FILIPI 3 - KITAB NU TUMPU ALLA LELE MA'IMAI'

Kahondoan anu totu-totu'u

¹ Ahennyo to Utu-utusku, tionyo ahi' komiu lame'mo kalana komiu nosa'angu'mo tiba Tumpu. Aku madi' mongoa'i lawe na mongulit apaa na anu tinuliskumo ka' pinakatungkumo hi komiu momonanyo mae; kalana han aijo' ma'ima' da bau kasalamatan miu.

² Obala'ingati na to mia-mian anu mombau to hahan anu ma'idek, to mia-mian anu konamo na osanggohi ‘dedeng’. Aha mompakisa da to mia-mian o sunat.

³ Padahan kitamo na to mia-mian anu nontalimamo sunat anu totu-totu'u misa' aha. Kita monsombah Tumpu posi Roh nu Tumpu na nompotuka', ka' kita montalima kase kalana kita tumuu' nosa'ngu'mo tiba i Kristus Yesus. Kita madi' taha'iman i to ada-adat anu ola mombatuki kabiasa'an nu dunia.

⁴ Sabenannyo aku timbalije mule' taha'iman i adat haha aijo'. Kalana de daagi' ko toto samian anu mongoa'i ia daagi' ko pintoongan montaha'imani to ada-adat anu mombatuki dunia, aku na anu lebe-lebe mule'.

⁵ Aku sinunatmo salatan umun ingialun sinaamo. Aku i hampe sumo mian nu Israel, lengkat mae lee' i Benyamin; aku mian nu Ibrani totu-totu'u. I uno nu han tulu-tulutan i atulan nu agama Yahudi, aku minsoop i tompuk nu Farisi.

⁶ Aku binaani hondo, sahingga aku nonsakisa jama'at. De o'ala i atulan nu agama Yahudi, aku mian anu ma'ima', anu madi' ko kasala'annyo.

⁷ Panyo kalana i Kristus, sahingga iwi-iwi' anu u'utu mae kusangka sumo sala'sa'angu' anu mompo'untung, uuka aiya tinimbalimo sala'sa'angu' anu mompolugi'.

⁸ Misa' ola hahan anu sinanggomo aijo' panyo ahi' iwi-iwi na apaa kusangka sumo hahan anu ola mompolugi' aku. Anu daagi' hi belengku uuka aiya aijo'mo na lebe ko angga'nyo: aijo' mo monsumbu' i Kristus Yesus, Tumpungku. Kalana i Kristus, sahingga aku nolapasakonmo iwi-iwi na aijo'. Kusangka iwi-iwi' aijo' ola sumo duhehe da timbali ku humpak na i Kristus,

⁹ ka' totu-totu'u mosa'angu'mo tiba Ia. Pompahasumbu'an anu ma'ima' tiba Tumpu, madi'mo daagi' ku posi lio nu jalan montuluti atulan nu agama. Uuka aiya aku kino pompahasumbu'anmo anu ma'ima' tiba Tumpu, kalana aku pinalesayamo hi Kristus. Jadi, pompahasumbu'an anu ma'ima' aijo' tinoka lengkat mae hi Tumpu Allah, ka' mimpu'u kalana palesaya hi Yesus Kristus.

¹⁰ Ola sa'a-sa'angu'nyomo na ku kahanda'i aijo'mo da aku monsumbu' i Kristus, ka' mongoa'i kuasa anu nompotumuu'mo Ia sinilaka. Ku inde'i da mongoa'i sansala hingga-hinggat tiba Ia, ka' timbali pokakana sumo Ia i uno nu han Ia sinilaka.

¹¹ Ka' anu kutaha'imani, da aku po'ule'je opotumuu' de aku silakamo.

Mopadeka' da mohumpak anu okahanda'i

¹² Aku madi' notatae tukoongku aku nohumpakmo kabai tinalakana'mo. Panyo aku saja' mongusahakon da mohumpak tambo anu pinosadiakonmo i Kristus Yesus. Pongka'oho'nyo sumo aijo', sahingga ia nompagalamo nongala aku, ka' nompotimbalimo aku, iamo na tumpu-Nyo.

¹³ Tantu, to Utu-utus aku totu-totu'u madi' mongoa'i au'aitu aku kinohasinnyomo nohumpakmo tambo aijo'. Panyo daagi' ko sa'angu' na han anu binaungkumo, aijo'mo ku kolilimimo apaa na anu i hikungku ka' mongusahakonmo totu-totu'u da mohumpak apaa na anu aiya mae i ahop.

¹⁴ Mokonyo aijo' aku sapopopadeka'nyo mompanjolongi anu okahanda'i i ka'ahenannyo mae da mohumpak ka'untungan, aijo'mo kantumuu'an i suluga'; makisut aijo' na Tumpu nolaga kita palesaya hi Kristus Yesus.

¹⁵ Kita iwi-iwi' anu mangalati'mo i hahan nu rohani tionyo ahi' mintumuu' sumo aijo'. Panyo de itina' hi komiu daagi' ko anu ko pikilan sangga'at, saba' Tumpuje na mompotalang suele hi komiu.

¹⁶ Panyo han aiya tionyo ahi' opalahatikan: Kita tionyo tataap tumuu' mombatuki atulan anu binatuktomo sangkutnyo tempo' uuka aiya.

¹⁷ To Utu-utus iwi-iwi'! Batuki na sonto'ku. Kami nombee'imo sonto' anu totu'u, mokonyo aijo' opalahatikan ima-ima' na to mia-mian anu nombatukimo sonto' mami aijo'.

¹⁸ Aku toto minsan nompoto'imo komiu, ka' uuka aiya po'ule' mule' ku ulit, tibamo nu haang, kalana manjoo' na mian anu kantumuu'annyo nongideimo alati'nyo nu i Kristus sinilaka pinosalib.

¹⁹ Kantumuu'an nu to mia-mian anu sumo aijo' mingahenje nu kapatean, kalana pilogot nu aha aijo'mo apaa na anu nu nuka'ima'i nu butong nu aha. Hahan anu mongambangi, aijo'mo ahi' na anu nunu kabubuulakon nu aha; kalana aha mompopikilakon ola saja' anu mompahakona tiba dunia aiya.

²⁰ Panyo kita aijo' mian nu Kalaja'an Suluga'. Lengkat mae kiita' suele na pinolengkatan nu Tomundo Anu Momposalamat kita, Tumpunto i Yesus Kristus anu saidi' mae toka. Iamo na anu saja' o'indinto otanda'i.

²¹ Butongto anu madi' mahoson ka' anu timbali mohonsu aiya nubali'ije i Kristus timbali sumo butong-Nyo anu talasanggo. Ia timbali moko ala mombau aijo' kalana Ia daagi' ko kuasa mompatundu' iwi-iwi na apaa.