ANU MOMPOLELE POTATAE NU TUMPU 8 - KITAB NU TUMPU ALLA LELE MA'IMAI'

¹ Ibeh na kosanangnyo na mian anu pande. Iwi-iwi na palakala nu sumbu' na montaami. Kapandean bapikin na nompolame'mo ia tinolomoing: sahingga ohupnyo saja' balasahaya.

Otuluti na tomundo'

² De tomundo' mompalentahmo otapali; ka' boli balajanji kosia-sia' hi Tumpu.

³ I tomundo' timbali mompalentah yayamo pongka oho'nyo de ia madi' monsitujui sahanyo opatijo'oni na ia.

⁴ I tomundo' mompalentah kalana ia balakuasa; madi' ko anu baani na mombanta!

⁵ Mian anu tulu-tulutan hi ia sanang ka' madi' ko anu mompoposia; sinumbu'mo nu mian anu pande, hipian ka' mosia na montuluti tomundo'.

⁶ Iwi-iwi na apa-apaa ko tempo'nyo ka' ko posi atulannyo pa' mosia na mongatun; panyo ola sangkiding hondo na opoko ala osumbu'to!

⁷ Madi ko samian pe'e na moko ala monsumbu' pa' nasib apaa na o ahopi; ka' madi' ko anu moko ala montaloakon apaa na anu jadi saidi' mae.

⁸ Madi' ko samian pe'e na moko ala montewa' kabai montunda kasilakannyo; aijo' sa'angu' na han anu madi' opoko ala opimpalii; ia madi' moko ala luput i han aijo'; maumo kapandean apaa na obau.

Mian anu madi' ko sala'nyo ka' mian anu ma'idek na palabuatannyo

⁹ Iwi-iwi' aiya tinoangkumo salatan pinalahatikankumo iwi-iwi' na anu jinadimo i dunia aiya. Toto minsan manusia mompake kakuasa'annyo de monsilakaimo sangalunyo.

¹⁰ Toho' mule' tinoangku na mian anu ma'idek na palabuatannyo sinilaka ka' ilamun. Panyo salatan mian ninsusule'mo lengkat mae i pinolamunan aha nompuji'mo ia i kota' tampat anu pinombauannyo han anu ma'idek. Jadi aijo' mule' madi' ko gunanyo.

¹¹ Kadaka' talalo dengke na mian mombau anu ma'idek aijo'? Kalana madi' sampa ohukum na ia.

¹² Mau sa'atumo na palabuatan ma'idek binau nu mian baladosa', ia tataap tumuu' ka' mantan na umunnyo. De ihe na tulu-tulutan hi Tumpu Allah tantu kantumuu'annyo madi' susa'.

¹³ Panyo mule' ahi' mian anu ma'idek na palabuatannyo mohumpak kasusa'an. Kantumuu'annyo malia-lia' hondo madi' otoa susumo lolung. Ia de silakamo umunnyo ma'isa langkai' kabai bengkele'; kalana ia madi' tulu-tulutan hi Tumpunyo.

¹⁴ Panyo iwi-iwi' aijo' madi' hondo ko patu-patunyo. Toamo ahi' apaa na anu jinadimo i dunia aiya; daagi ko mian anu bala iman i hukum susumo mian anu palaganta. Daagi ko mian palabuatannyo ma'idek panyo binee'an palasen susumo mian anu bala iman. Jadi aijo' suele madi' ko gunanyo.

¹⁵ Kukodo-kodo'imo sumo uuka: saba' mian lebe ma'ima saja' lame'. Kalana kantumuu'annyo i dunia aiya, madi' ko kasanangannyo sangga'at, malaingkan mongkaan, monginum ka' balame-lame'. Olamo aijo' na timbali nu oa'i i uno nu usahanyo. Anu binee'nu Tumpu hi ia tempo'nyo daagi tutuu'.

¹⁶ Salatan binala usahamo na aku da mohumpak kapandean bapikin; ka' pinalahatikankumo iwi-iwi' na anu jinadimo i dunia aiya, saba' sinumbu'kuje na aku taalu' maumo ahi' kita basusa-susa' sinaa ka' pihi madi'mo milawe,

¹⁷ madi' opoko pangalati'into na anu kahanda' nu bau nu Tumpu. Mau mosiamo na kita bala usaha madi' opoko ala opangalati'into. Mian anu pande mangaku tukoonyo ia na monsumbu' panyo sabenannyo ia madi' ahi' monsumbu'.