HOSEA 10 - KITAB NU TUMPU ALLA LELE MA'IMAI'

¹ Israel sumomo kau' anggur anu mahampe na bua'nyo. Mompaka panjoo' na kakaya'annyo, mompaka panjoo'mule na mezbah anu nu bau nu aha. Mompaka sanangmo na kantumuu'an nu aha ka' mompaka pa'ima' mule' na aha mombau to pato-patong nu pilogot anu nu sombah nu aha.

² To mia-mian anu kinyonyoanyo tageo' aijo' uuka aiya montanggung ahi' dosa'nyo. Tumpu Allah mohansunimo mezbah nu aha ka' montua' akonmo patong nu pilogot nu aha.

³ Madi'mo daagi pin aha motataemo, “Kita madi'mo ko tomundo'nyo kalana kita madi'mo nabuhuk hi Tumpu. Apaa na gunanyo samian na tomundo' hi kita?”

⁴ Talalomo nolabi-labi na leko' nu aha ka' binalajanji'mo anu madi' totu'u ka' nombaumo mule' palajanjian anu madi' kogunanyo. Atulan gineo-geo'akonmo sahingga palabuatan anu madi' adin tinumuu'mo susumo sosu anon anu ko lasungnyo i uno nu ale' anu pinansunmo.

⁵ Mian anu jojoong kiijo' i kota Samaria mabuhukmo; aha tiba to ima-imam anu mongulus sapi' mosoni' kiijo' i Betel molibosmo ka' lewa'mo humang kalana kaholomatan nu pilogot nu aha aijo' imadi'anmo.

⁶ Pilogot aijo' oboamo i Asyur da opalasenakonmo hi tomundo' anu talasanggo aijo'. Israel nontulutimo tanga'an anu nonsaduakonmo da nohumpak ambang ka' mule' kinokojoanmo.

⁷ Samaria hansunmo ka' tomundo'nyo oboamo susumo sangkolong na kau' anu inganjuhakonmo nu uee.

⁸ Tampat-tampat anu ponsomban pilogot anu aita maei to bungku-bungkutnyo nu Betel tampat nu aha mian Israel monsombah pilogot ohansunimo. Hii' tibaa hemput tumuu'mo i mezbah nu aha. Lantas aha moloboo'imo to bungku-bungkutnyo, “Tabuhimo mae na kami!” Ka' hi to puge-puge'nyo, “Tuda'mo mae na kami!”

Israel binee'anmo hukuman

⁹ Tumpu notatae, “Salatan kinokajadianmo kiijo' i Gilgal mian nu Israel madi'mo ahi' nontibahakon palabuatan dosa' ka' pinanggagamo hi belengku. Mokonyo aijo', kiijo' mae suele i Gibea aha nu pahampateakonmo nu bansa sangga'at.

¹⁰ Aku montumbuhimo to mia-mian anu baladosa' haha aijo' ka' mule' mohukumo aha. To bansa-bansa mosa'angu'mo mongewa aha, ka' aha ohukumo kalana dosa' nu aha anu nanjoo'mo hondo aijo'.

¹¹ Naipuan mae Israel sumomo sapi' anu daagi' bata'nyo anu ingajanmo ima-ima' ka' nongka'ima'imo mongutut gandum. Aku madi'mo palalu mompokona pasangan itundunnyo anu ma'ima' aijo'. Panyo uuka aiya Aku mongalamo kaputusan da opakisamo na aha mokalaja anu toto maha-mahan. Yehuda Ku pokaumo mompajeko, ka' Israel mule' Ku pokaumo mompolata tano' anu pinajekomo.

¹² Aku motatae, ‘O Israel! Pombau ale' na beleyum anu salaje obuka nu belemiu, sauimo bine' nu ka adilan ka'o padak na balakat, bukutinyo beleyum mongka'ima'i mae Aku totu-totu'u. Kalana tempo'nyomo na beleyum molio mae Aku, Tumpu nu beleyum. Aku tokamo mae ka momponjoo'mo balakat-Ku hi belemiu.’

¹³ Panyo beleyum nombaumo anu sabenannyo misa' aijo' na obau; beleyum ola nombau palabuatan anu ma'idek ka' nompadakmo palabuatan anu madi' adin. Beleyum nongkaanmo bua'nyo nu palabuatan hasin nu kabaleko'an nu beleyum.” Tumpu notatae mule', “O bansa Israel, kalana belemiu montakabunakonmo kareta haha aijo' anu opake mahampate ka' mule' konjoo'nyo nu suludadu nu belemiu,

¹⁴ jadi mian da'isan nu belemiu ko anumo mae mompahampateakon ka' iwi-iwi' na benteng nu belemiu hansunmo. Balu-balu'nyo sumomo tempo'nyo i Tomundo' Salman nono hansunimo kota' Bet-Arbel tempo'nyo aha nahampate, ka' nompateimo to tina-tina nu anak tiba to ana-anaknyo.

¹⁵ Aijo'mo na anu jadi hi belemiu o mian anu jojoong i Betel, kalana belemiu nombaumo palabuatan anu talalomo ma'idek. Salatan sinaa montampu'unimo mae bete' madi' pin de mahampatemo, saba tomundo' nu belemiu silakamo.”