DANIEL 2 - KITAB NU TUMPU ALLA LELE MA'IMAI'

Ipion i Nebukadnezar

¹ Daagi' kinosampahuan salatan ingohua'mo na taun na i Nebukadnezar nompalentah ia nongipimo. Ipionnyo aijo' nonsaduakonmo da madi' sinanang na kinyonyoanyo sahingga ia saja'mo binikayaon.

² Kalana aijo' ilaganyomo na anu topo tahi'i, anu ko pangatahuan, to sando-sando ka' mule' to mia-mian anu ko ilimu' da mongalati'iakon ipionnyo aijo'.

³ Salatan aha tinuminjomo i ahopnyo, tomundo' aijo' notataemo, “Aku nongipimo ka' madi'mo sinanang na kinyonyoangku kalana aku mongkahanda'i da kusumbu' na alati'nyo!”

⁴ Tinaaman nu aha nu basa Aram, “Higahiakon na belento Tuanku sampe toka sidu-sidutu'! Sisik mae na ipion aijo' hi kami da otalangkan mami na alati'nyo.”

⁵ Tinaaman i tomundo', “Aku nombaumo katanduan sumo uuka; Belemiu tionyo ahi' mompoto'i mae ipion aijo' hi belengku, sumo aitu mule' alati'nyo. De belemiu madi' moko ala, belemiu opado-padotmo ka' mule' laigan nu belemiu ohobo'akonmo.

⁶ Panyo de belemiu moko ala ahi' yo belemiu ku bee'ije palasen anu toto ima-ima' ka' belemiu oholomatimo. Soba poto'i mae uuka aiya na ipionku ka' mule' alati'nyo aijo'!”

⁷ Tinaaman mule' nu aha, “De timbali da belento Tuanku mompoto'i pe'e mae ipion aijo' hi kami, lapas aijo' otalangkanje mami na alati'nyo.”

⁸ Nohongo aijo' tinaamanmo i tomundo', “Kona hondo susumo anu tinutugankumo. Belemiu ola monsolo-solong tempo' kalana osumbu' nu belemiu na aku ko kahanda',

⁹ da mohukumo belemiu iwi-iwi' tiba jalan anu pokakana de belemiu madi' moko ala mompoto'i mae ipion aijo' hi belengku. Belemiu nosangaja'mo da saja' moleko'i ka' monggule-gule mae aku, osangka nu belemiu saba' aku timbali mongabali' katantuanku, Soba poto'imo mae na ipion aijo' sahingga kusumbu' talu' belemiu moko ala ahi' montalangkan alati'nyo.”

¹⁰ Topo ilimu' haha aijo' nontaamimo, “I songko-songko' na dunia madi' ko samian pe'e na anu moko ala mompoto'i apaa na anu nu kahanda'i nu Tuanku aijo'. Ka' ma'isa toho' ko samian na tomundo' mau mosiamo na kodaka'nyo na kakuasa'annyo ka' mule' katalasanggoannyo na pagala montuntut han anu sumo aijo' hi anu topo tahi'i, hi anu kopangatahuan ka' mule' hi to mia-mian anu ko ilimu' i laigan nu tomundo'.

¹¹ Belento Tuanku talalo ahi' mongkahanda'i anu talalo susa'. Madi' ko samian pe'e na anu moko ala, beilako' ahi' to pilo-pilogot, panyo aha na madi' ahi' jojoong aiya hi kita mian.”

¹² Nohongo aijo' i tomundo' notambuha'mo hondo sahingga pinalentahnyomo da opateimo iwi-iwi' na anu toto pande-pande kiijo' mae i Babel.

¹³ Lantas palentah aijo' binebakonmo ka' iwi-iwi' na anu toto pande-pande tibamo i Daniel ka' to sanga-sangalunyo i Liomo da opateimo.

Tumpu nompoto'imo ipion aijo' tiba alati'nyo hi Daniel

¹⁴ Sahingga i Daniel nonsingkabotimo i Ariokh polaya' nu anu monjagai i tomundo' anu sinadiamo mompojalan hukuman mate aijo'. Pagalamo ahi' pinohowini i Daniel na nompokilawa hi ia,

¹⁵ kadaka' i tomundo' nombee'imo palentah anu talalo ahi' maboat aijo'. I Ariokh nompoto'imo hi Daniel apaa na anu jinadimo aijo'.

¹⁶ Lia-lia' na Daniel nangadap hi tomundo' ka' nomoita tempo' da montalangkan alati'nyo nu ipion aijo'.

¹⁷ Poitaonnyo aijo' tinalimanyomo, lantas i Daniel ninsusule'mo i laigan ka' pinoto'inyomo na iwi-iwi na kajadian aijo' hi Hananya, hi Misael tiba hi Azarya.

¹⁸ Pinokaunyomo na aha da balado'a hi Tumpu kiita i suluga da Ia ko kalibosan mae hi aha ka nompotukamo lahasia nu ipion aijo'. Tiba jalan aijo' aha madi' ohukum mate hingga-hinggat tiba anu to pande-pande sangga'at.

¹⁹ Pihi-pihi aijo' suele Tumpu nompoto'imo lahasia aijo' hi Daniel i sa'angu' na han anu tinoa. Sahingga i Daniel nompuji'mo Tumpu kiita i suluga,

²⁰ Ia notatae; “Tumpu aijo' pande hondo ka' baani, Opuji' na Ia sampe toka sidu-sidutu'!

²¹ Iamo na anu nompotataap loonu ka' wakitu, Ia na mompobelenti ka' mompojadi anu balakuasa. Lamo ia suele na anu mombee'i kapandean, tiba mule' mombee'i da mangalati'.

²² Iamo na mompotuka'lahasia anu talalo o pohowini. Lamo ia na momposumbu' apa-apaa anu jinadimo i uno nu pikat. Ia nu salingkukubi nu jingka anu taha-tahahumo.

²³ O, Tumpu anu saja' nu sombah nu mompolee'ku, Belento ku puji' ka' ku popodaka'. Kalana Belento nombee'imo mae aku kapandean bapikin tiba kahosonan. Poitaon mami tinalimamo nu Belento. Ka' mule' bau pontaami tomundo' pinotiju'mo nu Belento.”

Ipion aijo' pinoto'imo ka' tinalangkanmo i Daniel

²⁴ Lapas aijo' i Daniel nambamo hi Ariokh anu binee'anmo kalaja da mompatei anu toto pande-pande i Babel. I Daniel notataemo hi ia, “Boli opatei na anu toto pande-pande haha aijo'. Boa mae na aku mamba mangadap hi tomundo' kalana aku mompoto'imo hi tomundo' apaa na alati'nyo nu ipionnyo aijo'.”

²⁵ I Ariokh lia-lia' na nomboa i Daniel da mangadap hi Tomundo' Nebukadnezar lantas i notataemo, “Aku nohumpakmo mian nu Yehuda anu binoamo mae ka' pinojoongmo i sa'angu na tampat, samian na anu moko ala mompoto'i alati'nyo nu ipion nu belento Tuanku.”

²⁶ Sahingga notataemo na i tomundo' hi Daniel anu suele osanggohi Beltsazar, “Timbali na beleyum mompoto'i mae hi belengku ipionku ka' mule' alati'nyo?”

²⁷ Tinaaman i Daniel, “O, Tuanku, madi' ko mian anu ko ilimu' ka' mule' anu ko pangatahuan, topo tahi'i, kabai anu ko ilimu' monsumbu' mandala' na moko ala mompoto'i han aijo' hi belento Tuanku.

²⁸ Panyo kiita' i suluga daagi' ko Tumpu na anu monsumbu' mompoto'i lahasia iwi-iwi' ka' noko poto'i-Nyomo hi Belento Tuanku apaa na anu jadi saidi' mae imihi. Uuka aiya pobee'mae na aku de timbali da montalangkan ipion ka' apaa na anu tinoamo nu belento Tuanku titinoamo tempo'nyo hoyo-hoyot aijo'.

²⁹ Tempo'nyo Tuanku hau-haunyo hoyo-hoyot, Tuanku nongipimo mongkona apaa na anu jadi aiya mae i ahop. Tumpu na nompoto'imo lahasia iwi-iwi' hi belento Tuanku ka' mule' nompotoamo apaa na anu jadi saidi' mae.

³⁰ Lahasia aiya pinoto'imomae hi belengku, misa' kalana aku na lebe pande molingkudui maumo pa' ihe panyo da belento Tuanku timbali monsumbu' alati'nyo nu ipion nu belento Tuanku aijo' ka' mompangalati'i mule' isi nu kinyonyoa nu belento Tuanku.

³¹ Sumo uuka na anu tinoa nu belento Tuanku; I ahop nu belento Tuanku daagi' ko sa'angu' na patong! Patong aijo' daka' hondo ka' jongkilaban panyo ohupnyo talalo hondo okabuhuk.

³² Anu binau ubaknyo mosoni' anu madi' kogalo'nyo, saha'annyo ka' botokonnyo salaka na binau, lampeokan tiba bengonyo tambaga na binau,

³³ pa'anyo besak na binau ka' tengkenyo sambagian besak na binau ka' sambagian mule' tano' kun na binau.

³⁴ Hau-haunyo belento Tuanku montonto'i, sa'angu' na batu anu daka' hondo noluntunmo mae aita' i keles pada han madi' ko mian anu nohenggo lantas tinuda'nyomo na patong aijo' i tengkenyo anu besak na binau ka' tano' kun na binau aijo' sahingga i hansunmo.

³⁵ Tempo'nyomo aitu na patong aijo' i hansun ka' tinimbalimo tambulan nu besak, tano' kun, tambaga, salaka ka' mosoni' anu i hansunmo susumo abu' i tampat pongututan gandum de masingitmo. Tambulan aijo' lewa'mo nu lahabakon nu mombun sahingga madi'mo daagi' ko anu tinontuha'. Panyo batu anu nontuda'mae patong aijo' tinimbalimo dinaka' susumo bungkutnyo ka' nompobuke'imo songko-songko na dunia.

³⁶ Aijo'mo na ipion nu belento Tuanku, ka' uuka aiya ku talangkanmo na alati'nyo.

³⁷ Anu talasanggo belento Tuanku atina'mo na tomundo' anu molingkudui iwi-iwi' na tomundo'; belentomo Tuanku na anu talalo hondo balakuasa. Tumpu anu kiita' mae i suluga' nombee'imo mae hi belento Tuanku kalaja'an aiya, kakuasa'an, ka' kahosonan ka' mule' katalasanggoan.

³⁸ Belento Tuanku pinojadinyomo anu mongkuasai bagian nu dunia anu ko miannyo ka' mongkuasai to tomo-tomonsi' tiba binatang sangga'at. Belentomo Tuanku na ubak mosoni' i patong aijo'.

³⁹ Panyo salatan kalaja'an nu belento Tuanku i madi'anmo, tokamo mae na kalaja'an sangga'at anu madi' pokakana na ko daka'nyo susumo kalaja'an nu belento Tuanku. Lapas aijo' tokamo mule' na kalaja'an anu ko totolu'nyo anu ilambangakon nu tambaga i butong nu patong aijo', anu mongkuasai songko-songko na dunia aiya.

⁴⁰ Lapas aijo' tokamo mule' na kalaja'an anu ko opatnyo anu ko hosonnyo susumo besak. Ka' susumo besak mompohintutumo ka' mohansuni maumo pa' apaa, sumo aitu mule' na kalaja'an anu ko opatnyo aiya mompohintutu ka' mohansuni to kala-kalaja'an sangga'at aijo'.

⁴¹ Tengke tiba to kangka-kangkamnyo nu patong anu sambagian tano' kun ka' sambagian besak aijo' mongalati'i saba' imihinyo mae kalaja'an aijo' mobagi-bagimo. Kalaja'an aijo' daagi' ko kahosonannyo suele, kalana tano' kun aijo' ko galo'nyo besak.

⁴² To kangka-kangkam nu tengke anu sambagian besak na binau ka' mule' sambagian tano' kun na binau alati'nyo saba' daagi' ko bagian nu kalaja'an anu mahoson ka' daagi' mule' ko anu madi' mahoson.

⁴³ Nogalo' besak tiba tano' kun aijo' mongibalatakon suele saba' kalaja'an aijo' pagala bala usaha mompohoson kalaja'annyo tiba jalan mongosoai mogogalo'an, usaha aijo' madi' kinogunanyo susumo besak suele madi' bisa mosa'angu' tiba tano' kun.

⁴⁴ Tempo'nyo tomundo' haha aijo' mompalentah Tumpu i suluga' nompotinjomo sa'angu' na kalaja'an anu timbali totahan sampe toka sidu-sidutu' ka' anu madi' nu poko ala nu patundu' nu bansa maumo pa' iyamae. Kalaja'anmo ai-aijo' na mohansuni iwi-iwi' na kalaja'an sangga'at haha aijo'.

⁴⁵ Temisa' tinoamo nu belento Tuanku madi' kino mian nohenggo sa'angu' na batu nolingginmo mae aita i keles lantas nontuda'mo ka' mule' nompohintutumo patong besak, ka' tambaga, tano' kun, salaka tiba mosoni' aijo'? Tumpu Anu daka' na Kuasanyo nompoto'imo hi belento Tuanku apaa na anu jadi saidi mae. Ipion aijo' timbali opalesaya ka' mule' katalanganku madi' sala'.”

I Daniel nontalimamo palasen hi tomundo'

⁴⁶ Lantas tinolodadupumo na i Tomundo' Nebukadnezar hi ahop i Daniel ka' nombee'i palentah da i Daniel oholomati ka' osombahkon hi ia na koloban anu opotunu tiba palasombahan-palasombahan sangga'at.

⁴⁷ I Tomundo' notatae, “Totu'u, Daniel, Tumpu nu beleyum aijo' talalo hondo daka' na kuasanyo maumo ahi' pa' Tumpu iyamae. Ia na anu mongkuasai iwi-iwi na tomundo' ka' anu moko ala mompotalang iwi-iwi' na lahasia. Kusumbu' na han aijo' kalana beleyum noko alamo nontalangkan lahasia aiya.”

⁴⁸ Lapas aijo' i Daniel binee'annyomo pangkat anu matangkas ka' mule' binee'annyomo manjoo' na palasen anu toto ima-ima', ka' i hangkatnyomo binau gubernur nu Babel, ka' pinojadinyomo mule' kapala anu matangkas mongkapalai aha iwi-iwi' na anu lewa' mombee'i pokinde' i laigan nu tomundo'.

⁴⁹ Panyo kalana pinoitamo i Daniel sahingga i tomundo' nombee'mo kapalentahan i Propinsi Babel aijo' hi Sadrakh, hi Mesakh, hi Abednego sadang i Daniel na jinojoong ahi' i laigan nu tomundo'.