HOSEA 12 - KITAB NU TUMPU ALLA LELE MA'IMAI'

Israel tiba Yehuda binee'anmo hukuman

¹ Tumpu notatae, “Bansa Israel montikubi mae Aku padahan baleko' ka' mongakali; bansa Yehuda tataap panggaga hi belengku Tumpu Anu Susi ka' manonong.

² Iwi-iwi' apaa na anu binaumo nu bansa Israel lengkat pe'e daagi' subu sampe malom madi' ko gunanyo ka' saja' ko kinyonyoa mompatei susumo mombun nu kabete'an. Katageo'an tiba kabuhingisan ko sida-sidanyomo aijo' hi aha. Aha sola'mo mombau palajanjian tiba Asyur ka' momboa lanya' i Mesir salaku tanda mompahabela'mo.”

³ Tumpu ko palakalamo hi aha bansa Yehuda; Ia suele mohukumo Israel kalana palabuatan nu aha. Ia mombalosakonmo palabuatan nu aha.

⁴ Daagi' pe'e i uno nu ma'alum i Yakub mompolee' nu aha nongagoimo i Esau utusnyo anu hapi-hapi'nyo aijo'; ka' salatan dinaka'mo i Yakub nahaluku'mo tiba Tumpu.

⁵ Ia nahaluku'mo tiba samian na malaekat ka' ia na nohungku'i. Lantas ia ihumangmo ka' nomoitamo da obalakati. Lapas aijo' kiijo' i Betel Tumpu tinokamo hi Yakub mompolee'to ai-aijo' ka' notataemo hi ia.

⁶ Tumpu aijo', aijo'mo na Tumpu Anu Daka' hondo na Kuasanyo. Sanggonyo aijo'mo Tumpu. Tiba sanggo aijo' Ia mongkahanda'i da mian monsombah Ia.

⁷ Kalana aijo' belemiu lee'i Yakub palesaya ahi' na Tumpu nu belemiu ka' po ule' mamba mae hi Ia. Tumuu'saja' mongkalibosi ka' madi' tageo' na kinyonyoa, ka' saba-sabaan ahi'na montanda'i da Tumpu je ahi' na montantukan apa-apaa.

Kaputusan anu saidi'mae opokona na hukuman hi aha Israel

⁸ Tumpu notatae hi aha bansa Israel, “Belemiu tageo' na kinyonyoa sumomo mian nu Kana'an; to pada-padagang nu belemiu saja' mongakali mian anu lewa mongoli hi belemiu balang, mompake timbangan anu madi' totu'u.

⁹ Kita uuka aiya kinayamo na koonyo nu aha. ‘Kita inguntungmo! Madi' ko samian pe'e na anu monsangka tukoonyo kita nohumpak kakaya'an kalana katageo'anto'.’

¹⁰ Panyo Aku, Tumpu nu belemiu anu nomboamo mae belemiu nosabat lengkat i Mesir po ule' mule' mompojoong belemiu i to kema-kemah susumo naipuan mae tempo'nyo Aku tinoka hi beleyum i padang anu mateges.

¹¹ Aku notataemo hi to nabi-nabi, ka' nompotoamo manjoo' hondo na anu tinoa hi aha. Aku nompakemo aha da mompoto'i iwi-iwi' na tanga'an-Ku kona hi belemiu mian-Ku anu palesayamo,

¹² maumo sumo aijo' panyo daagi' ahi' ko anu monsombah pilogot kiijo' i Gilead, ka' monsombahkon sapi' i mezbah kiijo' i Gilgal. Panyo aha anu monsombah pilogot aijo' matemo ka' mezbah haha kiijo' i Gilgal timbalimo tambulan nu batu isongko-songko na ale'.”

¹³ I Yakub mompolee'to nopalaimo namba i Mesopotamia, lantas da timbali mohumpak bengkele' ia nomoitamo da bau posaihon hi aha mian anu kiijo' mae ka' lewa'mo nolaya' domba nu mian aijo'.

¹⁴ Tumpu nompokaumo samian na nabi da momboa mian nu Israel mosabat da bolimo obotuani kiijo' i Mesir ka' da ojagaimo na aha.

¹⁵ Mian nu Israel Nonsaduakonmo da notambuha'mo hondo na Tumpu; aha tionyo ahi' ohukumo kalana palabuatan nu aha anu ma'idek aijo'. Tumpu nohukumo aha aijo' kalana nonsaduakonmo mian nongalumo Ia.