EZRA 3 - KITAB NU TUMPU ALLA LELE MA'IMAI'

Po'ule' mule' nonsombah Tumpu

¹ I bitu'on kopopitu'nyomo, mian nu Israel haha aijo' tinataapmo na jinojoong i kota' nu aha toto samian. I tanggan sa'angu' bitu'onmo ai-aijo' aha sinihukmo i Yerusalem,

² lantas i Yesua anak i Yozadak ka' to sanga-sangalunyo aijo'mo to ima-imam ka' i Zerubabel anak i Sealtiel tiba to utu-utusnyo, nombaumo mule' mezbah bau ponsomban Tumpu Allah nu aha Israel. Tiba jalan anu sumo aijo' aha timbalimo nompotunu koloban i mezbah aijo', susumo anu tinulismo i kitab Atulan i Musa, posaihon nu Tumpu Allaha aijo'.

³ Mau mule' aha mabuhuk hi mian tumpu nu lipu' aijo', panyo aha nombaumo ahi' mezbah i tampatnyo anu momona naipuan mae. Lantas nontampu'unimo na aha po'ule' nonsombahkon koloban anu opotunu, de subu-subumo ka' de malomo.

⁴ Aha mule' nolame'akonmo Sinaa Molame'akon Tahop anu o'atopi nu Honnu kau', susumo koonyo nu atulan; ka' sansinaa sinaa monsombahkon koloban anu pinosadiamo osombahkon sinaa aijo'.

⁵ Ka' mule' aha nonsombahkonmo koloban anu opotunu ka' koloban i Sinaa Molame'akon Koloa, anu bete'je mae, ka' iwi-iwi' na sinaa polame'akonan sangga'at bau ponsomban Tumpu. Aha suele nonsombahkonmo hi Tumpu apa-apaa na anu osombahkon, iya na kasanangan nu kinyonyoa nu aha.

⁶ Mau mule' Laigan nu Tumpu ma'isa tinampu'unan na po'ule' mombau, panyo i tanggan sa'angu' bitu'on anu ko popitu'nyomo mian da'isan nontampu'unimo nompotunu koloban anu osombahkon hi Tumpu.

Tinampu'unanmo na po'ule' nombau Laigan nu Tumpu

⁷ Mian da'isan nombee'mo doi da bau pontamboi tukang anu mompa'at batu ka' tukang nu kau'. Aha suele nompakatumo anu okaan, anu o'inum, ka' lanya' nu zaitun binoa i kota' Tirus ka' kota' Sidon da pontolosi kau' lontio' Libanon i kota' haha aijo'. Kau' haha aijo' ingatomo binoa i Yafo montulu ambai. Iwi-iwi' aijo' kinalajamo nu mian da'isan, panyo i Kores ahi tomundo nu Persia na nompoloas.

⁸ Sahingga salatan tinokamo i bitu'on anu ko ohua'nyomo, i taun anu ko ohua'nyomo salatan mian nu Israel ninsusule'mo i Yerusalem, aha nontampu'unimo po'ule' nombau Laigan nu Tumpu. I Zerubabel, i Yesua tiba to sanga-sangalu sangko bansa nu aha, to ima-imam, mian nu Lewi osainsanggo-sanggomo aha iwi-iwi' anu toho'mo binoa i Babel, nokalajamo hingga-hinggat. Aha mian nu Lewi anu ko umunmo 20 na taun mokiita' binee'an kalaja monjagai anu mokalaja i Laigan nu Tumpu aijo'.

⁹ Jadi' i Yosua, mian nu Lewi haha aijo', tiba to ana-anaknyo ka' suele i Kadmiel tiba to ana-anaknyo (aha sa'anakan mae i Hodawya), hingga-hinggat nonjagaimo anu mokalaja mombau Laigan nu Tumpu aijo'. Anu monsampo tulungi aha mian nu Lewi, anu lengkat mae hi aha sa'anakan i Henadad.

¹⁰ Salatan to mia-mian anu mokalaja i laigan aijo' nontampu'unimo nombau mesen bau pompotinjoan Laigan nu Tumpu, to ima-imam nompusokmo baju' jubah, ka' sika-sika toong na tolompet ka' singkap motinuminjo toto samian. Aha to mia-mian nu Lewi anu sa'anakan mae i Asaf suele tinuminjomo i kiijo' ka' sika-sika toong na gong toto ise-ise'. Aha nompuji-puji'mo Tumpu susumo koonyo nu atulan anu tinantukanmo salatanmo pe'e tempo'nyo i Tomundo Daud.

¹¹ Mian da'isan nonyanyiakonmo pompuji-puji' Tumpu, ka' nonguli-ulit anu mongohanimo kapupusan nu nyanyian, sumo uuka na onyi'nyo, “Tumpu aijo' ma'ima'; ka' kalibosan-Nyo hi aha Israel sampe toka sidu-sidutu'.” Iwi-iwi' na mian da'isan suele nontaligalaimo ka' nompuji'mo Tumpu, kalana mesen bau pompotinjoan Laigan nu Tumpu binaumo.

¹² Manjoo' na aha to ima-imam, to mia-mian nu Lewi ka' to pola-polaya' mae nu aha sa'anakan anu ilangkai'mo hondo anu toho'mo nontoa Laigan nu Tumpu anu nai-naipuan mae. Salatan aha nontoamo mesen anu binaumo da bau pompotinjoan Laigan nu Tumpu aijo', aha i humangmo ka' tinumando'mo. Panyo to mia-mian sangga'at anu tinoka i kiijo' nontaligalaimo kalana ilame'mo,

¹³ sahingga madi'mo sinumbu' pa' iya na taligala kalana lame', kabai iya na anu humang. Onyi'nyo daka' hondo sahingga mau majo'onmo daagi' kahongoan.