EZRA 5 - KITAB NU TUMPU ALLA LELE MA'IMAI'

¹ Tempo'nyo aitu aha ohua' na nabi, aijo'mo i Hagai tiba i Zakharia anak i Ido, nompoto'imo potatae nu Tumpu Allah Israel hi aha mian Yahudi anu jojoong i Yehuda ka' Yerusalem.

² Nohongo apaa na anu pinoto'i nu nabi ua'aha aijo', i Zerubabel anak i Sealtiel ka' i Yosua anak i Yozadak lia-lia' na aha nontampu'uni po'ule'mo nombau Laigan nu Tumpu kiijo' i Yerusalem, ua'aha na nabi aijo' na nontulungi.

³ Panyo i Tatnai, gubernur nu Propinsi Efrat sasu Kinsoban, tiba i Syetar-Boznai tiba to sanga-sangalu nuhaha sampamo namba i Yerusalem ka' nompokilawa hi aha to mia-mian Yehudi, “Ihe na nompokau belemiu nombau ka' nomposadiamo pakakasnyo nu laigan anu bau ponsombaan Tumpu aiya?”

⁴ Aha mule' nolelekimo ihehemo iwi-iwi' na sanggo nu to mia-mian anu nontulungimo nombau Laigan nu Tumpu aijo'.

⁵ Panyo pinalahatikanmo nu Tumpu Allah ka' jinagaan-Nyomo na to pola-polaya' nu aha Yehudi, sahingga to mia-mian anu bapangkat hi Tomundo Persia nomputusimo madi'mo mompoposia aha aijo' de ma'isa ko sulat pontaami mae i Darius, sulat anu opakatuje nu aha.

⁶ Sumo uuka na anu pinoto'i nu aha toka hi Tomundo,

⁷ “Toka hi belento Tomundo Darius, O'amalakon da belento Tomundo mompalentah boli ko anu mompoposia!

⁸ Da osumbu' nu belento Tomundo, taalu' kami nambamo i Propinsi Yehuda ka' nontoamo Laigan nu Tumpu, Tumpu Allah Anu Daka' na kuasanyo, hau-haunyo po'ule'mo binau nompake batu toto daka-daka' ka' pagannyo mesen i lapisan nu kau'. Talalo ahi' pinopokopianan na nombau, ka' saja' sakala-kalajanyo madi' toho' opo'idok.

⁹ Lapas aijo' pinokilawamo mami hi to pola-polaya' nu bansa aijo' ihe na nompobee'mo hi aha po'ule' mombau Laigan Posombaan Tumpu Allah aijo' ka' nomposadiaimo pakakasnyo.

¹⁰ Ka' mule' pinokilawa mami na sanggo nu aha da opoto'i mami hi belento Tomundo pa' ihehemo na anu mongkapalai kalaja aijo'.

¹¹ Tinaaman nu aha, ‘Kami aiya posaihon nu Tumpu Allah anu mongkuasai songko-songko na dunia. Kami hau-haunyo po'ule'mo mombau Laigan nu Tumpu anu binaumo ka' pinosadiamo na pakakasnyo mopulu-pulu'mo na taun anu i hikuhakonmo nu sa'angu' na tomundo nu Israel anu Talasanggo hondo.

¹² Panyo kalana mompolee' mami nombaumo han anu moko pusa Tumpu Allah anu mongkuasai suluga', sahingga Ia nombee'mo aha hi kakuasa'an i Nebukadnezar, tomundo nu Babel lee' mae nu aha Kasdim. Ingideanyomo na Laigan aijo' ka' binoanyomo na bansa mami i Babel.

¹³ Lapas aijo' i Kores tinimbalimo tomundo i Babel ka' i taun momona ia nompalentahmo, pinalentahkonnyomo da po'ule'mo mombau Laigan nu Tumpu aijo'.

¹⁴ Ka' mule' pinahasule'akonnyomo na pakakasnyo aijo'mo pakakas mosoni', ka' salaka anu opake i Laigan nu Tumpu ka' anu ingalamo i Nebukadnezar i Yerusalem lantas pino'una'nyomo i laigan nu pilogot kiijo' i Babel. Pakakas haha aijo' binee'mo i Tomundo Kores hi mian sanggonyo i Sesbazar, anu i hangkatnyomo binau gubernur nu Yehuda.

¹⁵ Pinalentahmo i tomundo na ia da mongala pakakas haha aijo' ka' po'ule'mo osule'akon i Laigan nu Tumpu i Yerusalem, ka' po'ule'mo mombau Laigan aijo'.

¹⁶ Lantas tinokamo na i Sesbazar i Yerusalem ka' ia nompotimpasmo mesen anu momona binau, da bau pompotinjoan Laigan nu Tumpu aijo'. Salatan pe'e aitu sampe uuka aiya madi'mo kino tetompo na nombau Laigan aijo' panyo ma'isa tinimbali.’

¹⁷ De opobee' nu belento Tomundo, opoita mami da otoa itina' i daputan nu kalaja'an Babel. Tiba jalan anu sumo aijo' osumbu'je pa' totu'u ko palentah i Tomundo Kores nompalentah po'ule'mo pombau Laigan nu Tumpu ai-aiya i Yerusalem. Lapas atina' okakase mami na lele pa' mosia na kaputusan nu belento Tomundo mongkona palakala aiya.”