DANIEL 6 - KITAB NU TUMPU ALLA LELE MA'IMAI'

I Daniel pinosoopmo i uno nu liang nu singa

¹ Noko lapas pinatean na i Belsyazar i Darius mian nu Media nompo agomo kakuasa'an i uno nu kalaja'an. Tempo'nyo aitu umunnyo anom pulu'mo ka' ohua' na taun.

² I Darius nombagimo kalaja'annyo sina'atu ka' uampulu' na propinsi ka' toto sa'angu' nu palentah nu samian na gubernur.

³ I Daniel ka' ua'aha na mian sangga'at i hangkatmo da montoa pakalaja'an nu gubernur haha aijo' da i tomundo' boli lugi'.

⁴ Salatan tinoamo na pakalaja'an i Daniel talu' lebe ma'ima' nu lingkudui na pakalaja'an nu gubernur-gubernur ka' mule' aha sangga'at anu montoa pakalaja'an nu to gubernur-gubernur. Kalana aijo' kahanda'mo nu hangkat i tomundo' na ia da mongkuasai songko-songko na kalaja'an.

⁵ Panyo gubernur haha aijo' ka' anu montoa pakalaja'an nu to gubernur-gubernur haha aijo' binala usahamo molio kasala'an-kasala'an i Daniel i uno nu pakalaja'annyo salaku pamalentah panyo madi' ahi' kino gunanyo apa-apaa, kalana i Daniel tulu-tulutan ka' madi' tageo' na kinyonyoa ka' mule' madi' la'ip na mokalaja kabai ko kasala'an apa-apaa.

⁶ Lantas aha binasale'mo, “Ola ahi' da ohumpakto na kasala'an i Daniel, olionto na han anu ko hubungannyo tiba agamanyo.”

⁷ Lapas aijo' nambamo na aha iwi-iwi' nangadap hi tomundo' ka' notatae, “O, Tuanku Tomundo' Darius, higahiakon na belento Tuanku sampe toka sidu-sidutu'!

⁸ Kami iwi-iwi' anu mongulus kalaja'an nu belento Tuanku mau anu montoa pakalaja'an nu gubernur-gubernur maumo suele to gubernur-gubernur to waki-wakin nu gubernur tiba to paga-pagawe sangga'at momoita hi belento Tuanku da obee'i mae sulat palentah anu tionyo ahi' otuluti totu-totu'u. Tionyo ahi' belento Tuanku mombee'i mae palentah anu kopinnyo tolumpulu' na sinaa na madi' timbali ko samian pe'e timbali mompotoka poitaon hi sala' samian na pilogot kabai hi manusia, malaingkan samata-mata ahi' ola hi belento Tuanku. Ihe na anu molanggai palentah aijo', ia olumbu'akonmo iliang nu singa.

⁹ Opoita mami da belento Tuanku montekengi sulat palentah aijo' da timbalimo unda-undang nu Media ka' Persia anu madi'mo timbali obabali'i.”

¹⁰ Sahingga i Tomundo' Darius nontekengimo sulat palentah aijo'.

¹¹ Salatan i Daniel nohongomo han aijo', ia ninsusule'mo ilaigannyo. Salipi'nyo anu aita' mae i bawonyo pinaha pokonan tolongannyo mongahopi mokiijo' sasu Yerusalem. Ka' susumo anu saja' nu bau i Daniel ia balado'a hi Tumpunyo ka' mompuji' Ia, pintolun sansinaa matidupu i ahop nu tolongan haha aijo' anu hau-haunyo tuhe-tuhea'.

¹² Salatan aha anu mongingou i Daniel nontoamo i Daniel hau-haunyo balado'a aita hi Tumpu Allah-nyo,

¹³ nambamo na aha iwi-iwi' nangadap hi tomundo' mongkalak i Daniel. Aha nompoto'imo, “Te misa' belento Tuanku nontekengimo ahi' sulat palentah anu montewa iwi-iwi' na mian, kopinnyo opake na isi nu sulat aijo' tolumpulu' na sinaa na madi' timbali mompotoka poitaon hi sala' samian na pilogot kabai hi manusia, malaingkan ola ahi' samata-mata hi belento Tuanku? Ka' mule' de ihehe na molanggai palentah aijo' saba' ia olumbu'akonmo ahi' i uno nu liang nu singa?” Tinaamanmo i Tomundo', “Memang totu'u, ka' mule' palentah aijo' binaumo unda-undang nu Media tiba Persia ka' mule' madi'mo timbali obabali'i.”

¹⁴ Lantas notataemo na aha hi tomundo', “I Daniel sala' samian na anu binoamo mae ka' pinojoongmo isa'angu' na tampat, ia lengkat mae i Yehuda madi'mo nontuluti belento Tuanku ka' mule' madi'mo nompalahatikan palentah nu belento Tuanku. Ia balado'a ta'atun hondo pintolun sansinaa.”

¹⁵ Nohongo han aijo' i tomundo' sinusa'mo hondo ka' binata-batamo, sahingga ia noliomo akan da momposalamat i Daniel sampe tinoka malom na i tomundo' lewa' binapikin.

¹⁶ Lapas mule' mian haha aijo' po ule'mo nangadap hi tomundo' ka' notatae, “O, Tuanku, tionyo ahi' o'inau' nu belento Tuanku na katantuan nu unda-undang nu Media tiba Persia, palentah anu binebakonmo nu tomundo' madi'mo ahi' timbali obabali'i.”

¹⁷ Sahingga ahennyo i tomundo' nompalentahmo da i Daniel ohakopmo ka' olumbu'akonmo i uno nu liang nu singa. Notatae na i tomundo' hi Daniel, “O'amalakon da Tumpu anu nu sombah totu-totu'u aijo' na momposalamat beleyum.”

¹⁸ Lapas aijo' sa'angu' na batu anu daka' hondo pinotonopmo i nganga' nu bolo' aijo' ka' sinapmo i tomundo' na batu aijo' nu sap nu kalaja'an ka' mule' sap numian anu to daka-daka' na pangkatnyo sahingga madi' ko samian pe'e na timbali mompobebas i Daniel da madi' nu sa'u nu singa haha aijo'.

¹⁹ Lapas aijo' ninsusule'mo na i tomundo' i laigan kajo-kajojoongannyo! Ia madi'mo daagi' nongkaan kabai nongka'oho' ohase'. Ka' mule' sinampahu aijo' ia madi'mo tinohoyot.

²⁰ Daagi' subu-subu hondo nobulamo na i tomundo' ka' nambamo lia-lia nontoa liang nu singa.

²¹ Salatan tinokamo ikiijo' nabuhukmo na ia ka' notataemo daka-daka', “I Daniel memang posaihon nu Tumpu anu tumuu'! Ihe na Tumpu nu beleyum anu nunu sombah ka' nu tuluti nu beleyum totu-totu'u ka' moko ala momposalamat beleyum da madi' sina'u nu singa haha aijo'?”

²² Lantas ihongomo na potatae i Daniel nontaami mae, “Higahiakon na belento Tuanku sampe toka sidu-sidutu'.

²³ Tumpungku nonsaimo mae malaekat-Nyo nonggintumo nganga' nu singa haha aijo' sahingga aha madi'mo nompoposia aku. Ia nomposalamatmo aku aiya kalana Nu sumbu' na aku aiya madi' ko kasala'an hi Ia ka' mule' hi belento Tuanku.”

²⁴ Paya' na kinosanangnyo na kinyonyoa i tomundo' sahingga pinalentahnyomo da i Daniel osabatakonmo mae aijo' iliang nu singa. Salatan palentah aijo' binaumo saba' tinoa mae madi' ahi' kinobela-belanyo mau pe'e sangkiding hi Daniel, kalana ia palesaya hi Tumpunyo.

²⁵ Lapas aijo' i tomundo' nompalentahmo mian da mohakop to mia-mian anu nongkalakmo mae i Daniel. Lantas aha iwi-iwi' tiba to ana-anak ka' mule' to bengke-bengkele' nu aha ilumbu'akonmo nokiijo' i uno nu liang nu singa haha aijo'. Ma'isa pe'e aha tinoka ilananyo nu liing aijo', singa haha aijo' nonsa'umo aha ka' nohansunimo buku-buku nu aha.

²⁶ Lapas aijo' i Tomundo' Darius nompakatumo sulat hi aha to mia-mian iwi-iwi na bansa, tulunan nu bansa ka' basa' anu i songko-songko na dunia, “Salamat kopian!

²⁷ Ku palentahkon hi iwi-iwi' mian anu jojoong i kalaja'anku da mabuhuk ka' moholomati Tumpu anu nu sombah i Daniel! Ia atina'mo na Tumpu anu tumuu' sampe toka sidu-sidutu', sampe toka isinaa kakiamatan na Ia mompalentah. Kalaja'an-Nyo sabole-bole totinjo. Kakuasa'an-Nyo madi' ko kamingkotannyo.

²⁸ Ia momposalamat ka' mule' mompobebas, mombau anu ma'isa toho' jinadi ka' mule' anu okabangangi aita' i langit ka' mule' i dunia aiya. I Daniel pinosalamat-Nyomo da madi' sina' nu singa haha aijo'.”

²⁹ Sumo aijo' na i Daniel tataap nontoongi pangkatnyo anu matangkas aijo' sumo kinopinnyo nu kapalentahan i Darius ka' mule' kapalentahan i Koresy mian nu Persia aijo'.