iwi-iwi' na anu pinotiju'mo nu Tumpu aijo' memang totu'u ka' mian anu palesayamo hondo-hondo tionyo ahi' montuluti apaa na anu pinotiju'mo haha aijo'. Panyo mian anu binaladosa'mo na madi' ahi' montapali sahingga tinompaleda'mo ka' tinombahangkangmo.