DANIEL 5 - KITAB NU TUMPU ALLA LELE MA'IMAI'

I Tomundo' Belsyazar anak mo'ane i Nebukadnezar nombaumo bau-bauon

¹ Daagi' kinosansinaan i Tomundo' Belsyazar nolagamo samadala na mian anu to tangka-tangkas na pangkatnyo da toka mae mongahumi bau-bauonnyo anu talalo hondo talasanggo aijo' ka' lewa monginum anggur.

² Hau-haunyo aha lewa' monginu-inum i Belsyazar nompalentahmo da mamba mongala to mangko-mangko' mosoni' ka' salaka anu ingagoan mae i Nebukadnezar tuumanyo i uno nu Laigan nu Tumpu kiijo' mae i Yerusalem. Makisud i Tomundo' Belsyazar da anu to tangka-tangkas na pangkatnyo, to bengke-bengkele'nyo, to amba-ambahue'nyo ka' suele ia na monginum ahi' i mangko' haha aijo'.

³ Lia-lia' na nomboakon mangko' haha aijo' hi ia, lantas aha iwi-iwi' nonginumo anggur i pakakas haha aijo'.

⁴ Hau-haunyo monginum aha nompuji-puji'mo patong nu pilogot anu mosoni' na binau, salaka, tambaga, kau' ka' batu.

⁵ Monti-montiik nontoamo lima nu mian nontulis apa-apaa i pimpi nu laigan anu kajo-kajojoongan nu tomundo' i tampat anu talalo hondo kantoan de nu pense'mo mae nu sulu' sahingga i tomundo' nontoamo mana-manasa.

⁶ Ia inesemo hondo ka' nabuhukmo sahingga bukunyo i lakatnyomo.

⁷ Ia noloboo'imo ka' nomoita da anu topo tahi'i ka' mule' anu ko ilimu' mompakuli ka' mule' anu ko pangatahuan, ka' mule' anu monsumbu' ilimu' nu mandala', iwi-iwi' aijo' pinaha lagamo. Salatan aha tinokamo mae tomundo' aijo' notataemo, “Ihehe na moko ala monsumbu' mombasa' tulisan aijo' ka' mompoto'i mae alati'nyo hi belengku ku bee'ije pakean nu kalaja'an sumo juba' anu mingkamumu' ka' olo' mosoni' da bau tanda kaholomatan. Ka' mule' ia ku pojadimo anu balakuasa ko totolu'nyo i uno nu kalaja'anku.”

⁸ Mian anu toto pande-pande nokiijo' mo i ahopnyo panyo madi' ko samian pe'e na noko ala nombasa tulisan aijo' kabai nompoto'i alati'nyo hi tomundo'.

⁹ I Tomundo' Belsyazar nompaka pabuhukmo ka' mule' inesemo hondo! Ka' suele anu to tangka-tangkas na pangkatnyo binangangmo hondo.

¹⁰ Nohongo loboo' nu tomundo' ka' anu to tangka-tangkas na pangkatnyo, tina i tomundo' ninsoopmo nokiijo' i unonyo nu pinombauan bau-bauon. Lantas ia notataemo, “Higahiakon na belento Tomundo' sampe toka sidu-sidutu'! Posanang na kinyonyoa nu belento Tuanku ka' boli ahi' mese.

¹¹ Kalana i uno nu kalaja'an nu belento Tuanku daagi' ko samian na mo'ane kinuasanmo nu roh nu to pilo-pilogot anu susui'. Tempo'nyo daagi' tuuma nu belento Tuanku na nompalentah, mian aijo' pande ka' ko bukuti'nyomo, timbali mongalati'i ka' mule' ko kapandean bapikin, anu susumo kapandean bapikin nu to pilo-pilogot. Tuuma nu belento Tuanku i Tomundo' Nebukadnezar nohangkatmo ia tinimbali polaya' nu topo tahi'i tiba anu ko pangatahuan ka' to mia-mian anu ko ilimu'nyo, ka' anu pande na montoa mandala'.

¹² Ia talalo hondo pande, ka' pande mule' na mongatun ka' pande mule' na mongalati'i ipion ka' mule monsumbu' lahasia ka' mule' monsumbu' mompopikilakon hahan anu talalo susa'. Sanggonyo i Daniel, panyo sinanggohanmo i tomundo' na ia i Beltsazar. Laga mae na ia. Ia timbali mompoto'i hi belento Tuanku apaa na alati'nyo nu tulisan aiya.”

I Daniel nontalangkanmo alati'nyo nu tulisan aijo'

¹³ Lia-lia' na i Daniel binoamo mae nu aha nangadap hi tomundo'. Lantas pinokilawamo i tomundo' hi ia, “Beleyumo na i Daniel, mian nu aha Yahudi anu bibinoa mae ka' pinojoongmo i sa'angu' na tampat bibinoa mae nu tuumangku lengkat mae i Yehuda?

¹⁴ I hongongkumo na beleyum kinuasanmo nu roh nu to pilo-pilogot anu suci' ka' mule' beleyum ko kapandean, ka' mangalati' ka' mule' ko kapandean bapikin anu talalo hondo okahebati.

¹⁵ Mian to pande-pande ka' mule' anu ko pangatahuan nonsobamo no basa' tulisan aiya ka' nompoto'imo mae alati'nyo hi belengku. Panyo madi' pinoko ala sinumbu' nu aha.

¹⁶ I hongong kuje talu' beleyum timbali mompoto'i iwi-iwi' na lahasia ka' mule' monsumbu' mompopikilakon hahan anu talalo susa' na otutugi. De beleyum timbali mombasa' tulisan aiya ka' mule mompoto'i mae hi belengku pa' apaa na alati'nyo, beleyum ku bee' ije pakean nu kalaja'an sumo juba' anu mingkamumu' tiba olo' mosoni' salaku tanda kaholomatan. Ka' mule' beleyum ku hangkatmo timbali anu balakuasa ko totolu'nyo i uno nu kalaja'anku.”

¹⁷ I Daniel nontaamimo, “Belento Tuanku madi' palalu mombee'i mae palasen haha itina' hi belengku, sahanyo obee' hi mian anu sangga'at. Ku basa'je na tulisan aijo' da ohongo nu belento Tuanku ka' kupoto'ije na alati'nyo.

¹⁸ Tumpu Anu Matangkas na Kuasanyo, nompojadimo tuuma i Nebukadnezar nu belento Tuanku da tinimbali tomundo' anu daka' hondo na kakuasa'annyo, ka' mule' kaholomatan tinalasanggomo.

¹⁹ Talalo hondo' daka' na kakuasa'annyo sahingga to mia-mian anu lengkat mae i iwi-iwi na bansa ka' mule' tulunan nu bansa ka' basa' ilakatnyomo ka' mule' nongkabuhukmo ia. De ia kahanda'mo mompatei mian nu pateimo na mian aijo'. De ia kahanda'mo momposalamat mian nu posalamatmo na mian aijo'. Ia mohangkat kabai montau'akon maumo pa' ihe asanje pongka'oho'nyo.

²⁰ Panyo salatan ia tinakabunmo ka' madi'mo nohongo pikilan nu mian sangga'at ka' talalomo binuhingison ia pinobelentimo i kalaja'annyo sahingga ia madi'mo tinala sanggo.

²¹ Ia nu laa'mo nu mian da'isan ka' kapandeannyo timbalimo susumo kapandean nu binatang. Ia tumuu'mo tiba keledai nu alas, mongkaanmo hemput susumo sapi' ka' hoyotmo i tano' anu madi' ko atopnyo sahingga nu humpisimo nu dondu'ok. Ahennyo ia mongakuimo talu' Tumpu Anu Matangkas na Kuasanyo na mongkuasai kalaja'an nu manusia ka' mule' kalaja'an aijo' Nu bee'mo maumo pa'hihe na anu pinile'an-Nyomo.

²² Panyo anaknyo momo'ane aijo'mo belento Tuanku madi' mongka'oho' ta'aluk maumo ahi' nu sumbu' nu belento Tuanku na iwi-iwi' aijo'.

²³ Belento Tuanku takabun hi Tumpu anu kiita' i suluga' ka' baani na mompalentah da oboa oposoop na to mangko-mangko' anu ingagoan i Laigan nu Tumpu. Lantas belento Tuanku tiba anu to tangka-tangkas na pangkatnyo, to bengke-bengkele' nu belento tiba to amba-ambahue' nu belento Tuanku nompuji'mo patong haha aijo' anu mosoni' na binau, salaka, tambaga, besak, kau' ka' batu, ka' mule' to pilo-pilogot anu madi' montoa kabai mohongo kabai mangalati' apa-apaa. Belento Tuanku madi' moholomati Tumpu anu montantukan tumuu' kabai silaka na belento Tuanku ka' anu montantukan jalan nu kantumuu'an nu belento Tuanku.

²⁴ Mokonyo aijo' Tumpu nompakatumo mae lima aijo' da montulis potuunon-Nyo.

²⁵ Sumo uuka na tulisan aijo', ‘Binilangmo, binilangmo, tinimbangmo, binagimo.’

²⁶ Ka' sumo uuka na alati'nyo: Binilangmo na kopinnyo belento Tuanku nompalentah, binilangmo nu Tumpu ka' madi'mo pinotuus-Nyo na belento Tuanku mompalentah;

²⁷ tinimbang, belento Tuanku tinimbangmo ka' sinumbu'mo madi'mo tinalakana';

²⁸ binagi, kalaja'an nu belento Tuanku obagimo ka' mule' obee'mo hi aha mian nu Media tiba Persia.”

²⁹ Lia-lia' na i Belsyazar nompalentah to paga-pagawenyo da mompopusok hi Daniel Juba' anu mingkamumu' ka' mompo'olo', olo mosoni' i gogohongnyo. Lantas ihangkatnyomo na i Daniel da timbalimo anu balakuasa ko totolu'nyo i uno nu kalaja'annyo.

³⁰ Pihi-pihimo aijo' na i Belsyazar tomundo' nu Babel aijo' pinatean.