DANIEL 8 - KITAB NU TUMPU ALLA LELE MA'IMAI'

Anu tinoa i Daniel na domba lakinyo tiba mee' lakinyo

¹ I taun kinototolu'nyomo na i tomundo' Belsyazar nompalentah aku nontoa mule' kinopinduannyo.

² Aku nontoa aijo', au' aitu butongku kiijo' mae i propinsi Elam, kiijo' i kota' Susan puso nu kota' Persia. Aku tinuminjo koko Kaunyo nu Ulai,

³ ka' isonibi nu kaunyo aijo' aku nontoamo sa'angu' na domba lakinyo ko tanduknyo ohua' ka' mantan, sa'angu' lebe mantan ka' lebe sala'je tinumuu' de obandingkan tiba anu sangga'at aijo'.

⁴ Tinoangku na domba lakinyo aijo' montandukmo sasu mokiijo' i kinsoban, utara, ka' salatan. Madi' ko sa'angu' pe'e na binatang na moko ala mongewa ia kabai na madi' kinuasannyo. Maumo pa' apaa na anu nu kahanda'i nu kinyonyoanyo nu baumo ka' mule' ia tinakabunmo.

⁵ Hau-haunyo aku montonto'i ia, tinoangku mule' sa'angu' na mee' lakinyo popopadeka' mae lengkat i sasu kinsoban nolowo'mo i dunia. Kalana talalo ahi' malia' sahingga tengkenyo madi'mo peja-peja' i i tano'. I olot nu ohua'na matanyo daagi ko sa'angu na tanduk anu tinumuu'mo mae.

⁶ Mee' lakinyo aijo' nongohanimo domba lakinyo aijo' anu tinoangku isonibi nu kaunyo aijo', lantas kalana talalomo na singginyo dinadupa'annyomo nokiijo'.

⁷ Pinalahatikankumo na ia nondadupa'i domba lakinyo aijo'. Ia talalomo hondo sininggi sahingga dinupa'nyomo na domba lakinyo aijo' ka' nompato'imo ohu-ohua' na tanduknyo. Domba lakinyo aijo' madi'mo noko ala nongewa. Ia tinombasungonmo nokiijo' i tano' ka' pinahampeja'akonnyomo, ka' madi' kino samian pe'e na anu nontulungi ia.

⁸ Mee' lakinyo aijo' kinodaka-daka'nyomo. Panyo salatan sinukupmo hondo na kakuasa'annyo nopato'mo na tanduknyo anu daka' hondo aijo', lantas i tampat aijo' mule' tinumuu'mo opat na tanduk anu mantan, toto sa'angu' madi' pokakana na nu patui nu tanduk aijo'.

⁹ I sala' sa'angu' na tanduk aijo' tinumuu'mo mule' sa'angu' na tanduk ise' anu tinimbalimo dinaka hondo ka'kakuasa'annyo ingewamo no insu'sasu salatan ka' mule' sasu kinsoban ka' mule' no insu' sasu tano' anu ma'ima'an hondo.

¹⁰ Tanduk aijo' nompaka daka'mo sampe nahosonmo hondo na nontumbuhi suludadu nu suluga' aijo'mo to manda-mandala', aitu pe'e tino pia-piangkuka na ilumbu'akonmo ahi' nokaiyong i tano' ka' pinahampeja'akonnyomo.

¹¹ Ka' mule' ia nongewamo kapala nu suludadu nu suluga' ka' mule' nontewa'mo koloban palasombahan anu obau sansina-sinaa osombahkon hi kapala nu suludadu aijo' ka' mule' nohobo'akonmo laigan poponsomban ia.

¹² Lantas mian haha kiijo' mae nontampu'unimo binaladosa' ka' madi'mo nonsombahkon to kolo-koloban anu tionyo ahi' obau na aijo'. Sahingga jalannyo mosia na monsombah Tumpu ingalinmo nokaiyong i tano'. Tanduk aijo' inguntungmo i uno nu iwi-iwi' na palabuatannyo.

¹³ Lapas aijo' ihongongkumo samian na malaekat notatae hi sangga'at, “Sampe toka hipian na kopinnyo na iwi-iwi' anu tinoa aijo'saja' sabole-bole motuus? Sampe toka hipian na kopinnyo na dosa' daka' ai-aijo' mombolosimo koloban anu sansina-sinaa obau? Sampe toka hipian na kopinnyo na suludadu nu suluga' ka' laigan ponsomban Tumpu aijo' opahampeja'akon?”

¹⁴ I hongongku mule' na malaekat samian nontaami, “Sampe toka daagi' 1.150 na sinaa. Tempo'nyo aijo' anu okolobanakon malom ka' anu kolobanakon daagi' subu' madi'mo osombahkon. Lapas aijo' atinaje ka' laigan ponsomban Tumpu opoko ima'imo.”

Malaekat Gabriel nontalangkanmo alati'nyo nu anu tinoa aijo'

¹⁵ Hau-haunyo aku bala usaha kahanda' da monsumbu' alati'nyo nu anu tinoa aijo', madi' pinin tinuminjomo i ahopku na anu susumo manusia.

¹⁶ I hongongku na potatae anu nontaloakon daka-daka' aijo' mae i santoa nu Kaunyo Ulai, notatae mae, “Gabriel, talangkanmo hi ia na anu tinoa aijo'.”

¹⁷ Lantas i Gabriel anu tinuminjo i ahopku aijo' nongohanimo mae aku. Aku na buhukmo hondo sahingga aku notua'mo. Koonyo i Gabriel hi belengku, “O, mian anu madi' tumuu' sampe toka sidu-sidutu' beleyum tionyo ahi' monsumbu' saba' anu tinoa aijo', aijo'mo na sinaa kakiamatan.”

¹⁸ Hau-haunyo ia notatae mae aijo' aku pinoso'mo. Panyo tinoongannyomo mae na aku ka' nontulungimo mae aku da po ule' tinuminjo. Lantas ia notataemo,

¹⁹ “Kupoto'ije hi beleyum apaa na anu jadi saidi' mae salaku akibatnyo kalana Tumpu pusamo. Kalana anu tinoa nu beleyum atina' bau salaku pompoto'i kakiamatan.

²⁰ Domba lakinyo anu tinoa nu beleyum aijo' anu ko tanduknyo ohua', aijo' mongibalatakon kalaja'an Media tiba Persia.

²¹ Mee' lakinyo mongibalatakon kalaja'an nu Yunani ka' mule' tanduk anu tinumuu'mo mae i olot nu matanyo ohu-ohua' aijo', aijo'mo na tomundo'nyo anu u'utu mae momona.

²² Opa-opat na tanduk anu tinumuu' mae salatan tanduk momona aijo' nopato'mo alati' nyokalaja'an nu Yunani mobagi-bagimo timbalimo opat na kalaja'an, panyo mau pe'e sa'angu' madi' ko anu mahoson susumo kalaja'an u'utu mae momona.

²³ De palabuatan anu ma'idek taha-tahahumo basida saba' aijo'mo na tandanyo kalaja'an haha aijo' malia'mo mingkot, sahingga samian na tomundo' anu bahangihi' ka' mule' pande na mongakali tokamo mae.

²⁴ Ia timbalimo mahoson hondo, panyo madi' ola posi kahosonannyo. Ia mompotokamo mae kasusa'an anu okabuhuk ka' maumo pa'apaa na anu nu bau tionyo ahi' jadi. Ia mohopu'imo to mia-mian anu to babaani ka' mule' mian anu palesayamo hi Tumpu.

²⁵ Kalana ia pande hondo na lewa' mongakali sahingga saja' jadi na anu nu kahanda'i. Ia montakabunakonmo butongnyo ka' madi' pilenje mompoto'i pe'e nu hopu'imo na mian manjoo' hondo. Ka' mule' ia baani hondo na mongewa Tomundo' Anu Daka' na Kuasanyo. Panyo ia saidi' mae ohansunimo mau madi' pilenje ko kahosonan nu mian.

²⁶ Anu tinoa mongkona koloban o, osombahkon malom ka' daagi' subu titinalangkonmo hi beleyum atina' totu-totu'u tio nu a ahi' jadi. Panyo iwi-iwi' aijo' jadije aiya mae i ahop ka' daagi' ahi' pin; jadi boli ko anu bau ponsisikan maumo pa' hihe.”

²⁷ Lapas aijo' aku i lundengmo lantas nasakitmo pa' sinangkuka na sinaa na kinopinnyo. Lapas aijo' aku nobulamo ka' po'ule'mo nombau pakalaja'anku anu bau kapentingan i tomundo'. Panyo aku madi'mo sinanang na lewa' mompopikilakon anu saja' tinoangku aijo' ka' mule' madi' noko ala nongalati'i.