ANU MOMPOLELE POTATAE NU TUMPU 4 - KITAB NU TUMPU ALLA LELE MA'IMAI'

¹ Lapas aitu pinalahatikanku mule' iwi-iwi' na anu jinadimo i dunia aiya madi adin. Batu-batu mian anu kinabisa'an i humang ka' madi' ko anu mongka'oho' montulungi aha. Madi' ko mian anu mongka'oho' montulungi, kalana anu mongkabisa'i aijo' ko kuasa anu daka' hondo.

² Aku saja' hondo monginau' batu-batu mian anu pininmo na sinilaka kalana aha na lebe binilahimo molingkudui aha anu daagi' tumuu'.

³ Panyo anu lebe bilahi aijo'mo to mia-mian anu ma'isa i hampe, kalana aha ma'isa nontoa ka idekan anu binau i dunia aiya.

⁴ Ku sumbu' mule' saba' manusia nakekemo hondo na nokalaja ola kalana milu montoa hasin usaha nu anu mompaha ohani na laigannyo. Iwi-iwi' aijo' madi' kogunanyo ola susumo usaha mololoi' mombun.

⁵ Sumo aitumo na mian anu ponga' ola sumuhang nu posolung na limanyo nupojohokmo na butongnyo da mate nu ohop.

⁶ Ugaat aijo' na totu'u, panyo lebe ma'ima' mau ola sangkiding na halata' panyo ohinggati ahi' oposanang na kinyonyoa da boli mule' ahi' balakaja makeheh ohua' na lima ka' mololoi' mombun.

⁷ Daagi' mule' ahi' anu madi' kogunanyo na kantumuu'an aiya.

⁸ Daagi' ko mian anu ola tumuu' sausa' madi' ko anak, kabai pe'e utus. Mau sumo aitu ia saja' makeke na mokalaja ka' kinyonyoanyo madi' toho' ma'osa na montoa halata'nyo. Obee' hi he na hasin nu kalajanyo sahingga taha-tahahumo na mokalaja ka' madi'mo mongala kasanangan? Aijo' mule' madi' kogunanyo, ka' aijo'mo na kantumuu'an anu sansala.

⁹ Lebe untung de ua'aha ka' de mule' ola samian. De aha mokalaja, hasinnyo lebe ma'ima'.

¹⁰ De samian na susa' sangga'at na montulungi. Panyo de samian susa'mo, padahan ola sausa'nyo silakamo na ia saba' madi' ko anu montulungi ia.

¹¹ De pihimo ka' mabakin, ua'aha na male' mobebe' mompaha pana-panasi, panyo mosia na mian timbali mapanas de ola samian?

¹² Ua'aha na mamba hingga-hinggat i lumambanan moko ala montangkis pimuhuk nu sampo bali' panyo de ola sausa' dengke na nupokalah. Totolu' na hambahan nu kohohon, okahohon timbali sa'angu', susa' na obotu'i.

^13-14 Mian kasiasi timbali jadi tomundo, ka' samian na anu tinalungku' timbali o hangkat mokiita i kasuhangan nu tomundo. Panyo de umunnyo matangkasmo hondo tomundo aijo' talalo ahi' ponga' de montalima pokinde', saba' nasibnyo lebe ma'idek molingkudui olitau anu kasiasi panyo pande.

¹⁵ Iwi-iwi' na mian i dunia aiya saja' ku popikinakon, saba' sininsumbuje' na aku itotonga nu aha tantu daagi' kosamian na Olitau anu timbali mombolosi tomundo.

¹⁶ Mian da'isan anu nu palentah ugaat madi' opokolekeng na konjoo'nyo, panyo de ia nambamo, madi' ko anu montalima kase monginau' tempo'nyo ia daagi' mokalaja. Memang iwi-iwi' madi' kogunanyo susumo usaha mololoi' mombun.

Boli sampa balajanji'

¹⁷ Obala ingati de mamba i laigan nu Tumpu. Sahanyo de mamba, mamba balajan boli ola monsombahkon koloban susumo anu lewa' nu bau nu to mia-mian anu ponga'. Aha aijo' madi' moko ala mombedakon iya na anu totu'u ka' iya na anu sala'.