DANIEL 12 - KITAB NU TUMPU ALLA LELE MA'IMAI'

Sinaa kakiamatan

¹ Malaekat nu nompusok baju' lenan aijo' po ule' mule' notatae, “Tempo'nyo aijo' tokamo mae na malaekat anu daka' na kuasanyo i Mikhael anu monjagai bansa nu belemiu. Lapas aitu tokamo na tempo' nu kasusa'an anu madi' ko'anu pokakana salatanmo pe'e kino to bansa-bansamo, panyo iwi-iwi' na mian anu atina' hi bansa nu belemiu anu sanggonyo tinulismo i uno nu kitab nu Tumpu Allah, atina na oposalamat.

² Manjoo' na anu sinilakamo anu aijo' hi aha panyo po ule'mo opotumuu'; sambagian na molasai kantumuu'an anu sampe toka sidu-sidutu' ka' sambagian mule' na molasaimo kasansala'an ka' apa-apaa na anu okabuhuk hondo, sampe toka sidu-sidutu'.

³ To pola-polaya' anu to pande-pande jongkilabanmo susumo jingka nu langit. Ka' mule' aha anu nongajanmo manjoo' na mian da mombau apaa na anu ma'ima' tiba anu adin, majingkamo susumo to manda-mandala' sampe toka sidu-sidutu'.”

⁴ Lantas malaekat aijo' notatae mule' hi belengku, “Daniel, tutupmo na kitab atina' uuka aiya ka' pokonaimo segen da tataap tatutup sampe tokamo na tempo'nyo nu kakiamatan. Manjoo' na mian anu kahanda' monsoba monselidiki apaa na anu jinadimo uuka aiya. Panyo usaha nu aha madi' kino gunanyo.”

⁵ Lapas aitu aku nontoamo ua'aha na mo'ane. Samian tinuminjo isonibi nu kaunyo sasu aiya mae, ka' sangga'at mule' tinuminjo i kaunyo sasu aijo' mae.

⁶ Samian nompokilawamo hi anu tinuminjo lebe ohani i mata nu kaunyo, “Hipianje na lapas na kajadian-kajadian haha aijo' anu okabangangi?”

⁷ Mian sangga'at aijo' nohangkatmo limanyo ohu-ohua' no kiita' ilangit. Ihongongkumo na ia binasumpa' i uno nu sanggo nu Tumpu anu tataap sampe toka sidu-sidutu' ka' notatae, “Kajadian-kajadian haha aiya saja' sabole-bole daagi' totolu' ka' mintonga' na taun. Salatan ponsakisan mian anu palesayamo hi Tumpu lapasmo, saba' suele lapasmo ahi' na kajadian-kajadian anu okabangangi haha aijo!”

⁸ Iwi-iwi' na anu tinaloakonnyomo aijo' memang ihongongkumo panyo aku madi' mangalati'. Lantas pinokilawangkumo, “O, Tuan mosiamo ahi' de iwi-iwi' aiya lapasmo?”

⁹ Ia nontaami, “Lako'mo uuka aiya, Daniel, kalana potatae aiya tionyo ahi' opohowini ka' olahasiakon sampe toka i tempo'nyo nu kakiamatan.

¹⁰ Manjoo' na mian o'uji'mo ka' mule' opobelesi'mo ahi' totu-totu'u. Aha mian anu ma'idek na palabuatannyo madi' mangalati' ka' saja' ahi' mombau anu ma'idek. Ola ahi' aha mian anu pande na moko ala mangalati'.

¹¹ Lengkat pe'e tempo'nyo koloban anu osombahkon sansinaa-sinaa aijo' tinewa'mo ka' mule' hahan anu okabuhuk ka' mule' anu osanggohi palabuatan Ma'idek monsaduakon kahansunan aijo' lewa-lewa'mo binau, madi'mo timbali obau 1.290 na sinaa.

¹² Mohumpak kabilahian na aha anu tataap tulu-tulutan samep toka isinaa 1.335.

¹³ Beleyum, Daniel, tulu-tulutan ahi' sampe toka imihinyo mae. Beleyum tantu silaka, panyo po ule' tumuu' ka' montalimamo tambonyo na beleyum de tokamo na tempo'nyo nu kakiamatan.” 45