DANIEL 11 - KITAB NU TUMPU ALLA LELE MA'IMAI'

¹ Lamo ia na anu binee'anmo pakalaja'an nontulungi ka' nontinjohimo mae aku i taun anu momonanyo salatan i Darius mian nu Media aijo' tinimbalimo pamalentah.

² Apaa na anu pinoto'ingkumo aijo' memang totu'u.” Malaekat aijo' nontaloakon, “Totolu' na tomundo' sangga'at mompalentahmo Persia ka' lapas aijo' mule' tomundo' anu ko opatnyo anu saidi' mae lebe kaya hondo nu lingkudui na sangga'at. De kakuasa'annyo talalomo hondo daka' tiba kakaya'annyo suele daka'mo hondo ia mahangewamo tiba kalaja'an nu Yunani.

Kalaja'an nu Mesir tiba Kalaja'an nu Siria

³ Lapas aijo' tokamo mae na samian na tomundo' anu baani hondo. Ia mompalentahmo kalaja'an anu daka' hondo aijo' ka' nu suka-sukaimo.

⁴ Panyo de ia talalomo kaya kalaja'annyo mobagi-bagimo timbalimo opat na bahagian. To tomu-tomundo' anu misa' tulunan nu tomundo' mompalentahmo salaku bolosnyo ka' aha madi'mo mahoson susumo ia.

⁵ Tomundo' nu lipu' sasu salatan timbalimo mahoson panyo sala'samian na to kapa-kapala nu suludadunyo timbalimo lebe mahoson nu lingkuduimo na ia ka' mule' ia mompalentahmo kalaja'an anu mule' daka'.

⁶ Lapas mule' aijo' pa' to pia-piangkuka na taun tomundo' nu lipu' sasu salatan mombaumo kasangaja'an tiba tomundo' nu lipu' sasu utara ka' mompo osoakonmo anaknyo boune tiba tomundo' nu lipu' sasu utara aijo'. Panyo kasangaja'an aijo' madi' notuus ka' mule' boune aijo' saidi' mae opateimo sumo aijo' mule' na langkai'nyo tiba anaknyo ka' mule' to posa-posaihonnyo anu nongantanmo ia.

⁷ Lapas na aijo' madi' pin samian anu daagi' poto utusannyo mae nu boune aijo' timbalimo tomundo'. Ia montumbuhimo suludadu nu tomundo' sasu utara, montumbuhimo bentengnyo ka' mule' mompatundu'mo.

⁸ Tempo'nyo aitu ia minsusule'mo i Mesir, nu boamo na patong nu pilogot anu nu sampobali'nyo tiba to paka-pakakas mosoni', ka' salaka anu sinombahkonmo hi pilogot aijo'. To pia-piangkuka na taun na kopinnyo ia madi' mompahampateakon tomundo' nu lipu' sasu utara.

⁹ Lapas aijo' tomundo' nu lipu' sasu utara montumbuhimo lipu' sasu salatan, panyo ia pinatundu'mo mae ka' ninsusule'mo i lipu'nyo.

¹⁰ Lantas anak to momo'ane nu tomundo' sasu utara mogogau'mo da mahampatemo ka' momposa'angu'mo to sulu-suludadu manjo-manjoo'. Sala'samian anu aijo' hi aha nambamo nontumbuhi sumomo ahi' iaba'. Nontumbuhi ko pinduannyo ia nontumbuhimo benteng nu sampobali'nyo.

¹¹ Sahingga pusamo na tomundo' nu lipu' sasu sabatan ka' mambamo itampat pahampatean mongewa tomundo' nu lipu' sasu utara. Ia mompatundu'mo suludadu anu manjoo' hondo aijo' anu i uno nu pamalentahan i tomundo' nu lipu' sasu utara.

¹² Lapas aijo' ia sanangmo kalana inguntungmo na nahampate ka' kalana nonsilakaimo manjoo' hondo na sampobali' panyo ia madi' ahi' saja'mo balakuasa.

¹³ Kopinduannyo na tomundo' nu lipu' sasu utara momposa'angu' mule' suludadu anu manjoo' hondo ka' aijo'mo na lebe manjoo' nu lingkudui na anu u'utu mae momona. De tokamo itempo'nyo ia mambamo montumbuhi tiba suludadunyo anu manjoo' hondo aijo' tiba posadiaon anu sukup hondo.

¹⁴ Sahingga manjoo' hondo na mian anu motomuhukmo hi tomundo' nu lipu' sasu salatan. Ka' to pia-piangkuka na mian anu buhingison atina' hi bansa nu beleyum, Daniel, motomuhukmo suele, kalana aha nontoamo anu pinotoa. Panyo madi' ko gunanyo apa-apaa na usaha anu binau nu aha.

¹⁵ Lapas aijo' tomundo' nu lipu' sasu utara mambamo montumbuhi sa'angu' na kota' anu ko bentengnyo ka' nu patundu'mo. Suludadu nu lipu' sasu salatan madi'mo daagi' moko ala mongewa ka' to sulu-suludadu anu pinile'annyomo madi'mo daagi' suele moko ala mongewa.

¹⁶ Tomundo' nu lipu' sasu utara aijo' monsuka-sukaimo ka' madi'mo daagi' ko anu mongewa mau pe'e pa' mosiamo. Ia mule' monjojoongimo ahi' tano' anu ma'ima' ka' mongkuasaimo songko-songko.

¹⁷ Lapas aijo' tomundo' nu lipu' sasu utara momposadiamo iwi-iwi' na suludadunyo da montumbuhimo lipu' sasu salatan. Lantas ko kahanda'mo da mongkuasaimo songko-songko na kalaja'an nu sampobali'nyo, ia mombaumo kasangaja'an tiba ia da mompo osoakonmo anaknyo boune tiba tomundo' nu Mesir aijo', panyo tanga'annyo aijo' madi' ko gunanyo.

¹⁸ Lapas aijo' ia montumbuhimo to bansa-bansa anu isonibi nu ambai ka' manjoo' na anu nupatundu'mo. Panyo samian na polaya' anu lengkat mae isalipu'an na mompobelenti kalakuan lewa' mompopoambang bibinaunyomo aijo', ka' mule' mombalosakonmo kalakuan lewa-lewa' mompopo ambang aijo' hi ia.

¹⁹ Tomundo' nu lipu' sasu utara aijo' minsusule'mo i benteng-benteng nu lipu'nyo. Panyo ia ahi' opatundu'mo ka' madi'mo ko lelenyo pa' mosia na ia.

²⁰ Ia obalosakonmo nu samian na tomundo' anu mompalentah pagawenyo buhi-buhingison hondo da mambamo montage hasin opakisa da bau pontuangi kakaya'an nu kalaja'annyo. I uno nu tempo' anu madi' talalo pin tomundo' aijo' opateimo tiba jalan opohowini ka' misa' mule' ahi' kalana mahampate.”

Tomundo' nu lipu' sasu utara anu ma'idek na palabuatannyo

²¹ Malaekat aijo' notatae mule', “Tomundo' anu saidi' mae mompalentah lipu' sasu utara samian na anu madi' ko agamanyo ka' madi' ko hak timbali tomundo'. Panyo katokaannyo mae madi' osangka-sangka ka' mongagoimo pangkat salaku tomundo' mompake kapandean mongakali.

²² Iwi-iwi' na suludadu anu mongewa ia ka' mule' Imam Daka' suele nu pateimo.

²³ Ia madi'mo montapali iwi-iwi' na palajanjian anu salaje binaunyo tiba aha bansa-bansa sangga'at. Ka' ia mompaka pahosonmo maumo ia ola pamalentah nu negara anu ise'.

²⁴ Tiba akannyo ia montumbuhimo daera-daerah anu molumba' salatan mian anu jojoong ikiijo' monganggapmo au'aitu madi'mo ko anu mompoposia aha. Ia mombaumo apaa na anu ma'isa toho' binau nu mompolee'nyo. Lantas nu bagi-bagiakonmo hi aha anu monsangaja'i ia, iwi-iwi' na balang anu pinahuhuakon haha aijo' tiba kakaya'an anu ihumpaknyo mae i uno nu pahampatean. Ia mombaumo sa'angu' na kapandean da montumbuhimo tampat-tampat anu ko bentengnyo panyo kasampatannyo madi' pin.

²⁵ Lapas aijo' kalana ia baani pinosihuknyo mule' manjoo' hondo na suludadu da montumbuhimo tomundo' nu lipu' sasu salatan anu nogogaumo suele kahanda' mongewamo ia tiba suludadunyo anu mahoson ka' mule' manjoo' hondo. Panyo tomundo' nu lipu' sasu salatan madi'mo moko ala mongewa kalana ia madi'mo pinajulian nu mian anu nu palentah.

²⁶ Anu saja mompokinde'i ia tiba anu mompaha kona hondo tiba ia monsilakaimo ia. Manjoo' na to sulu-suludadunyo ihopu'anmo ingko-ingkot.

²⁷ Lapas aijo' ua-ua'aha na tomundo' aijo' sumuhangmo mongahopi sa'angu' na meja ka' mongkaanmo hingga-hinggat, panyo aha toto samian ko posi-posi niat ma'idek ka' aha mompaha bale-baleko'i. Panyo tanga'an nu aha aijo' madi' jinadi kalana misa' pe'e tempo'nyo.

²⁸ Lapas aijo' tomundo' nu lipu' sasu utara ninsusule'mo ilipu'nyo ka' nu boamo na balang anu pinahuhuakonnyomo. Ia ko tanga'anmo da mohansunimo agama anu nu toongi nu mian anu palesayamo hi Tumpu. Iwi-iwi' nu baumo lantas ia minsusule'mo i lipu'nyo montumbuhi.

²⁹ To pia-piangkuka na tempo' ia po ule' mule' montumbuhi lipu sasu salatan panyo ka ahenannyo madi'mo pokakana tiba anu u'utu mae momona.

³⁰ Kalana aha mian nu Roma tiba to kapa-kapan nu aha tokamo mae lengkat i Siprus ka' mompahampateakonmo ia sahingga ia nabuhukmo. Lantas ia minsusule'mo ka' pusamo hondo ka' bala usahamo da mohansunimo agama nu mian anu palesayamo hi Tumpu Allah. Ia montulutimo pokinde' pokinde' nu aha anu madi' palesaya i agama aijo'.

³¹ Lantas ia mompalentahmo tompukan-tompukan nu suludadu anu mohumimi'i Laigan nu Tumpu. Aha madi'mo mompobee' koloban anu sansina-sinaa osombahkon ka' mule' mongatunmo anu okaideki osa-osanggohi palabuatan anu Ma'idek ka' bisa monsaduakon kahansunan.

³² Sahingga tiba akan anu ma'idek tomundo' aijo' pagalamo monsale'i aha to mia-mian anu nompala'imo agama nu aha da mongka'oho' montulungi ia. Panyo to mia-mian anu tulu-tulutan hi Tumpu baani na mongewa ia.

³³ Mian anu toto pande-pande lewa-lewa' mongatun mian da'isan mompopandemo manjoo' na mian sahingga mangalati'mo. Panyo ola to pia-piangkuka na ko pinnyo aha to pia-piangkuka na mian anu aijo' hi aha opateimo kalana mahampate kabai kalana apu, ka' to pia-piangkuka na mian mule' ohakopmo ka' oboamo i tampat pompojoongan.

³⁴ Hau-haunyo lewa' mompatei, mian anu palesayamo hi Tumpu mohumpakmo bantuan sangkiding panyo manjoo' na mian manintuangmo hi aha pada han ola kalana molio kapentingan nu aha.

³⁵ Sambagian na to pola-polaya' anu toto pande-pande opateimo panyo aijo' salaku bau ponguji' aha mian anu palesayamo sahingga aha totu-totu'u belesi'mo. Han aijo' saja'mo jadi susumo aijo' sampe toka i sinaa kakiamatanmo, aijo'mo na tempo' anu tinantukanmo nu Tumpu.

³⁶ Tomundo' nu lipu' sasu utara mombaumo yayamo na anu nu kahanda'i nu kinyonyoanyo. Ia takabunmo sahingga nu taloakonmo tukoonyo ia na lebe daka' na kakuasa'an nulingkudui na pilogot maumo pa' iyaya mae, ka' mule' lebe daka' na kakuasa'annyo nulingkudui na Tumpu Anu Matangkas na kuasanyo. Ia timbali mombau sumo aijo' sampeje ahi Tumpu madi'mo motambuha'. Kalana apaa na anu tinantukanmo nu Tumpu tionyo pe'e ahi' jadi.

³⁷ Tomundo' aijo' saidi' mae madi' montapali pilogot maumo pa' iyaya mae anu nu sombah nu mompolee'nyo tiba suele pilogot boune anu nu sombah nu to bou-boune. Madi' nu tapali na pilogot haha aijo' kalana nu anggap na butongnyo lebe daka' na kakuasa'annyo nulingkudui na aha.

³⁸ Panyo mule' ahi' ia moholomati pilogot anu ma'isa toho' sinombah nu mompolee'nyo aijo'mo pilogot bau ponjagai benteng-benteng. Ia monsombahkon mosoni', salaka, mainan-mainan tiba palasombahan-palasombahan sangga'at anu mahan na olinyo hi pilogot anu ma'isa toho' sinombah nu mompolee'nyo.

³⁹ Ia saidi' mae mompile'ije to mia-mian anu monsombah pilogot nu mian anu i salipu'an mae da mamba montumbuhi benteng-benteng anu mahoson. Ihe na anu mongakui pilogot aijo' nu bee'i anu bau salaku poholomati ka' mule' pangkat anu matangkas ka' mule' tano' bau salaku tambonyo.

⁴⁰ De kakuasa'annyo nu tomundo' nu lipu' sasu utara ohanimo mingkot, saba' tomundo' nu lipu' sasu salatan montumbuhimo mae ia. Lantas tomundo' nu lipu' sasu utara mombalosimo aha anu nontumbuhimo mae aijo' ka' memang nu ideimo totu-totu'u. Manjoo' hondo na kareta anu bau pahampate; ajahan, tiba kapan, Nu tumbuhimo totu-totu'u susumo uee anu ingiaba'mo ka' mongkuasaimo manjoo' hondo na lipu'.

⁴¹ Ka' suele tano' anu ma'ima' nu tumbuhimo ka' mule' pulu'an nu madala na mian anu nu pateimo. Panyo to kala-kalaja'an nu Edom, Moab tiba bahagian anu talalo hondo penting i uno nu kalaja'an Amon na madi' ahi' opoposia.

⁴² De ia mongkuasaimo kalaja'an haha aijo' kalaja'an suele nu Mesir madi' ka' madi' nu kuasaimo ahi'.

⁴³ Nu pahuhuakonmo na halata' nu Mesir sumo mosoni', salaka, tiba halata' sangga'at anu mahan na olinyo. Ia saidi' mae nu bantumo nu aha mian nu Libia ka' mule' mian nu aha Sudan.

⁴⁴ Lantas lele anu lengkat mae sasu kabete'an ka' mule' sasu utara mompotolokengkengmo sahingga nu ideimo totu-totu'u na mahampate ka' mompateimo manjoo' hondo na mian.

⁴⁵ Ka' mule' ia mombaumo kemah nu kalaja'annyo i olot nu ambai tiba bungkutnyo tampat nu Laigan nu Tumpu. Panyo lapas aijo' silakamo ka' madi' ko anu salasamian pe'e na nontulungi ia.”