EZRA 4 - KITAB NU TUMPU ALLA LELE MA'IMAI'

Laigan nu Tumpu anu obaumo ilioakonmo jalan da bolimo obau

¹ Lele nu aha anu ninsusule'mo mae lengkat i Babel anu pinomboan aha, tinogilelemo tukoonyo aha hau-haunyomo mombau Laigan nu Tumpu, Tumpu Allah nu Israel, i hongomo nu aha anu monsampo bali' aijo'mo: Yehuda tiba Benyamin.

² Kalana aijo' aha nambamo mae hi Zerubabel ka' hi to pola-polaya' nu aha toto sa'a-sa'anakan, ka' nompoita, “Pobee' mae na kami dakami suele montulungi mombau Laigan nu Tumpu atina', kalana kami suele monsombah Tumpu Allah nu to utu-utus, pokakana sumo belemiu to utu-utus iwi-iwi'. Kami saja' monsombahkon koloban hi Ia salatanmo pe'e i Esar-Hadon, tomundo nu Asyur nonomboamo mae kami no'uuka.”

³ Panyo i Zerubabel, i Yosua tiba to pola-polaya' nu aha toto sa'anakan haha aijo' nontaami, “Kami madi' pilenje otulungi nu belemiu na mombau Laigan nu Tumpu Allah mami. Posi kamimo na mombau susumo anu pinalentahkonmo i Kores, tomundo nu Persia, hi kami.”

⁴ Kalana aitu mian anu pininmo na jinojoong i lipu' aijo' lewa'mo nombee'i sisik da madi'mo daka-daka' na kinyonyoa nu aha mian Yehudi mombau Laigan nu Tumpu ka' lewa'mo nompopobuhuk aha da bolimo obau na Laigan nu Tumpu Allah aijo'.

⁵ Aha nonsale'imo obee'ije doi na to mia-mian anu bapangkat hi pamalentah Persia da bolimo opotimbali nu mian Yehudi haha aijo' na mombau Laigan nu Tumpu. Usaha da bolimo opotimbali salatanmo pe'e i Tomundo Kores na nompalentah tinoka-toka hi Tomundo'mo Darius na nompalentah.

Kota Yerusalem tinewa'mo na po'ule obau

⁶ Tempo'nyo i Tomundo Ahasweros nompalentahmo, to sampo-sampo bali nu aha anu jojoong i Yerusalem ka' Yehuda nontulismo surat bau pontewa'.

⁷ Ka' suele tempo'nyo i Artahsasta nompalentahmo, Persia, han aijo' po'ule' mule' binau nu aha na kahanda montewa': i Bislam, i Mintredat, i Tabeel tiba to sanga-sangalu nu aha nontulismo sulat opakatu hi tomundo. Sulat aijo' tinulis nompake' basa' nu aha Aram, jadi de obasa'mo tionyo ahi' otalangkan da osumbu' na alati'nyo.

^8-9 I Arthasasta suele nohumpakmo sulat anu soa'nyo aijo'mo mongkona han Yerusalem. Sulat aijo' pinakatu i gubernur Rehum ka' i Simsai gulu tulis nu Propinsi ka' singaja'an nu to sanga-sangalunyo nu aha, aijo'mo to mia-mian kopian ka' mian iwi-iwi' sangga'at anu bapangkat hi pamalentah Persia, anu nolengkat mae i Erekh, i Babel, ka' i Susan anu i lipu' Elam,

¹⁰ ka' suele bansa-bansa sangga'at anu binoamo i Asnapar Anu talalo hondo Talasanggo ka' pinalentah nyomo da jojoongmo i kota' Samaria ka' i to kota-kota' sangga'at anu minsoop Propinsi Efrat sasu Kinsoban.

¹¹ Sumo uuka na soa'nyo nu sulat aijo', “Toka hi belento Tomundo Artahsasta, lengkat mae hi to posa-posaihon nu belento Tomundo anu aiya jojoong i Efrat sasu kinsoban. Salando'a mami.

¹² Da osumbu' nu belento Tomundo saba' mian nu Yahudi anu nompala'imo mae pa' sangkuka na da'erah sangga'at i uno nu kalaja'an nu belento Tomundo tempo' uuka aiya jinojoongmo i Yerusalem ka' po'ule'mo nombau kota' anu na'idekmo hondo ka' kahanda'mo mongewa na aha aijo'. Aha po'ule'mo nombau pagan mesen nu kota' ka' madi'mo pin kalaja nu aha aijo' mingkotmo.

¹³ De kota aijo' po'ule'mo nubau nu aha ka' pagan mesen nu kota' aijo' jadimo, aha mian anu jojoong i kiijo' madi'mo mongka'oho' mombayan hasin, lantas hasin anu o humpak hi mian da'isan maga'amo na anu obee' hi kalaja'an.

¹⁴ Kami guaon na kinyonyoa montutugi kanonongan nu belento Tomundo, ka' madi' mongka'oho' montoa belento Tomundo opolugi'. Kalana aijo' okakaase mami,

¹⁵ da opalentah nu belento Tomundo soba otoa i daputan na sanggo nu to mia-mian anu kiijo' tuli-tulis naipuan pe'e mae aijo'mo mompolee' nu belento Tomundo. I kiijo'je na belento Tomundo monsumbu' taalu' kota' Yerusalem memang saja' mombau ka'idekan hi pamalentah ka' naipuan pe'e mae saja' mompolugi' to tomu-tomundo ka' suele mompolugi' anu mompalentah Propinsi. Mian anu jojoong i kiijo' mahan hondo na opalentah. Mokonyo aijo' kota' aijo' ingideanmo.

¹⁶ Jadi de o'ala i pikilan mami, matantumo de kota' aijo' po'ule'mo obau ka' pagannyo mesen suele po'ule'mo obau, belento Tomundo madi'mo moko ala mompalentah Propinsi Efrat sasu Kinsoban aiya.”

¹⁷ I Tomundo nompakutumo sulat bau pinontaaminyo sumo uuka, “Toka hi belento Gubernur Rehum tiba Simsai gulutulis nu Propinsi, ka' sangalu nu aha iwi-iwi' i Propinsi Efrat sasu Kinsoban. Salando'angku.

¹⁸ Sulat anu pinakatu mae nu belemiu To utu-utus binasa'mo ka' ingalati'anmo na soa'nyo hi belengku.

¹⁹ Lantas pinalentangkumo sahingga pinalesamo na daputan nu mian, ka' memang sinumbu'mo taalu' salatanmo pe'e naipuan mae Yerusalem saja' panggaga ka' mongewa kakuasaan nu to tomu-tomundo ka' kanjoo'annyo nu mian anu jojoong i kiijo', aha anu saja' mombau ka'idekan hi pamalentah ka' mombau kahengge'an.

²⁰ Toho'mo kino to tomu-tomundo anu baani hondo nompalentah i kiijo' ka' nongkuasaimo songko-songko na Propinsi Efrat sasu Kinsoban ka' nombee'imo tanggungan hasin ka' apa-apaa mule' na anu tionyo nubayan nu aha sataun-toka sataun.

²¹ Mokonyo aijo' baumo na sulat palentah da madi'mo mokalaja na mian haha aijo', da kota aijo' bolimo po'ule' obau tanda'i ko palentahje sangga'at anu ku bee' hi belemiu.

²² Sampa pojalan na palentangku aijo' da bolimo ko pintu-pintuangnyo mule' na kalugi'anku!”

²³ Salatan sulat i Artahsasta aijo' binasa'akonmo hi Rehum, hi Simsai, ka' hi to sanga-sangalu nu aha, aha sampamo namba i Yerusalem ka' pinakisamo nu aha na mian nu Yahudi da bolimo po'ule' mombau kota' aijo'.

Laigan nu Tumpu po'ule' mule' binau

²⁴ Laigan nu Tumpu madi'mo binau ka' madi'mo tinusakon sampe tinoka i taun ko ohua'nyomo na i Darius Tomundo nu Persia nompalentah.