HOSEA 13 - KITAB NU TUMPU ALLA LELE MA'IMAI'

Kaputusanmo mongkona hukuman nu aha Israel

¹ Naipuan mae tulunan nu bansa Efraim o'angga'i hondo sahingga de kopalentahmo lengkat mae hi tulunan nu bansa aijo' to tulu-tulunan nu bansa sangga'at i Israel mabuhukmo. Panyo tulunan nu bansa Efraim binaladosa'mo, kalana nonsombahmo Baal.

² Sampe uuka aiya to mia-mian nu Efraim haha aijo' daagi saja mobau dosa' kalana aha nombaumo iwi-iwi' na patong salaka da osombah – patong anu tinanga'an nu akan nu mian ka' binau nu lima nu manusia. Aha notatae, “Sombahkonmo na koloban hi patong haha aiya!” Madi' minsoop i akan na mian mongooki patong anak nu sapi'!

³ Kalana aijo' mian haha aijo' ihopu'anmo susumo sehu' kabai susumo dondu'ok daagi subu-subu. Aha saidi' mae sumomo abu' nu tangke nu gandum anu nu puuhimo nu mombun aijo' itampat pongututan gandum ka' mule' sumomo tibuk anu mosabat mae ipipa nu tibuk.

⁴ Tumpu notatae, “Akumo na Tumpu nu belemiu anu nomboamo mae belemiu nosabat lengkat i Mesir. Belemiu madi' ko Tumpu ola ahi' samata-mata Aku. Samata-mata Aku na anu nomposalamat belemiu.

⁵ Itano' anu mateges ka' mule' i padang anu ewa, Akumo na anu nonjagai belemiu.

⁶ Panyo salatan belemiu jinojoongmo i lipu' anu ma'ima ka' belemiu nobosumo ka' na osamo, belemiu tinakabunmo lantas nongkolilimimo mae Aku.

⁷ Kalana aijo' Ku hakopmo na belemiu susumo singa, susumo macan tutul. Ku tumbuhimo na belemiu i jalan.

⁸ Ku sa'umo na belemiu susumo beruang anu no lapusmo na anaknyo. Ku bea-beakmo na belemiu. Susumo singa Ku sa'umo na belemiu itampat nu belemiu, ka' susumo binatang anu bahangihi' mombea-beakmo butong nu belemiu.

⁹ Ku hansunimo na belemiu bansa Israel! Ka' ihemo ahi' na moko ala montulungi belemiu?

¹⁰ Belemiu momoitamo tomundo' tiba anu bau polaya' nu belemiu, panyo iyamo na aha uuka iwi-iwi'? Pa' timbali na aha moko ala momposalamat belemiu mian da'isan?

¹¹ Notambuha' na Aku nombee'i tomundo' hi belemiu ka' notambuha' mule' na Aku po ule' nongalini tomundo' atina' hi belemiu.”

¹² Tumpu notatae, “Dosa' tiba kasala'an nu aha Israel tinulismo ka' tulisannyo aijo' inguna'mo.

¹³ Israel daagi ko kasampatan na tumuu' panyo aha talalo hondo ponga', sahingga madi' monggunakon kasampatan aijo'. Ia sumomo bunga mea' anu sasaidi' uuka hampemo, panyo madi' mongka oho' mosabat mae aijo' i ma'alum nu tinanyo.

¹⁴ Bansa aiya madi'mo Ku posalamat i kakuasa'an nu dunia nu mian anu sinilakamo. O kasilaka'an loloakonmo na panyakit anu molele! Baumo na pakalaja'an nu beleyum anu lewa-lewa' mohansuni aijo'! Aku madi'mo daagi' mongkalibosi bansa aiya.

¹⁵ Naumo Israel sinanangmo na kantumuu'an nu aha susumo hemput anu molumba' panyo Ku pokauje na mombun nu kabete'an anu mapanas hondo lengkat mae i padang anu mateges. Mombun aijo' na montiisi iwi-iwi na mata nu uee tiba to bubu-bubung. Sahingga manggasmo iwi-iwi' na anu mahan na olinyo.