HABAKUK 2 - KITAB NU TUMPU ALLA LELE MA'IMAI'

Tumpu nontaamimo i Habakuk

¹ Aku mongka'oho'mo moliba' mokiita' ilaigan tangka-tangkas anu bau pontanggalakonan mian ka' montanda'i apaa na anu kahanda' nu taloakon nu Tumpu hi belengku ka' mosia na pontaami-Nyo mae poitaonku aiya.

² Tumpu nontaami mae aku sumo uuka, “Tulis ima-ima' isahompak na tano' pinto ka' opotalang ahi' apaa na anu Ku poto'i hi beleyum da dengke na mombasa'.

³ Tulis na aijo' kalana uuka aiya misa' pe'e tempo'nyo. Panyo tempo'nyo aijo' malia'mo mae toka ka' apaa na anu pinoto'ing-Kumo hi beleyum aijo' totu-totu'u tionyo jadi. Maumo aijo' o oa'i daagi pin, panyo tanda'imo! Tempo'nyo aijo' memang ahi' tokamo ka' madi'mo daagi opo edok.

⁴ Ka' o ingat: Mian anu ma'idek na kinyonyoanyo madi' salamat, panyo mian anu mombau pongka'oho' nu Tumpu saidi' mae tumuu' kalana ia tulu-tulutan hi Tumpu.”

Kutukan kona hi mian anu ma'idek na kinyonyoanyo

⁵ Kakaya'an aijo' saja' mongakali mian. Mian anu mangaluk aijo' takabun ka' madi' tenda na ko huhusa. Susumo kasilaka'an ia suele madi' toho' ma'osa; bansa toka isa'ngu' na bansa kinuasannyomo.

⁶ Panyo iwi-iwi na anu pinatundu'nyomo aijo' saidi' mae lewa'mo monsisik han anu ma'idek ka' mule' lewa'mo mongalu. Aha motatae, “Kinutukan na beleyum kalana montambun balang anu misa' belemiu na tumpunyo! Daagi hipian na kopinnyo na beleyum mompokaya butong nu beleyum anu lewa'mo mompakisa to mia-mian anu kosamaya'nyo hi beleyum da bau pombayan samaya nu aha?”

⁷ Panyo madi' nu sumbu' nu beleyum na beleyum atina' nompatundu'mo mian sangga'at, saidi' mae suele ko samaya'mo ka' opakisamo da mombayan bunganyo. Iwi-iwi' na sampo bali' nubeleyum tokamo mae ka' okabuhukmo nu beleyum. Nu pahuhuakonmo nu aha na halata' nu beleyum.

⁸ Beleyum lewa'mo nompahuhuakon manjoo' na bansa-bansa, panyo sagala bansa anu madi' pinoko ala pinatundu' nu beleyum saidi' mae mompahuhuakon beleyum, kalana lewa'mo beleyum nompatei ka' kalana talalomo hondo na beleyum sininggi hi aha to lipu-lipu' ka' mule' hi to kota-kota' ka' hi miannyo anu jojoong ikiijo'.

⁹ Kinutukan na beleyum! Beleyum nompokayamo auan nu beleyum nu kauntungan anu i humpak nu beleyum kalana nompakisamo, da laigan nu beleyum amanmo ka' madi'mo ko kasusa'an ka' mule' balaa' anu montokai mae.

¹⁰ Panyo tanga'an nu beleyum aijo' ola ahi' monsaduakon da ma'ambang na auan nu beleyum. Kalana lewa'mo nompahuhui manjoo' na bansa, beleyum nosi polugi'mo butong nu beleyum.

¹¹ Ka' mule' iwi-iwi' na batu anu aijo' i pagan mesen motataemo daka-daka' montotobi'akon beleyum, ka' iwi-iwi' na ohi' nu laigan mombebakonmo potatae aijo'.

¹² Kinutukan na beleyum! Kalana palabuatan nu beleyum ma'i-ma'idek atina' sahingga noko alamo nombau kota'. Ka' nombau atina' lewa' nompatei mian.

¹³ Iwi-iwi' na bansa anu pinatundu'mo nu beleyum pagala binala usaha panyo madi' kinogunanyo, ka' iwi-iwi' na anu pinotinjonyo nu aha ola ningkot notoyo' nu apu. Iwi-iwi' aijo' pongka'oho' nu Tumpu Anu Daka' na kuasanyo.

¹⁴ Panyo susumo ambai pinobuke'anmo nu uee sumo aijo'mo na dunia aiya pinobuke'anmo nu ilimu' mongkona Tumpu tiba mule' ahi' kakuasa'an-Nyo.

¹⁵ Kinutukan na beleyum! Beleyum nongalumo ka' nompopo'ambangmo mian anu mompaha ohani laigan nu beleyum; binau nu beleyum na aha, da nahasasungonanmo susumo mian anu nalangumo.

¹⁶ Uuka aiya tinokamo na tempo'nyo hi beleyum da o'ambangimo, misa' da oholomati. Kaholomatan nu beleyum timbalimo anu madi' oholomati. Nu pakisamo nu Tumpu na beleyum monginum aijo' igalas anu ingisianmo hukuman da obee' hi beleyum. Nuinumo nu beleyum ka' mahasungonanmo.

¹⁷ Tinaa'anmo nu beleyum na kau' i unu nu kuhat nu Libanon ka' uuka aiya beleyumo na otaa'. Beleyum lewa'mo nompatei binatangnyo ka' uuka aiya to bina-binatangmo na mompopobuhuk beleyum. Iwi-iwi' aijo' jadimo kalana lewa'mo nompatei na beleyum ka' lewa'mo nombau palabuatan anu buhingisin hi to lipu-lipu' ka' mule' hi to kota-kota' ka' hi mian anu jojoong ikiijo'.

^18-19 Kinutukan nabeleyum! Beleyum notataemo hi sangkolong na kau', “Pobulamo!” kabai hi batu anu daka' hondo, “Tinjomo!” Te moko ala na patong sa'angu' montaeakon apa-apaa hi beleyum? Maumo patong aijo' ilapisan nu mosoni' tiba salaka, panyo madi' ahi' ko nyawanyo. Apaa na gunanyo patong nu pilogot? Aijo' ola manusia na nombau. Anu nu humpak hi ia ola ahi' anu madi' totu'u. Ola palasuma na kapalesaya'an nu mian anu mombau bapilogotan anu pinosi bau nu limanyo anu madi' moko ala motatae aijo'.

²⁰ Tumpu kiijo' i uno nu Laigan-Nyo anu susi'; tionyo ahi' iwi-iwi' na mian i dunia aiya boli manjoo' na katalangan i ahop-Nyo.