GALATIA 3 - KITAB NU TUMPU ALLA LELE MA'IMAI'

Atulan nu agama kabai palesaya hi Kristus

¹ To Utu-utus mian nu Galatia! Komiu talalo hondo ponga'! Pa' ihe na nonsale'i komiu? I Kristus sinilaka kalana sinalib pinotalangkumo sahondo-hondonyo hi komiu!

² Soba poto'i mae hi belengku sa'angu' na han aiya: Pa' komiu nontalimamo Roh nu Tumpu kalana nompojalanmo atulan nu agama, kabai o kalana komiu nohongomo Lele Ma'ima' lengkat mae hi Tumpu ka' palesaya hi Kristus?

³ Kadaka' komiu sumo aijo' na koponga'nyo! Komiu montampu'unimo tumuu' bu'ou tiba Roh nu Tumpu, kadaka' uuka komiu montokaimo anu lebe ma'ima' na oposi usahakonmo nu kahosonanum?

⁴ Te ola palasuma na iwi-iwi' anu ingoa'anmo miu aijo'? Te ola palasuma!

⁵ Tumpu nombee'mo Roh-Nyo hi komiu ka' nompodaagi'mo anu okabangangi atina' hi komiu. Te Tumpu mombau aijo' kalana komiu mompojalan atulan nu agama kabai kalana komiu nohongomo Lele Ma'ima' aijo' ka' palesaya hi Kristus?

⁶ Aijo' pokakana sumo anu tinulismo i uno nu Kitab nu Tumpu Allah mongkona i Abraham – sumo uuka, “I Abraham palesaya hi Tumpu, ka' kalana palesayanyo aijo', ia tinalima nu Tumpu Allah sumo mian anu momposanang kinyonyoa nu Tumpu.”

⁷ Jadi tionyo komiu sinsumbu' saba' mian anu totu-totu'u lee' mae i Abraham, atina'mo na mian anu palesaya hi Tumpu.

⁸ Kitab nu Tumpu nontoamo momonanyo saba' Tumpu mompobee' to mia-mian misa' Yahudi mompo'ule'mo ma'ima' tiba Tumpu Allah, de aha palesaya hi Ia. Lele Ma'ima' aijo' pinoto'imo momonanyo hi Abraham i uno nu anu jinanji'mo sumo uuka, “Kalana beleyum, Tumpu mombalakatije iwi-iwi' na manusia i dunia aiya.”

⁹ I Abraham palesaya sahingga ia binalakatan. Sumo aitu mule' iwi-iwi' na mian palesaya, nubalakatije pokakana sumo i Abraham.

¹⁰ To mia-mian anu talalomo nontaha'imani atulan nu agama, iwi-iwi' tumuu' i uno nu kutuk. Kalana i uno nu Kitab nu Tumpu tinulismo, “Mian anu madi' tulu-tulutan mompojalan iwi-iwi' anu tinulismo i uno nu Kitab Atulan nu Agama, nu kutuki nu Tumpu!”

¹¹ Madi' ko samian pe'e na anu mompo'ule' ma'ima' tiba Tumpu Allah ola kalana mompojalan atulan nu agama. Han aijo' pinonyata'mo i uno nu Kitab nu Tumpu, “Ola mian anu palesaya hi Tumpu, sahingga pompahasumbu'annyo tiba Tumpu timbali mompo'ule' ma'ima', atina' yo tumuu'!”

¹² Panyo atulan nu agama madi' mimpu'u i kapalesaya'an anu totu-totu'u. I uno nu Kitab nu Tumpu tinulismo tukoonyo mian anu mompojalan atulan nu agama, timbali tumuu' kalana atulan aijo'.

¹³ Panyo i Kristus nompobebasmo kita da boli nu kona nu kutuk ola kalana atulan nu agama. Ia nombau han aijo' nompopilayamo butong-Nyo kinutukan kalana monginau' kita. Kalana i uno nu Kitab nu Tumpu tinulismo, “Kinutukanmo na mian anu sinilakamo pinokalayo' i ohi' kau'.”

¹⁴ I Kristus nombau sumo aijo' da balakat anu jinanji'mo nu Tumpu hi Abraham obee' suele hi to mia-mian anu misa' Yahudi. Tiba jalan anu sumo aijo' kita suele palesayamo hi Tumpu Allah, timbali mohumpak Roh anu jinanji'mo nu Tumpu.

Atulan nu agama kabai anu jinanji'mo nu Tumpu

¹⁵ To Utu-utus! Soba da aku mombau sonto' i han anu ingoa'anmo sansina-sinaa. De mian nojanji'mo ka' janji' aijo' ingakuanmo, saba' madi' ko samian pe'e na timbali mombahakon anu jinanji'mo aijo', kabai montuangi apa-apaa mule' hi ia.

¹⁶ Anu jinanji' nu Tumpu, binau nu Tumpu kona hi Abraham ka' kona hi mian lee' i Abraham. I uno nu Kitab nu Tumpu Allah madi' tinulis “ka' tona hi to mia-mian lee' i Abraham”, anu alati'nyo manjoo' na mian. Anu tinulis i kiijo' ola “ka' toka hi mian lee' nu beleyum”, alati'nyo ola sami-samiannyomo atina'mo i Kristus.

¹⁷ Anu kahanda' kupoto'i aiya: Janji' nu Tumpu binaumo ka' ingakuanmo imoonanyo. Atulan nu agama anu binee' 430 mo na taun noko lapas na aijo' madi' timbali momadi'akonmo anu ingakuanmo ka' mohapusmo anu jinanji'mo nu Tumpu aijo'.

¹⁸ Kalana de anu binee'mo nu Tumpu mimpu'u i atulan nu agama, saba' anu binee'mo aijo' misa'mo anu jinanji'. Panyo kalana Tumpu noko janji'mo hi Abraham, sahingga Tumpu nombee'mo aijo' hi ia.

¹⁹ Desumo aitu, bau apaa na atulan nu agama anu binee'mo? Salaku bau pontaami, saba' atulan aijo' pinotuangmo da bau momponyata' manusia sinala'mo. Atulan nu agama aijo' opake ola, de ma'isa pe'e toka na samian anu lee' mae i Abraham, anu sinanggo i uno nu janji' nu Tumpu hi Abraham. Atulan nu agama aijo' pinotokakon nu to mala-malaikat nompake samian na manusia.

²⁰ Jadi, tionyo ua aha na anu binajanji' na mian, atina'je ka' palalu ko sansamianan anu mompotoka hi samian ka' hi samian. Panyo Tumpu madi'mo nompalalui anu mompotoka hi samian ka' hi samian, kalana posi Iamo na mombau pakalaja'an aijo'.

Gunanyo nu atulan nu agama

²¹ Ugaat aijo' alati'nyo saba' atulan nu agama mompaha sala' tiba anu jinanji'mo nu Tumpu? Tantu ahi' madi'! Kalana de atulan nu agama binee' da mombee'i kantumuu'an hi manusia, sahingga manusia timbali mompo'ule' ma'ima' tiba Tumpu kalana atulan nu agama.

²² Panyo i uno nu Kitab nu Tumpu tinulismo, iwi-iwi' na manusia daagi' i uno nu kakuasa'an nu dosa'. Mokonyo aijo', anu obee' jina-jinanji'mo mimpu'u i palesaya hi Yesus Kristus obee' aijo' hi aha anu palesayamo.

²³ Ma'isa pe'e tinoka i tempo'nyo da palesaya hi Kristus, kita jinaganmo hondo nu atulan nu agama; kita sumomo anu kinulungmo sampe palesayanto aijo' anu totu-totu'u hondo oponyata'mo.

²⁴ Tiba jalan anu sumo aijo', atulan nu agama timbalimo sumo ponjagai kita sampe i Kristus toka da mombau kita mompo'ule'mo ma'ima' tiba Tumpu kalana kita palesayamo hi Kristus.

²⁵ Uuka aiya, kalana tempo'nyomo na manusia da palesayamo hi Kristus, sahingga kita madi'mo ojagai nu atulan nu agama.

²⁶ Kalana komiu pinalesayamo hi Kristus Yesus, sahingga komiu nosa'angu'mo tiba ia; ka' kalana aijo', komiu timbalimo to ana-anak nu Tumpu.

²⁷ Komiu iwi-iwi' pinalamandikanmo nu sanggo i Kristus, jadi komiu nontalimamo i butong miu sipat-sipat i Kristus.

²⁸ I uno nu han aiya madi'mo oposi posangalasan na mian nu Yahudi tiba misa' mian nu Yahudi, te botuan ka' mian bebas, te mo'ane ka' boune To Utu-utus iwi-iwi' nosa'angu'mo kalana i Kristus Yesus.

²⁹ De komiu i Kristusmo na tumpunyo, saba' komiu lee'mo i Abraham. Ka' komiu montalimamo apaa na anu jinanji'mo nu Tumpu Allah.