ESTER 8 - KITAB NU TUMPU ALLA LELE MA'IMAI'

Bansa Yahudi pinalentahmo mongewa sampobali'nyo

¹ I sinaamo aijo' suele na i Tomundo Ahasyweros nombee' hi Bengkele'nyo i Ester iwi-iwi na halata' i Haman, sampobali' anu daka' hondo nu aha mian Yahudi. I Ester nompoto'imo hi tomundo tukoonyo i Mordekhai tominsannyo, sahingga lengkat i aitu i Mordekhai binee'anmo hak mangadap hi tomundo mau madi' pilenje olaga.

² Sinsing anu ingulatakonnyomo hi Haman ka' po'ule'mo ingalanyo binee'nyomo hi Mordekhai. Ka' i hangkatmo i Ester na i Mordekhai da mongkuasai halata' i Haman.

³ Lapas aijo' i Ester nangadapmo hi tomundo mule'. Ia tinolodadupumo ka' i humang ka' nongkakaase da i tomundo bolimo montotu'ui tanga'an anu madi' ma'ima' bibinaumo i Haman mongkona mian nu Yahudi.

⁴ Tinangkakonmo i tomundo na tokonnyo moso-mosoni' aijo' nokiijo' hi Ester, lantas tinuminjomo na i Ester ka' notatae,

⁵ “de Belento Tomundo sanang na kinyonyoa ka' mongkalibosi aku, da obaumo na sulat palentah mompoto'i saba' sulat iwi-iwi' i Haman anu isinyo mompalentahkon da opateimo na mian nu Yahudi iwi-iwi' i kalaja'an aiya, bolimo obau.

⁶ Te sanang mule' na aku aiya montoa bansangku tiba to utu-utusku opateimo iwi-iwi'?”

⁷ Jadi notataemo na i Tomundo Ahasyweros hi Bengkele'nyo i Ester ka' hi Mordekhai, “Memang, aku nompokalayo'mo i Haman kalana ia kahanda'mo mompatei mian nu Yahudi, ka' halata'nyo binee'kumo hi Ester.

⁸ Panyo sulat anu tinuliskumo nomboa sanggo i tomundo ka' sinapmo, madi'mo o'abali'. Panyo, komiu ku pobee' montulis sulat mongkona bansa Yahudi, yayamo pa'apaa na anu o'oa'i miu ma'ima'. Tulis na sulat aijo' momboa sanggongku, ka' o sap nu sap nu kalaja'an.”

⁹ Lantas sinaamo aijo', aijo'mo i tanggan 23 bitu'on kototolu'nyomo, bitu'on Siwan, i Mordekhai nolagamo to gulu-gulutulis i tomundo ka' pinalentahnyo na aha da montulis sulat ka' opakatu hi to gubernur-gubernur, hi to kapa-kapala da'erah ka' hi to mia-mian anu matangkas na pangkatnyo i uno nu propinsi anu 127 na propinsi lengkat pe'e mae i India to-toka i Susan. Sulat haha aijo' otulisi o basa' ka' tulisan anu osumbu' nu propinsi toto sa'angu' Ia suele nompakatumo sulat hi mian nu Yahudi i basa' ka' tulisan nu aha Yahudi.

¹⁰ Sulat haha aijo' tinandatanganan i Mordekhai panyo nomboa sanggo i Tomundo Ahasyweros ka' sinapmo nu sap nu kalaja'an. Lantas sinaimo i Mordekhai na to mia-mian nomboa sulat haha aijo' i to propinsi-propinsi nu kalaja'an nonsake'i ajahan toto lia-lia' anu i tomundo.

¹¹ Sulat haha aijo' mompoto'i tukoonyo, i tomundo mompoloas mian nu Yahudi anu jojoong i to kota-kota' da mosa'angu' da timbali mongewa. De aha otumbuhi nu to mia-mian anu ko toongon, pa' bansa kabai pa' propinsi iyayamae, aha timbali mongewa ka' mompatei aha anu montumbuhi aijo' tiba to bengke-bengkele' nu aha tiba to ana-anaknyo; aha timbali mompahantotokakon sampobali' nu aha sampe mingkot ka' mompahuhuakon halata' nu aha.

¹² Palentah aijo' tionyo obau i songko-songko na kalaja'an Persia i sinaa anu sinanggomo i Haman aijo'mo mompatei to mia-mian nu Yahudi, i tanggan sampulu' ka' totolu' bitu'on ko sampulu'nyomo ka' ohua', aijo'mo bitu'on Adar.

¹³ Sulat palentah aijo', tionyo ahi' obaumo ka' salakumo ahi' bau atulan ka' obebakonmo i songko-songko Propinsi da aha bansa Yahudi mogogau'mo ahi' mongewa sampobali' nu aha de tokamo i sinaanyo.

¹⁴ Jadi nambamo na to mia-mian anu sinai aijo' nonsake'i ajahan i tomundo. Ka' suele kiijo' i Susan puso nu kota' nu Negara, palentah aijo' binasa'mo.

¹⁵ Lapas aijo' i Mordekhai nompala'imo laigan nu tomundo puso-pusok na baju' pesalin buhitnyo mobilu' ka' mopute', jubah mingkamumu' hude lenan ma'ima' hondo ka' songko' mosoni' nu kalaja'an anu ma'ima' hondo. Kota Susan nontaligalaimo kalana ilame'mo.

¹⁶ Mian nu Yahudi sinanangmo madi'mo nabuhuk, binilahimo ka' ilame'mo.

¹⁷ Ka' mule' i toto sa'angu' na kota' ka' propinsi, anu binasa'akonmo na sulat palentah i tomundo, to mia-mian nu Yahudi ilame'mo, lewa'mo binasanang-sanang ka' nombaumo bau-bauon. Sahingga nanjoo'mo na aha tumpu nu lipu' tinimbalimo bansa Yahudi, kalana aha nabuhukmo hi nu aha na bansa aijo'.