EZRA 8 - KITAB NU TUMPU ALLA LELE MA'IMAI'

Anu ninsusule'mo mae na to mia-mian anu binoa i Babel

¹ Aiya na daputan nu to kapa-kapala nu aha toto sa'anakan mae anu binoa i Babel ka' ninsusule'mo mae tiba aku, i Ezra, nambamo i Yerusalem salatan i Artahsasta nompalentahmo salaku tomundo:

^2-14 i Gersom, aha sa'anakan mae i Pinehas i Daniel, aha sa'anakan mae i Itamar i Hatus anak i Sekhanya, aha sa'anakan mae i Daud i Zakharia, aha sa'anakan mae i Paros tiba 150 na to momo'ane' anu lengkat mae hi aha (daagi' ko daputannyo na tundulan mae nu aha.) i Elyo'enai anak i Zerahya, aha mae sa'anakan i Pahat-Moab, tiba 200 na to momo'ane i Sekhanya anak i i Yahaziel aha mae sa'anakan i Zatu, tiba 300 na to momo'ane i Ebed anak i Yonatan, aha mae sa'anakan i Adin, tiba 50 na to momo'ane i Yesaya anak i Atalya, aha mae sa'anakan i Elam, tiba 70 na to momo'ane i Zebaya anak i Mikhael, aha mae sa'anakan i Sefaca, tiba 80 na to momo'ane i Obaja anak i Yehiel, aha mae sa'anakan i Yoab, tiba 218 na to momo'ane i Selomit anak i Yosifya, aha mae sa'anakan i Bani tiba 160 na to momo'ane i Zakharia anak i Bebai, tiba 28 na to momo'ane i Yohanan anak i Hakatan, aha mae sa'anakan i Azgad, tiba 110 na to momo'ane i Elifelet i Yehiel ka' i Semaya, aha mae sa'anakan i Adonikam, tiba 60 na to momo'ane (aha tinokaje mae mihi-mihi) i Utai tiba i Sabud, aha mae sa'anakan i Bigwai, tiba 70 na to momo'ane

I Ezra nomposihukmo aha to mia-mian nu Lewi da mokalaja mo i Laigan nu Tumpu

¹⁵ Iwi-iwi' na aha anu sanggombu aijo' pinosihukumo i sohipi' nu kaunyo anu mo'ili namba i kota Ahawa, lantas kami binakemahmo i kiijo' tinolunsinaa na kinopinnyo. Salatan ilelekankumo sinumbu'je taalu' daagi' ahi' ko to ima-imam pa' aha sangkuka aijo' hi aha, panyo madi' ko tulunan mae nu aha mian Lewi maumo ola samian.

¹⁶ Lantas ilagangkumo na aha osio' anu aijo' salaku polaya' mae nu aha, aijo'mo: i Eliezer, i Ariel, i Semaya, i Elnatan, i Yarib, i Elnatan, i Natan, i Zakharia, i Mesulam ka' mule' ua'aha na gulu', aijo'mo i Yoyarib tiba i Elnatan.

¹⁷ Lantas sinaingkumo na aha namba hi ido anu mongkapalai mian da'isan kiijo' mae jojoong i Kasifya, mamba nompoita da i Ido ka' to sanga-sangalunyo anu mokalaja i Laigan nu Tumpu, mombee'i mae kami to mia-mian anu mokalaja i Laigan nu Tumpu.

¹⁸ Kalana kanonongan nu Tumpu Allah, aha nonsaimo mae hi kami i Serabya, mian nu Lewi anu pande hondo aha sa'anakan mae i Mahli, Hingga-hinggat tiba ia suele tinoka mae ahi' na to ana-anaknyo ka' to utu-utusnyo, konjoo'nyo 18 na mian.

¹⁹ I Hasabya tiba i Yesaya aha mae sa'anakan i Merari, tiba 20 na mian to utu-utus nu aha, suele sinaimo mae hi kami.

²⁰ Ka' mule' daagi' ahi' ko sangga'atannyo aha 220 na mian anu mokalaja i Laigan nu Tumpu anu tuli-tulis i daputan na sanggonyo. Mompolee' mae nu aha naipuan mae anu i hangkatmo i Tomundo Daud ka' to mia-mian anu matangkas na pangkatnyo i kalaja'an da montulungi aha mian nu Lewi.

To mia-mian anu toho'mo binoa i Babel binapuasa'mo ka' binalado'amo

²¹ Lantas i sohipi' nu Kaunyo Ahawa aijo' pinoto'ingkumo tukoongku iwi-iwi' tionyo ahi' bapuasa' ka' mangaku kasala'an hi Tumpu Allah. Kami binalado'amo da kami nujagai nu Tumpu hau-haunyo lumajang aijo', ka' montoa mae kami, to ana-anak mami ka' apa-apaa na anu mami.

²² Aku mabuhuk na momoita hi tomundo suludadu anu monsake'i ajahan da monjagai kami da boli opoposia nu sampobali' hau-haunyo kami lumajang. Kalana pinoto'ingkumo hi ia, tukoongku Tumpu Allah mami mombalakati batu-batu mian anu monsombah Ia, panyo mongka'ideki ka' mohukum batu-batu mian anu madi' tulu-tulutan hi Ia.

²³ Sahingga binapuasa'mo na kami ka' binalado'amo hi Tumpu Allah mongkakaase da nutoa mae na kami sahingga nu bee mae na anu pinoita nu do'a.

Iwi-iwi' na anu sinombahkonmo bau kapalaluan i Laigan nu Tumpu

²⁴ Aha to ima-imam anu talasanggo pinile'ankumo 12 na mian; i Serabya, i Hasabya ka' mule' aha 10 na mian.

²⁵ Lapas aijo' tinimbangkumo na salaka, mosoni' anu obee' hi aha ka' to paka-pakakas anu binee'mo i tomundo, ka' suele anu binee'mo nu to mia-mian anu lewa' mompokinde'i tomundo ka' to mia-mian anu matangkas na pangkatnyo ka' iwi-iwi' na anu binee'mo nu mian Israel da opake i Laigan nu Tumpu. Iwi-iwi' aijo' binee'kumo hi mian haha aijo'.

^26-27 Aiyamo na pakakas haha aijo' anu binee'mo mae nu aha. Salaka – 22 ton 100 na pakakas salaka – 70 kg mosoni' – 3.400 kg 20 na mangko mosoni' – 8,4 kg 2 na mangko tambaga anu ma' ima' hondo, olinyo pokakanamo tiba mangko mosoni'.

²⁸ Pinoto'ingkumo hi to ima-imam haha aijo', “Belemiu pinile'anmo da samata-mata mokalaja hi Tumpu Allah, Tumpu Allah anu osombah nu mompolee'to, sumo aitumo mule' na pakakas iwi-iwi' salaka tiba mosoni', anu binee'mo hi Tumpu samata-mata opake bau kapalaluan nu Tumpu.

²⁹ Ojagai na pakakas haha aijo' ima-ima' sampe belemiu tokamo i Laigan nu Tumpu. De tokamo kiijo' mae, tionyo ahi' otimbang nu belemiu na pakakas haha aijo', ka' obee' hi to kapa-kapala nu imam ka' to pola-polaya' nu aha Lewi, ka' to pola-polaya' nu mian Israel kiijo' i Yerusalem.”

³⁰ Lantas to ima-imam ka' mian nu Lewi haha aijo' nongalamo salaka, mosoni' ka' pakakas haha aijo' da oboamo i Laigan nu Tumpu anu kiijo' mae i Yerusalem.

Tinokamo i Yerusalem

³¹ I tanggan sampulu'mo ka' ohua' bitu'on anu momonanyo kami nompala'imo Kaunyo nu Ahawa ka' nambamo i Yerusalem. Kami namba mae aijo' jinagaanmo nu Tumpu Allah da boli nu tumbuhi ka' nupahampateakon nu sampobali'.

³² Salatan tinokamo i Yerusalem, kami nilawemo tinolunsinaa.

³³ Lantas kino ipatonnyomo kami nambamo i Laigan nu Tumpu, lantas nontimbangmo salaka, mosoni' ka' pakakas haha aijo'. Lapas aijo' binee'mo mami hi Imam Meremot anak i Uria sinakisian i Eleazar anak i Pinehas ka' ua-ua'aha na mian nu Lewi, aijo'mo i Yozabad anak i Yesua tiba i Noaja anak i Binui.

³⁴ Iwi-iwi' na pakakas haha aijo' binilang ka' tinimbangmo, ka' tinulismo madi' ko anu kinoliliman.

³⁵ I sinaamo aijo' suele na mian iwi-iwi' anu ninsusule'mo mae i pinomboan aha, nonsombahkonmo koloban hi Tumpu Allah Israel aijo' mokoloban anu opotunu. Aha iwi-iwi' na mian Israel nonsombahkonmo 12 na sapi' lakinyo, 96 na domba lakinyo ka' 77 na anak nu domba; ka' mule' suele 12 na mee' bau koloban pongampuni dosa' nu aha. Iwi-iwi' na binatang haha aijo' tinunuanmo salaku koloban anu osombahkon hi Tumpu.

³⁶ Lantas sulat anu pini-pininmo na pino'una' bibinee'mo i tomundo hi aha, pinoto'imo nu to gubernur-gubernur ka' hi mian anu ko bapangkatnyo i Propinsi Efrat sasu Kinsoban. Lantas aha anu kobapangkatnyo haha aijo' nombee'imo bau pontulungi mian da'isan da aha saja' monsombah Tumpu kiijo' i Laigan nu Tumpu.