ANU MOMPOLELE POTATAE NU TUMPU 10 - KITAB NU TUMPU ALLA LELE MA'IMAI'

¹ Bangke' nu lalo mombusiki samboton na minya-minya'; kaponga'an mau ola sangkiding mongalini kapandean bapikin anu matangkas na alati'nyo.

² Pantasnyomo ahi' de mian anu pande mombau kalakuan anu ma'ima; ka' mian anu ponga' mombau kalakuan anu ma'idek.

³ Kaponga'annyo otoa ikolangka-langkasnyo. Ka' iwi-iwi' na mian pinompotoannyomo kaponga'annyo.

⁴ De beleyum nu tambuha'i nu anu balakuasa; boli momoita belenti na mokalaja. Maumo daka' na kasala'an nu beleyum, beleyum o ampuni; de beleyum madi' mojojoo' ka' sabaan.

⁵ Daagi mule' ko anu ma'idek na kalakuannyo sangga'attinoangku i dunia, aijo'mo anu balakuasa noteba'mo i jalan anu madi' ma'ima'.

⁶ Mian anu ponga' obee'i pangkat anu oholomati, panyo mian anu talasanggo madi' obee'i apa-apaa.

⁷ Toho' mule' tinoangku na to botu-botuan nonsake'i ajahan, panyo to mia-mian daka' na ola ahi' i lumajang tengke susumo to posa-posaihon.

⁸ Ihe na mongkeke bolo' saidi' mae manabu' i unonyo, ihe na montumbalakon pagan mesen ia nu sa'u nu ulo anu ko bisa'nyo.

⁹ Ihe na mokalaja i pongkekean batu, ia tosumpun ka' belaonmo. Ihe na mombiha-biha' kau' boli-boli saidi' mae belaon.

¹⁰ De bangko' nu beleyum makujun ka' madi' nu boit; beleyum mokalaja lebe susa' hondo. Pake na akan nu beleyum ma'i-ma'ima', ka' pombau ahi' tanga'an momonanyo.

¹¹ De nu sa'u nu ulo na beleyum ma'isa pe'e pininyaman nu do'a-do'a, saba' anu nompotuu' ulo aijo' madi'mo ko gunanyo.

¹² Potatae nu mian anu pande mombau ia oholomati, panyo mian anu ponga' silaka kalana nu saduakon nu potataenyo.

¹³ Ia montampu'uni motatae nu potatae anu madi' ko alati'nyo, panyo imihinyo mae potataenyo sumomo mian anu ulawon.

¹⁴ Memang mian anu ponga' manjoo' na potatae; sinaa anu aiya mae i ahop madi' osumbu-usumbu' nu kita iwi-iwi'. Madi' ko anu moko ala mongkila-kila kajadian salatan kita i madi'anmo.

¹⁵ Ola ahi' mian anu ponga' na anu madi' monsumbu' jalan anu mamba i laigannyo, ia makeke na mokalaja ka' madi' toho' milawe.

¹⁶ Silaka na lipu' de tomundo'nyo ma'isa talalo tu'anyo; ka to pega-pegawenyo anu toto tangka-tangkas na pangkatnyo sinampahu na lewa' nombau bau-bauon.

¹⁷ Untung hondo na lipu' de tomundo'nyo anu okabuhuk; ka' to pega-pegawenyo anu toto tangka-tangkas na pangkatnyo mongkaan memang kona i tempo'nyomo ahi' pongkaanan, madi' mongka'ima'i malangu ka' pande na sabaan.

¹⁸ Atop nu laigan timbali tuhu'on de madi'mo okiabi; ka' ahennyo laigan aijo' mahu'mo kalana moluluk.

¹⁹ Bau-bauon mompotimbali kumojo ka' mule' anggur mompotimbali lame' panyo tionyo ahi' ko doi da bau pongoli.

²⁰ Boli monselidiki tomundo' mau ola i kinyonyoa. Boli lewa' monsisik ma'idek mian anu kaya, mau ola i salipi' kaka male'an nu beleyum. Ihe na monsumbu' nu hongo nu sa'angu' na tomonsi' apaa na anu tinaeakonmo nu beleyum lantas nu poto'imo hi aha anu sinisikmo nu beleyum.