ANU MOMPOLELE POTATAE NU TUMPU 7 - KITAB NU TUMPU ALLA LELE MA'IMAI'

Pikilan mongkona kantumuu'an

¹ Mian anu kalakuanyo ma'ima' molingkudui nohong nu minya-minya' anu mahan na olinyo; ka' sinaa anu kasilakan lebe ma'ima' molingkudui sinaa anu ki nahampean.

² Lebe ma'ima' mamba i laigan nu mian anu ko kasilakan; ka' de mule' ola mamba i tampat anu nombau bau-bauon. Kalana kita saja' ahi' monginau'; saba toto samian nu tanda'imo ahi' saba' toto samian nu tanda'imo ahi' nu kasilakan.

³ Kasusa'an nu kinyonyoa na lebe ma'ima' molingkudui kumojo. Maumo ohup otoa susa' asan kinyonyoa na sanang ahi'.

⁴ Mian anu ponga' tionyo ahi' saja molio kasanangan; mian anu pande saja montutugi kasilakan.

⁵ Lebe ma'ima' nu pisala'i nu mian anu manonong; ka' de mule' nu puji' nu mian anu madi' sampa mangalati'.

⁶ Kojoo nu mian anu ponga' madi' ko alati'nyo; sumomo behetek nu hii' de opapuimo.

⁷ De mian anu pande mongakali, ponga' na palabuatannyo aijo'; de mian montalima doi anu pinonsogo' pikilannyo na'idekmo.

⁸ Lebe ma'ima' ulusan nu palakala mingkotmo ka' de mule' montampu'unije ulusannyo. Lebe ma'ima sabaan ka' de mule' talalo takabun.

⁹ Boli malia' sampa mapanas na kinyonyoa; ola mian anu ponga' na saja monginau' ingunyo ikinyonyoanyo.

¹⁰ Boli mompokilawa, ‘Kadaka’ tempo'nyo naipuan mae na lebe ma'ima' de opokakanakon tempo uuka aiya? Ola mian anu ponga' na mompokilawa susumo aijo'.

¹¹ Mian anu daagi' tutuu' na tionyo ahi' ko kapandean bapikin; angga'nyo nu kapandean bapikin sumomo buden.

¹² Pokakanamo suele sumo doi anu bau pongoli ka amanan. Apaa mule' ilimu' mongkona kapandean bapikin! Ihe na ko kapandean bapikin ia salamat.

¹³ Palahatikan na pakalaja'an nu Tumpu. Kalana ihe na moko ala mompohodi' apaa anu pinotageo'mo nu Tumpu?

¹⁴ Jadi bilahimo ahi' de beleyum nohumpakmo dale'. Panyo de beleyum nu tokaimo nu balaa' boli okolilimi saba' Tumpu nombee'mo ohu-ohua' aijo'. Apaa na anu jadi mule' madi' osumbu'to.

¹⁵ Kantumuu'anku madi'mo ko gunanyo panyo tempo'nyo aku dagi' tutuu' tinoangku sumo uuka: Toto minsan mian anu ma'idek na gau'nyo na umun panjang maumo ahi' ia saja' mombau dosa'.

¹⁶ Boli talalo manonong ka' mule' boli talalo pande. Apaa na gunanyo minoo'?

¹⁷ Boli mule' ahi' talalo ma'idek na kinyonyoa kabai talalo ponga'. Apaa na gunanyo de silaka ma'isa pe'e toka i tempo'nyo!

¹⁸ Opimpalii na ohu-ohua' aijo'. De kita mabuhuk hi Tumpu, totu-totu'u apaa na anu obaunto jadi ma'ima'.

¹⁹ Mian anu ko kapandean bapikin mompotimbali lebe baani, nu lingkudui na mian anu balakuasa aha sampulu' i sa'angu' na kota'.

²⁰ I dunia aiya madi' ko mian anu talakana'; madi' koa anu saja' mombau anu ma'ima' ka' madi' toho' binaladosa'.

²¹ Boli talalo lewa' mohongo sisik nu mian; ihe na monsumbu' ugaat beleyum tinotobi'akonmo nu samian na posaihon.

²² Beleyum nonsumbu' suele; saba' mian sangga'at toho'mo suele tinotobi'akon nu beleyum.

²³ Iwi-iwi' aijo' inguji'kumo nu kapandeanku bapikin; panyo maumo ahi' sabole-bole ku lio na kapandean bapikin aijo' panyo ola mule' ahi' mompaka pajo'on na ia hi belengku.

²⁴ Ihe na moko ala mohumpak alati'nyo nu kantumuu'an aiya? Talalo hondo susa' na mompangalati'i.

²⁵ Maumo ahi' aku saja balagulu' ka' molio ilimu'; da mohumpak kapandean bapikin aijo' ka' mule' mohumpak pontaaminyo mae iwi-iwi' na anu pinokilawamo. Aku nonsobamo da mangalati' taalu' dosa' aijo' kaponga'an; ka' palabuatan anu ma'idek aijo' anu tinotonggolakonmo.

²⁶ Ihumpakkumo taalu' boune lebe mapakat molingkudui kapatean. Pongka'ima'i nu boune sumo buani kabai so'o anu sinadiamo mohakop kaanonnyo. Pontanggogolinyo sumo pompungu anu madodo hondo. Mian anu mombau pongka'oho' nu Tumpu madi' nu kona nu so'o aijo' panyo mian anu baladosa' memang nu hakopmo.

²⁷ Toa na koonyo nu anu saja' Bapikin; iwi-iwi' aijo' kinabotkumo, salatan han aijo' saja'mo iliongku na pontaaminyo.

²⁸ Daagi sabole-bole kulio na pontaaminyo sangga'at, panyo madi' kino hasinnyo. Hi aha aijo' anu samadala na mian i humpaku ola samian na mo'ane ku holomati. Panyo hi aha aijo' madi' ko boune anu timbali ku angga'i.

²⁹ Ola aiya na anu i humpaku: Tumpu nompojadimo kita, sinaimbangganmo ahi' na kino ima'nyo. Panyo posi kitamo ahi' na nombau kasusa'an ibutongto ka' palabuatan anu minggeo-geo'.