FILIPI 4 - KITAB NU TUMPU ALLA LELE MA'IMAI'

To poki-pokinde'

¹ Mokonyo aijo', to Utu-utusku anu kuku kanonongi, sumo aitumo na komiu tionyo ahi' totu-totu'u palesaya hi Tumpu. Kinyonyoangku saja' montutugi hi komiu! Komiumo na anu kuku kabilahiakon ka' anu nompolame'mo aku.

² To Utu-utus boune i Euodia ka' i Sintike! Ku poita sabole-bole da komiu anu nosa'angu'mo na kinyonyoa sumo to mia-mian anu sa'a-sa'angu'mo na kapalesaya'an.

³ Toka hi sangalungku anu momo' hongo-hongo ku poita suele da kita Utus montulungi ua'-ua'aha na boune aijo'. Aha nokalajamo totu-totu'u tiba aku, nombebakon Lele Ma'ima' anu lengkat mae hi Tumpu; pokakana sumo i Kelemen ka' iwi-iwi' mian sangga'atan anu nokalajamo hingga-hinggat tiba aku. Sanggo nu aha haha aijo' daagi'mo i uno nu Kitab nu Mian Tumuu'.

⁴ O'amalakon da komiu saja' lame' kalana komiu tinumuu'mo nosa'angu' tiba Tumpu. Po'ule' pe'e kutaloakon: Obau lame-lame'!

⁵ Opai-pai lio da iwi-iwi' na mian montoa kalakuan ka' kinyonyoa miu manonong. Kalana madi'mo daagi' pin na Tumpu tokamo.

⁶ Boli bata-bata maumo pa'apaa. I uno nu iwi-iwi' na han, balado'a ka' potoka na poitaon miu hi Tumpu. Apaa na anu opalalui miu, saja' opoto'i na aijo' hi Tumpu, ka' montalima kase.

⁷ Sahingga ka'ima'an anu lengkat mae hi Tumpu, anu madi' opoko ala osumbu' nu mian, monjagaije kinyonyoa ka' pikilan miu anu nosa'angu'mo tiba i Kristus Yesus.

⁸ Ahennyo to Utu-utus, isii na pikilan miu nu hahan anu mingkaliangan, anu pantas o puji', aijo'mo hahan anu totu'u, anu o'angga'i, anu adin, lomas, matami' ka' ma'ima'.

⁹ Opojalan apaa na anu ginulu'anmo miu, ka' anu ingalamo miu hi belengku; mau anu tinaeyakonku, mau pe'e anu binaungkumo. Tumpu Allah anu pinolengkatan mae nu ka'ima'an na montoa komiu.

Pontalima kase

¹⁰ I uno nu kantumuu'anku anu nosa'angu'mo tiba Tumpu, ku oa'i ma'ima' hondo, kalana salatan sumo uukamo na kopinnyo, uuka aiya komiu po'ule' mule' mompopikilakon mosia na kantumuu'anku. Patunyo nu potataengku misa' kalana ugaat komiu nongkolilimimo aku; komiu memang monginau' aku, panyo komiu madi' ko tempo' mompotoa mae pontulungi.

¹¹ Kusisik na aiya misa' kalana aku ko kinakulanganmo, kalana aku binala gulu'mo da o'oa'i sukupmo apaa na anu daagi'.

¹² Aku nongoa'imo kantumuu'an anu saja' kakulangan, ka' mule' kantumuu'an anu saja' molabi. Sinumbu'kumo na lahasianyo mongahopi hahan anu maumo pa' mosia; maumo sanang na kantumuu'an maumo kasiasi, maumo molabi na kantumuu'an maumo kakulangan.

¹³ Tiba kuasa anu binee'mo i Kristus hi belengku, aku ko kahosonanmo mongahopi iwi-iwi' na ngahan nu soba'an.

¹⁴ Panyo komiu nontulungimo aku i uno nu kasusa'anku; ka' apaa na anu binaumo miu aijo' memang ma'ima'.

¹⁵ To Utu-utus mian nu Filipi! Posi komiu nonsumbu'mo hondo saba' tempo'nyo aku nompala'imo Makedonia u'utu mae, tempo'nyo Lele Ma'ima' aijo' binebakonkumo, anu ai-aitunyoje, ola komiu na jama'at anu nontulungimo mae aku; ola komiu na hingga-hinggat nongoa'imo untung ka' lugi' tiba aku.

¹⁶ Tempo'nyo aku i Tesalonika nompalalui da otulungi mae, madi'mo ola minsan na komiu nompakatu mae pontulungi hi belengku.

¹⁷ Aijo' misa' alati'nyo aku ola mongindi da mohumpak anu obee'. Anu kuku indi aijo'mo da kutoa na hasinnyo anu montuangi ka'untungan miu.

¹⁸ Tinalimangkumo iwi-iwi' – aitu pe'e nolabimo misa' ola asan sinukupmo! Iwi-iwi' na anu binee'mo pinakatu mae hi belengku, ingalangkumo hi Apafroditus. Uuka aiya iwi-iwi' na anu kupalalui daagi'mo hi belengku. Iwi-iwi' na anu binee'mo miu aijo', sumo nohong nu hongohis nu kuluban anu sinombahkonmo hi Tumpu ka' anu ingalamo nu Tumpu ka' nomposanangmo kinyonyoa-Nyo.

¹⁹ Tumpu anu kusombah, anu manjo-manjoo' na kakaya'an hi Kristus Yesus, momposukupakonje kapalaluan miu.

²⁰ O puji' na Tumpu Tuumanto sidu-sidutu'! Amin.

Puusnyomo nu salan do'a

²¹ Potokakon na salan do'angku toka hi iwi-iwi' mian anu pinalesayamo hi Tumpu anu nosa'angu'mo tiba i Kristus Yesus. Ka' ala singkona na salan do'a lengkat hi to Utu-utus anu tiba aku i aiya.

²² Iwi-iwi' na mian anu palesayamo hi Tumpu i kota aiya, lebe-lebe mule' aha anu nolengkat mae i laigan nu Tomundo, nompakatu salan do'a hi komiu.

²³ O'amalakon da Tumpunto i Yesus Kristus mombalakati kita Utus iwi-iwi'. Tabea' mami, I Paulus tiba i Timotius 13