AYUB 9 - KITAB NU TUMPU ALLA LELE MA'IMAI'

Ayub

^1-2 Panyo tinaaman i Ayub, “Memang, ku sumbu' potatae nu beleyum aijo' madi' sala'. Panyo, te toho' mule' manusia mahampalakala mongewa Tumpu Allah ka' mompokala Ia?

³ Samadala na han anu opokilawa nu Tumpu Allah, mau pe'e ola sa'angu' madi' nu poko ala nu taami nu manusia.

⁴ Tumpu Allah aijo' talalo hondo pande na bapikin ka' balakuasa hondo, ihe na moko ala mongahopi mongewa Ia?

⁵ Tumpu Allah molalin bungkutnyo madi' nusumbu-sumbu' nu mian, latnas nubali-balikakonmo kalana ia motambuha'mo ka' talalomo hondo pusa.

⁶ Tumpu Allah mompotimbali lulu' sahingga dunia mokohenggo, ka' ohi' anu montungkon dunia gayu'anmo.

⁷ Tumpu Allah timbali montewa' batu nu sinaa bete' daagi' subu, ka' madi' mompobee' to manda-mandala' majingka pihi.

⁸ Binokanyo nalanga aita' madi' ko anu nontulungi; pinahampeja'akon-Nyo na hiku nu molokoimbu.

⁹ Pinaha tompu-tompukakon-Nyomo na mandala' sasu salatan aita' i langit, ka' mule' mandala' anu susumo Duangan, mandala' anu osa-osanggohi mian Totolu' ka' mandala' anu osa-osanggohi mian da'isan.

¹⁰ Madi' opoko ala osumbu'to na kalaja-Nyo iwi-iwi', madi' opoko ala olekengto na anu okabangangi bibinau-Nyomo.

¹¹ Ia notulu i ahopku, panyo madi' tinoangku; Ia notulu i sohipi'ku, panyo madi nanasa hi belengku.

¹² De ia na mongagoi, ihe na baani montewa' Ia, kabai baani mompokilawa hi Ia, “E, apaa na Nu bau?”

¹³ Tumpu Allah madi' mongintim pusanyo ka' ka'idekan nu kinyonyoanyo; anu lewa' montulungi i Rahab tinumpu nu ambai suele mohongo-hongo palentahnyo.

¹⁴ Jadi, mosiamo ahi'na aku monggagakon Ia? Pa' potataemo apaa na bau pontaamingku Ia?

¹⁵ Maumo ahi' aku madi' kosala'nyo, aku madi' moko ala mombau apa-apaa, ola ahi' mongkakaase da okalibosi nu Tumpu Allah anu momputusi aku?

¹⁶ De bisuannyo Nu taamimo salatan aku motatae, aku bata-bata, pa' totu'u ahi' Ia sanang na mohongo potataengku?

¹⁷ Pinohintutunyomo na aku i uno nu antong anu makansang hondo, ka' nompaka tuangi kasansala'anku maumo madi' ko sababnyo.

¹⁸ Madi'mo pinobee'-Nyo na aku ningkinyonyoa maumo ola sangkinihap, ka' mule' pinaka tuangan-Nyomo na aku nu kasansala'an anu talalomo hondo.

¹⁹ Pa' ku ewamo o da mahanjagunmo tiba Ia? Panyo soba toa, talalo ahi' Ia mahoson! De bisuannyo Ia ku tuntut na kasala'an-Nyo, ihe na baani molaga Ia da mamba hi mian kopian?

²⁰ Aku tulu-tulutan hondo ka' madi' nombau dosa', panyo nganga'ku notataemo madi' ahi' sumo aijo'; batu-batu potatae anu nu anga'akonmo nu biwingku aijo sumomo mompisala'i butongku.

^21-22 Aku madi' sala' panyo madi' ku pajuli. Aku na'osamo na tinumuu'. Hi belengku madi'mo ko anu penting, anu kosala'nyo ka' anu madi' kosala'nyo pokakanamo na uki'nyo: Nupatei nu Tumpu ohu-ohua' aijo'.

²³ De mian anu madi' kosala'nyo saintotolo silakamo, Tumpu Allah ola kumojo.

²⁴ Dunia aiya binee'mo nu Tumpu Allah hi mian anu palaganta, ka' to mia-mian kopian pinopahanyomo iwi-iwi'. Aijo' iwi-iwi' Tumpu Allah na nombau, de misa' Ia, yo ihemo?

²⁵ Kantumuu'anku sansina-sinaa tomboliu malia' hondo, ka' madi'mo tinoa-toa, madi' daagi' nongoa'i kasanangan.

²⁶ Susumo duangan anu malolo' hondo, kantumuu'anku ola saimpotulu, sumo kolia' nu bonyia' ningkanabu'mo nokaiyong monsabutmo anu nu kaan.

^27-28 De aku tolomoingmo ka' kumojomo lame-lame', de ku soba da okolilimimo na kasansalanku, saba' kasusa'an nu kinyonyoangku po'ule' mule' ahi' mololoi' mae aku; kalana ku sumbu', Tumpu Allah tataap momposala' aku.

²⁹ Jadi, de sinumo aijo'mo, daagi' ku posia?

³⁰ Madi' ko sabung anu moko ala mompobelesi' dosa'ku!

³¹ Tinanomakonmo nu Tumpu Allah na aku i hensek anu madi' belesi', sahingga baju'ku suele nontaloakonmo tukoonyo aku nahenyumo.

³² De bisuannyo Tumpu Allah aijo' manusia, ku taamimo na Ia; lantas kami mangadapmo hi mian kopian da o'ulusmo ka' madi'mo lewa' painggaga.

³³ Panyo hi kami ua'aha aiya madi' ko mian kopian anu timbali mongulus ua kami aiya.

³⁴ O'amalakon da Tumpu Allah madi'mo mohukum aku ka' mompimpaliakonmo mae tambuha'nyo anu taha-tahahumo aiya hi belengku!

³⁵ Aku madi' mongkabuhuk Ia, ka' mule' apaa na anu ku taeakon uuka aiya, kalana ku sumbu' na kinyonyoangku.