EFESUS 2 - KITAB NU TUMPU ALLA LELE MA'IMAI'

Lengkat i kapatean mamba i kantumuu'an

¹ Naipuan mae rohani miu i natemo kalana komiu binala dosa'mo ka' nolanggaimo to pale-palentah nu Tumpu.

² Tempo'nyo aitu komiu nombatukimo kabiasa'an-kabiasa'an nu dunia aiya; bala alati' komiu nontulutimo anu mongkuasai langa, aijo'mo roh anu tempo' uuka nongkuasaimo kinyonyoa nu to mia-mian anu madi'mo nontuluti Tumpu.

³ Naipuan mae kita iwi-iwi' suele pokakanamo tiba aha; kita tumuu' nombatukimo tabiat nu mian ka' nombaumo apaa na anu moko sanang butong ka' pikilanto. Tempo'nyo aitu kita singkona to mia-mian anu tinambuha'anmo nu Tumpu. Pokakanamo sumo to mia-mian sangga'at.

⁴ Panyo palias na kodaka'nyo na kanonongan nu kinyonyoa nu Tumpu! Ia nongkalibosimo kita sumo aijo',

⁵ sahingga tempo'nyo kita daagi' nate na rohaninto kalana kita saja' mombau kasala'an, Ia po'ule'mo nompotumuu' kita hingga-hinggat tiba i Kristus. Jadi, ola kalana ka'ima'an nu kinyonyoa nu Tumpu sahingga komiu pinosalamat-Nyomo.

⁶ Kalana kita nosa'angu'mo tiba i Kristus Yesus, Tumpu nompo'ule'mo nompotumuu' kita hingga-hinggat tiba Ia, da kita mompalentah suele hingga-hinggat tiba Ia i uno nu suluga'.

⁷ Tumpu nombau sumo aijo' da tempo' anu tokaje aiya mae i ahop, mian montoamo mosia na kodaka'nyo na kalibosan nu Tumpu. Kalibosan aijo' pinonyata'mo nu Tumpu kalana ka'ima'an nu kinyonyoa-Nyo hi kita nontului jalan hi Kristus Yesus.

^8-9 Tumpu mongkalibosi komiu, aijo' na sababnyo Ia momposalamat komiu kalana komiu pinalesayamo hi Yesus. Kasalamatan miu atina' misa' posi hasin nu usaha miu. Aijo' te balakat nu Tumpu. Jadi, madi' ko samian pe'e na anu timbali mongkabubuulakon posi butongnyo mongkona han aijo'.

¹⁰ Kita, Tumpu na nompotimbali, ka' kalana palesaya hi Kristus Yesus, Tumpu nompotimbalimo kita, da kita mombau hahan anu ma'ima', anu tinoukan-Nyomo da o baunto.

Nosa'angu'mo kalana i Kristus

¹¹ To Utu-utus anu misa' mian nu Yahudi! Inau' na kantumuu'an miu tempo'nyo naipuan mae: Komiu sinanggohanmo “mian anu madi' o sunat”, nu mian Yahudi anu mangaku butongnyo sinunatmo (makisutnyo anu nohumpakmo tanda anu binau nu mian i butong nu aha).

¹² Tempo'nyo aitu komiu ma'isa nosa'angu' tiba i Kristus, komiu mian anu i salipu'an anu madi' minsoop i mian anu pinile'anmo nu Tumpu. Komiu madi' sinegotan nu palajanjian anu binaumo nu Tumpu Allah tiba mian anu palesayamo hi Ia. Komiu tumuu' i uno nu dunia aiya madi' ko anu otaha'imani, ka' madi' pilenje ko Tumpu.

¹³ Panyo uuka, kalana komiu nosa'angu'mo tiba i Kristus Yesus, komiu anu naipuan mae majo'on, panyo kalana i Kristus sinilakamo jadi aijo'mo na nompo ohani.

¹⁴ Kalana i Kristus na nompodamemo kita. Ia nomposa'angu'mo to mia-mian nu Yahudi ka' to mia-mian misa' Yahudi tinimbalimo sa'a-sa'angu' na bansa. Mesen anu nongga'at aha i olotnyo, aijo'mo po'uwalian i hobo'akonmo i Kristus nu butong-Nyo kinolobanakon.

¹⁵ Atulan nu agama Yahudi tiba to pale-palentah, ka' anu nu atun nu atulan i hapusmo i Kristus da ohua' na bansa aijo' timbalimo sa'angu' na bansa mian bu'ou, anu nosa'angu'mo tiba Ia. Jalan aijo' na binau i Kristus bau pompodame.

¹⁶ Kalana Ia sinilakamo pinosalib, i Kristus nomposa'angu'mo ohua' na bansa aijo', ka' nompodamemo aha tiba Tumpu, sahingga madi'mo ko po'uwalian aijo'.

¹⁷ Mokonyo aijo' i Kristus tinokamo nompolele Lele Ma'ima' mongkona paladamean aijo' hi komiu; mau misa' hi komiu mian nu Yahudi anu naipuan mae majo'on hi Tumpu, maumo hi mian nu Yahudi anu ohani hi Tumpu.

¹⁸ Kalana montului Kristus salaku jalan kita iwi-iwi' – mau mian nu Yahudi, maumo misa' mian nu Yahudi – kalana Roh nu Tumpu anu sa'a-sa'angu'nyomo aijo' timbalimo moko ohani Te Aha Tuuma.

¹⁹ Mokonyo aijo', komiu madi'mo minsoop hi mian anu i salipu'an kabai mian anu i sambiha'nyo. Komiu uuka aiya nohingga-hinggatmo mian anu palesayamo hi Tumpu. Komiu tinimbalimo sampoto utusan hi Tumpu.

²⁰ Komiu mule' pinotinjomo i patikokoan anu binaumo nu to rasul-rasul, ka' to nabi-nabi, ka' i Kristus Yesusmo na salaku batu mahoson pinompokokoan.

²¹ Iamo na nongkunsun ingko-ingkot anu opotinjo aijo' sahingga tinimbali Laigan nu Tumpu, anu samata-mata Tumpu na tumpu-Nyo.

²² Kalana tumuu' nosa'angu'mo tiba i Kristus, komiu mule' hau-haunyo pinotinjomo hingga-hinggat tiba to mia-mian sangga'at da timbali sa'angu' na Laigan nu Tumpu; i kiijo' na Tumpu Allah jojoong tiba Roh-Nyo.