ESTER 3 - KITAB NU TUMPU ALLA LELE MA'IMAI'

I Haman kino tanga'anmo ma'idek kahanda'mo mompatei mian nu Yahudi

¹ Madi' pinin ilapas na aijo', i Tomundo Ahasyweros nohangkatmo samian sanggonyo i Haman binau perdana mantri. I Haman anak i Hamedata lee' mae i Agag.

² I tomundo nompalentahmo iwi-iwi' na anu ko pangkatnyo da moholomati i Haman ka' toka mae tolodadupu hi ahopnyo. Iwi-iwi' nombaumo apaa na anu pinalentahkonnyomo aijo', ola i Mordekhai na madi' tinoka mae nonsosa' hi Haman.

³ Anu ko pangkatnyo sangga'at i laigan nu tomundo nompo kilawamo hi ia, kadaka' ia madi' montuluti palentah i tomundo,

⁴ ka' sansina-sinaa na aha saja' nompokau ia da otulutimo ahi', panyo ia madi' mongka'oho' mohongo-hongo. Ia notatae, “Aku mian nu Yahudi; aku madi' timbali tolodadupu monsosak manusia.” Lantas pinoto'imo nu aha hi Haman, kalana aha kahanda' monsumbu' pa' mosia na ia momputusi i Mordekhai aijo'.

⁵ I Haman notambuha'mo hondo salatan ihongonyomo na i Mordekhai madi' mongka'oho' toka mae tolodadupu monsosak ia.

⁶ Ka' salatan sinumbu'nyomo taalu' i Mordekhai mian nu Yahudi, ia nongalamo kaputusan mohukum i Mordekhai, ka' misa' ola ia, panyo iwi-iwi' suele na bansa Yahudi anu i kalaja'an Persia nu pateimo.

⁷ I taun kinosampulu'nyomo ka' ohua' na i Tomundo Ahasyweros nompalentah, i bitu'onnyomo anu momona, aijo'mo bitu'on Nisan, i Haman nompalentahmo da obuangakon onde anu osa-osanggohi “Purim” da osumbu' na sinaa ka' bitu'onnyo anu ma'ima' bau pompokonannyo niatnyo anu ma'i-ma'idek aijo'. Jadi pinotantumo i tanggan sampulu' ka' totolu', bitu'on anu ko sampulu'nyomo ka' ohua', aijo'mo bitu'on Adar.

⁸ Lantas notataemo na i Haman hi tomundo, “O tuumangku Tomundo, daagi' ko sa'angu' na bansa anu sangalasan na adatnyo sinongkomo i propinsi i kalaja'an aiya. Atulan nu adatnyo madi' hondo pokakana tiba to bansa-bansa sangga'at. Aha madi' montuluti iwi-iwi' na Atulan nu Kalaja'an. Jadi lebe ma'ima' belento Tomundo boli ola mompojohok aha yayamo na anu nuka'ima'i nu aha.

⁹ De belento tomundo madi' kabalatan, da sahanyo obaumo ahi' na sulat bau pompalentah da opateimo na aha. Ka' de ositujui nu Belento tomundo' na anu pinoitangkumo aiya, aku momboaje mae salaka 340.000 na kilogram aitu pe'e tantu molabih oboa mae hi belento Tomundo da pongisi kas.”

¹⁰ Nohongo lele aijo', ingulatakonmo i tomundo aijo' i kangkam nu limanyo na sinsing bau ponsap sulat anu obebakon da opalesaya nu mian, lantas binee'nyomo hi Haman anu monsampobali' hondo bansa Yahudi.

¹¹ I tomundo' notataemo hi ia, “Bansa aijo' ka' suele doinyo ku bee'mo hi beleyum. Baumo pa'apaa na anu nu oa'i ma'ima' hi aha.”

^12-13 Jadi kinona i tanggan sampulu'mo ka' totolu' bitu'onnyo anu momona, ilagamo i Haman na to gulu-gulutulis i tomundo. Aha pinalentahnyomo montulis sulat susumo koonyo nu palentah i tomundo, lantas sulat aijo' po'ule' tinulis i basa' nu bansa iwi-iwi' anu nusumbu' nu to bansa-bansa sangga'at anu opake bau basisik i kalaja'an aijo'. Sulat aijo' tinulis, nontekengi i Tomundo Ahasyweros ka' sinap nu sisingnyo, lantas pinakatumo lia-lia' namba hi to mia-mian anu balakuasa, hi gubernur, hi to pangka-pangkat anu matangkas na pangkatnyo i songko-songko na propinsi. Isinyo nu sulat aijo', aijo'mo palentah da toka i tanggan kosampulu'nyomo ka' totolu' bitu'on Adar, iwi-iwi' na bansa Yahudi, anu tu'amo kabai anu daagi' to ana-anak, boune kabai to momo'ane opateimo madi' ko ampunnyo, ka' halata' nu aha o'alamo.

¹⁴ Palentah aijo' tionyo ahi' obebakonmo hi toto sa'angu' na propinsi, da iwi-iwi' na mian mogogau'mo i sinaa anu pinatikolo aijo'.

¹⁵ To paka pokauhon sampamo namba nomboa sulat haha aijo' hi to pro-propinsi nu kalaja'an. Ka' mule' pinalentahmo i tomundo, da palentah aijo' obebakonmo suele i Susan, puso nu kota Persia. Ilapas na aijo' i tomundo ka' i Haman lewa'mo kinosusuhang ka' lewa'mo binatawa' nu anggur, panyo kota' Susan ginago'mo kalana lele anu ihongomo nu aha aijo'.