ANU MOMPOLELE POTATAE NU TUMPU 5 - KITAB NU TUMPU ALLA LELE MA'IMAI'

¹ Bapikin pe'e atina'je ka' otaeakon ka' boli sampa malia-lia' balajanji' hi Tumpu. Ia kiita i suluga ka' mule' beleyum aiya i dunia jadi o unggali ahi' na potatae nu beleyum.

² Lebe ko pikilan bata-bata lebe mule' mongipi anu ma'idek. Lebe manjoo' na potatae lebe mule' montaeakon potatae anu madi' ko kaliangannyo.

³ Jadi de beleyum balajanji' hi Tumpu tionyo ahi' sampa obau na anu jinanji'mo. Ia madi' mongka'ima'i mian anu sumo mian anu ponga'. Jadi otepati ahi' apaa na anu jinanji'mo nu beleyum.

⁴ Sahanyo boli balajanji' de madi' otepati na palajanjian aijo'.

⁵ Boli potatae nu beleyum monsaduakonmo beleyum baladosa' sahingga beleyum talapakisa mompoto'i hi imam anu molayani Tumpu tukooyum beleyum sinangkalingamo na binalajanji'. Apaa na gunanyo nonsaduakonmo Tumpu nontambuha'imo beleyum sahingga ihansunan-Nyomo na hasin nu pakalajaan nu beleyum?

⁶ Susumo mongipi manjoo' panyo aijo' madi' ko alati'nyo, sumo aijo' mule, manjoo' na potatae madi' ko gunanyo. Panyo okabuhuk ahi' na Tumpu.

Kantumuu'an aijo' madi' ko gunanyo

⁷ De montoa polaya' mongkabisa'i mian anu kasiasi boli bangang, mongagoi hak nu aha ka' madi' mombee'i aha ka adilan. Toto samian na pegawenyo nu lindungi nu atasannyo ka' ua-ua aha aijo' na aha nu lindungi nu anu lebe matangkas na pangkatnyo.

⁸ Ka' mule' kantumuu'an nu tomundo' suele ola montaha'imani hasin nu anu opadak.

⁹ Mian anu ola mompoginapa' doi madi' toho' sukup na doinyo; mian anu mangoa ihalata' madi' toho' puas i ka untungan. Iwi-iwi' aijo' madi' ko gunanyo.

¹⁰ Mompaka panjoo' na kakaya'an nu toto samian, mompaka panjoo' na mian sangga'at anu tionyo ahi' obee'i mongkaan. Madi' ko ka untungan nu tumpunyo ola nu sumbu' ia mian anu kaya.

¹¹ Samian na anu ola mongala tambo ugaat madi' sukup na anu nu kaan panyo maumo sumo aijo' ia timbali hoyot bobogon. Panyo mule' ahi' samian na mian anu kaya manjoo' na halata'nyo, sahingga ia amdi' moko ala hoyot kalana bata-bata.

¹² Aku nontoa i dunia aiya daagi ko apa-apaa na anu momposusa' kinyonyoa. Samian na anu montambun halata' da bau ponginau kakulangan.

¹³ Panyo halata' aijo' ningkotmo kalana kasusa'an sahingga madi'mo daagi ko anu i nguna'akon hi to ana-anaknyo.

¹⁴ Kita i hampeakon langgo-langgo' sumo aitu mule' de kita mompala'imo dunia aiya madi' momboa apa-apaa anu i humpak nu lawento.

¹⁵ Aijo' totu-totu'u moko susa' hondo kinyonyoanto. Kita mamba sumomo tempo'nyo kita uuka aiya tinoka mae. Kita ola ahi' malawe na mololoi' mombun ka' apaa na hasinnyo?

¹⁶ Hau-haunyo kita tutuu' kita maha kanyangan i uno nu pintung, kita bala susa-susa'mo bata-batamo, mongka'idekimo ka' mule' motambuha'mo.

¹⁷ Sahingga nangalati'mo na aku taalu' anu talalo hondo ma'ima' hi kita aijo'mo mongkaan, monginum ka' mongoa'i hasin nu kalajanto i uno nu kantumuu'an anu binee'mo nu Tumpu hi kita; aijo'mo nasibto.

¹⁸ De samian mohumpakmo kakaya'an tiba halata' lengkat mae hi Tumpu, ka' ia opobee' na molasai kakaya'an aijo', ia tionyo ahi' montalima kase na molasai hasin nu kalajanyo. Aijo' anu binee'mo nu Tumpu.

¹⁹ Tumpu nongganapimo tanga'an nu kinyonyoa nu mian aijo' nu kalame'an sahingga ia madi'mo daagi bata-bata na mompopikilakon kantumuu'an anu ola sasaingoni' aiya.