DANIEL 3 - KITAB NU TUMPU ALLA LELE MA'IMAI'

I Nebukadnezar nompalentahmo da mian da'isan monsombahmo patong mosoni'

¹ Daagi' kinominsan i Tomundo' Nebukadnezar nombaumo sa'angu' na patong mosoni' kotangkasnyo 27 na meten ka' ko bolanyo ohani 3 na meten. Pinotinjonyo hatanyo nu Dura i propinsi Babel.

² Lapas aijo' i tomundo' nolagamo iwi-iwi' na to tomu-tomundo' anu i daerah-daerah, gubernur-gubernur, bupati-bupati, anu lewa' membee'i pokinde i uno nu negara, anu monguna' doi, to mia-mian kopian, anu monsumbu' hondo-hondo atulan, ka' iwi-iwi' na kapala daerah da toka mae mombau-bauon monsalamat saba' patong pinotinjomo.

³ Salatan aha iwi-iwi' tinokamo ka' tinuminjomo i ahop nu patong aijo',

⁴ noloboo'mo hoso-hoson na anu monjagai tomundo' aijo'. “To utu-utus anu lengkat mae hi to bansa-bansa iwi-iwi', tulunan nu bansa ka' mule' basa'! Potombihing mae na palentah nu tomundo' sumo uuka;

⁵ De tolompet umonyi'mo ka' suele opo'onyi'mo na suling, kasapi', labana, serdam, ka' mule' pakakas nu musik sangga'at, to utu-utus tionyo ahi' tolodadupumo i ahop nu patong mosoni' aijo' ka' monsombah anu pipinotinjomo nu Tomundo' Nebukadnezar.

⁶ Ihehe na madi' montuluti palentah aiya lau-laus olumbu'akon i apu anu hau-haunyo noakmo.”

⁷ Sahingga salatan nohongomo pakakas nu musik haha aijo' pino onyi'mo nu mian, to mia-mian anu lengkat mae iwi-iwi na bansa tiba mule' tulunan nu bansa ka' basa' tinolodadupumo ahi' ka' nonsombahmo patong mosoni' ai-aijo'.

Aha totolu' na sangalu i Daniel sinangka nolanggaimo palentah nu tomundo'

⁸ To pia-piangkuka na aha mian nu Babel nonggunakonmo kasampatan aijo' da monsilakaimo aha mian nu Yahudi.

⁹ Aha nompoto'imo hi Tomundo' Nebukadnezar, “Higahiakon na belento Tuanku sampe toka sidu-sidutu'!

¹⁰ Belento Tuanku nompalentahmo tukoonto, lia-lia' salatan iwi-iwi' na pakakas nu musik opo onyi'mo, iwi-iwi' na mian tionyo ahi' tolodadupumo ka' monsombah patong mosoni' ai-aijo',

¹¹ ka' ihehe na madi' montuluti palentah aijo' olumbu'akon i uno nu apu anu hau-haunyo noakmo.

¹² Panyo to pia-piangkuka na aha mian nu Yahudi anu binee'anmo pangkat mompalentah propinsi Babel, madi' nompajuli palentah nu belento Tuanku. Aha aijo'mo i Sadrakh, i Mesakh, tiba i Abednego. Mian haha aijo' madi' nongka oho' nonsombah to pilo-pilogot nu belento Tuanku ka' madi' suele nonsombah patong mosoni' anu pipinotinjo nu belento Tuanku.”

¹³ Nohongo lele aijo' i tomundo' pinusamo hondo, lantas nompalentahmo da aha totototolu' na mian haha aijo' oboa mae mangadap hi ia.

¹⁴ I Tomundo' nompokilawamo hi aha, “hi Sadrakh, hi Mesakh, ka' mule' hi Abednego! Pa' totu'u na belemiu madi' mongka oho' monsombah to pilo-pilogot ka' mule' madi' mongka oho' tolodadupu monsombah patong mosoni' pipinotinjongkumo aijo'?

¹⁵ Jadi uuka aiya, balasadia na belemiu tolodadupu ka' monsombah patong aijo' salatan musik opo onyi'mo? De belemiu madi' mongka oho' belemiu lau-laus olumbu'akonmo mokiijo' i uno nu apu hau-haunyo noakmo. Ka' pilogot iya mae na anu moko ala momposalamat belemiu i uno nu kakuasa'anku?”

¹⁶ I Sadrakh, i Mesakh tiba i Abednego nontaamimo, “Belento Tomundo' anu opopo daka', kami madi' moko ala monggoliliakon butong mami da salamat.

¹⁷ De Tumpu anu osombah mami moko ala momposalamat kami da boli motoyo' nu apu anu binanyela-nyelakmo aijo' ka' i uno nu kakuasa'an nu belento Tuanku ka' mule' aijo' memang tionyo ahi' Nu bau.

¹⁸ Panyo de bisuanyo Ia madi' ahi' mombau yo da osumbu' nu belento Tuanku kami madi' ahi' monsombah pilogot nu belento Tuanku ka' madi' ahi' suele monsombah patong mosoni' anu pipinotinjomo nu belento Tuanku aijo'.”

I Sadrakh, i Mesakh tiba i Abednego binee'anmo hukuman mate

¹⁹ Sahingga talalomo hondo pinusa na i Tomundo' Nebukadnezar hi Sadrakh, hi Mesakh, tiba hi Abednego, kalana aijo' ohupnyo nomehamo hondo. Ia nompalentahmo da mombaumo apu, obau pimpitun lipat na ko panasnyo nu lingkudui na panasnyo biasa.

²⁰ Lantas pinalentahnyomo tino pia-piangkuka na mian anu mahoson hondo nu lingkudui na kohoson nu suludadunyo da mompungu i Sadrakh, i Mesakh, tiba i Abednego lantas olumbu'akonmo nu aha mokiijo' i apu anu binanyela-nyelakmo aijo'.

²¹ Lia-lia' na aha totototolu' aijo' pinungu hoso-hoson tilayamo baju' nu aha anu puso-pusok aijo'mo kameja', juba', songko', ka' mule' baju' nu aha sangga'at lantas ilumbu'akonmo i uno nu apu anu binanyela-nyelakmo aijo'.

²² Kalana palentah nu tomundo' aijo' talalomo hondo napohos sahingga apu aijo' pinopanasmo hondo totu-totu'u sahingga moaknyo nu apu aijo' nontoyo'imo to mia-mian anu nohangkat i Sadrakh, i Mesakh tiba i Abednego koko pinombauan apu aijo'.

²³ Sumo aijo' na aha totototolu' anu pinungumo dodododo aijo' ilumbu'akon i uno nu apu aijo' anu binanyela-nyelakmo aijo'.

²⁴ Monti-montiik i Tomundo' Nebukadnezar tinolokengkengmo. Ia tinuminjomo lia-lia' ka' noloboo'i to paga-pagawenyo, “Temisa' kita u'uka nompungumo aha totototolu' na mian haha aijo' ka' ilumbu'akonmo nu aha i uno nu apu aijo'?” Aha nontaami, “Memang ahi' totu'u Tuanku.”

²⁵ Tinaaman i tomundo', “Panyo kadaka' tinoangku na aha opa-opat na mian haha aijo' kinolalajangmo i totonga' nu apu aijo'? Aha madi'mo pinungu ka' madi' ahi' nongku-nongkuka? Ka' anu ko opatnyo aijo' na susumo ahi' pilogot.”

Aha totototolu' aijo' pinobebasmo ka' pinoliba'mo na pangkat nu aha

²⁶ Lantas i Nebukadnezar nongohanimo sabatan pipinombauan apu ka' noloboo'i, “i Sadrakh, i Mesakh, tiba i Abednego to posa-posaihon nu Tumpu Anu Matangkas na Kuasanyo! Posabatmo mae atia' i pinombuan apu!” Sahingga nosabatmo mae na aha.

²⁷ Iwi-iwi' na wakin i tomundo', to gubernur-gubernur, bupati ka' mule' to paga-pagawenyo sangga'at nontikubimo mae aha totototolu' na mian haha aijo' ka' nontoamo saba' aha totototolu' aijo madi' ahi kinona nu apu. Hambahan nu ubak nu aha madi' ahi' nopapu, ka' baju' nu aha madi' ahi' suele notoyo' nu apu, ka' busik nu tibuk pe'e madi' ahi' ko anu ingook hi aha.

²⁸ Lantas notataemo na i tomundo', “Opuji' na Tumpu anu nu sombah i Sadrakh, i Mesakh tiba i Abednego. Ia na nonsaimo mae malaekat-Nyo da momposalamat aha totototolu' na to posa-posaihon-Nyo anu palesaya hi Ia. Aha nolanggaimo palentah-ngku ka' lebe mongka'ima'i mate de mule' monsombah kabai mompopodaka' pilogot mau pa' iyamae, ola ahi' bailako' Tumpu nu aha.

²⁹ Kalana aijo' ku palentah da batu-batu mian i sa'angu' na bansa, tulunan nu bansa kabai basa' iyayamae anu mongalu Tumpu anu nu sombah i Sadrakh, i Mesakh, tiba i Abednego, opado-padot ka' mule' laigannyo ohobo'akon ka' opojadimo tambulan nu anu nopapumo na laigannyo aijo'. Kalana madi' ko pilogot anu moko ala mombau apaa na anu binaumo nu Tumpu aijo'.”

³⁰ Lapas aijo' i tomundo' nompoliba'mo pangkat nu aha, i Sadrakh, i Mesakh, tiba i Abednego sahingga tinimbalimo na aha to paga-pagawe anu matangkas na pangkat nu aha i propinsi Babel.