HOSEA 1 - KITAB NU TUMPU ALLA LELE MA'IMAI'

¹ Aiyamo na potuunon anu binee' nu Tumpu hi Hosea anak i Beeri tempo'nyo kalaja'an Yehuda pinalentah i Tomundo i Uzia, i Yotam, i Ahas, ka' i Hizkia, ka' kalaja'an Israel pinalentah i Yerubeam anak i Yoas.

Bengkele' i Hosea tiba to ana-anaknyo

² Tempo'nyo Tumpu notatae, momonanyo hi bansa Israel, anu pinotokakonku, Tumpu notatae, “Hosea, osoaimo na samian anu mongka'oho' saja' masala' ka' to ana-anak nu beleyum suele timbali sumo ia. Mian-Ku anu palesayamo pokakanamo sumo bengkele' nu beleyum aijo'; aha atina' madi' tulu-tulutan hi beleng-Ku ka' ola ahi' mompala'i Aku.”

³ Sahingga aku nongosoaimo samian na boune sanggonyo i Gomer anak i Diblaim. Salatan ia nompohampemo anak anu momonanyo, samian na anak mo'ane

⁴ Tumpu notataemo hi belengku, “Sanggohi na anak nu beleyum aijo' i Yizreel kalana madi'mo pin Aku mohukumo tomundo nu Israel kalana palabuatan i Yehu nompateimo mompolee'nyo kiijo' i Yizreel. Aku madi'mo mompobee' lee' i Yehu na mompalentah.

⁵ Tempo'nyo aijo' i Bangka'nyo nu Yizreel Aku nohansuni mo kahosonan nu suludadu nu Israel.”

⁶ Lapas aitu bengkele'ku aijo' nompohampemo anak anu ko ohua'nyo, anak boune. Tumpu notataemo hi belengku, “Hosea, sanggohi na anak nu beleyum aijo', ‘Anu Madi' Okalibosi’, saba' Aku madi'mo mongkalibosi mule' bansa Israel, ka' madi'mo hondo-hondo mongampuni aha.

⁷ Panyo bansa Yehuda Ku kalibosimo. Aku Tumpu, Tumpu nu aha momposalamatmo aha, panyo misa' kalana mahampate, ka' suele misa' kalana bajak, kabai pana', kabai ajahan ka' anu monsake'i.”

⁸ Salatan anak mami anu ko ohua'nyo madi'mo nonsusu bengkele'ku nompo'ule'mo pinoboa lantas nompohampemo samian na anak mo'ane.

⁹ Tumpu notataemo hi belengku, “sanggo hi na anak nu beleyum aijo' ‘Misa' mian anu palesamo hi beleng-Ku’ saba' mian nu Israel misa'mo mian-Ku anu palesaya, ka' Aku misa'mo Tumpu nu aha.”

Ka'ada'an nu aha Israel po'ule'mo opoko ima'i

¹⁰ Bansa nu Israel timbalimo na konjoo'nyo sumo bone' i ambai, sahingga madi' opo ka ala otakan kabai o lekeng. Uuka aiya Tumpu motataemo hi aha, “Belemiu misa'mo mian-Ku anu palesayamo,” panyo tokaje na tempo'nyo. Ia notataeje hi aha, “Akumo na Tumpu anu tumuu' ka' belemiumo na to ana-anak-Ku!”

¹¹ Bansa Yehuda tiba bansa Israel oposa'angu'mo mule'. Aha po'ule'mo mohangkat samian bau polaya', ka' aha timbalimo da'isan ka' sanangmo mule' i lipu' nu aha. Memang Sinaa nu Yizreel tinimbalimo sinaa anu opopodaka'!