AYUB 8 - KITAB NU TUMPU ALLA LELE MA'IMAI'

Bildad

^1-2 Lantas notataemo na i Bildad, “Daagi' hipian na beleyum motatae sumo itina'? Potatae nu beleyum guhan sumomo mombun.

³ Tumpu Allah madi' toho' monggeo-geo'akon ka'adinan; madi' toho' mahungku' na montinjohakon kahondoan.

⁴ Ihe na monsumbu' ugaat to ana-anak nu beleyum binaladosa'mo hi ia, jadi konanyomo ahi' na aha nohumpak hukuman hi Ia.

⁵ Panyo de hi ia na pinsondo'an nu beleyum mongkakaase da ikalibosi ka'momoita ampun.

⁶ De kinyonyoa nu beleyum totu-totu'u hodi', ka' madi' kopisala'nyo, Tumpu Allah sampa montulungi beleyum; ka' salaku balosnyo, auwan nu beleyum mompo'ule' ma'ima'.

⁷ Kakaya'an nu beleyum anu iningkotmo aijo' madi' ko sanggonyo de opokakanakon tiba apaa na anu nu humpakje mule'.

⁸ Mian anu toto pande-pande na bapikin naipuan mae tionyo ahi' saja' o'inau' ka'opotutugakon nu beleyum apaa na anu ingoa'anmo nu to mompo-mompolee'to.

⁹ Kantumuu'anto madi' pin, madi' osumbu-sumbu'to; sansina-sinaa kita tumuu' ola susumo lolung.

¹⁰ Potombihing na potatae nu mian anu toto pande-pande na bapikin naipuan mae, aha mompokinde'i sumo uuka hi beleyum,

¹¹ ‘Ola i tampat anu ko ueenyo na kantumuu'an nu biho'; pondan ola ohumpak i tano' anu hensekon.

¹² De ueenyo mo'otimo, biho' aijo' mateekmo, sahanyo hemput sangga'at na madi' sampa manggas. Padahan daagi' molunou, ka' misa' pe'e tempo'nyo, ia kinolong ka' ingala na hasinnyo.

¹³ Sumo aijo'mo na mian anu madi' palesaya hi Tumpu. Tumpu Allah nu kolilimimo sahingga madi'mo ko anu nu pitaha-taha'imani.

¹⁴ Sahamba na banang anu moninis baumo kataha'imanannyo; peta nu loa' timbalimo nu palesaya.

¹⁵ Te mahoson na loa'nyo aijo' de bau paninsehaan? Te mahoson na banangnyo aijo', de bau pintoongan?’

¹⁶ Susumo padang tuu'an na tumuu', mahoson na mian anu madi' palesaya hi Tumpu; de nu timpa'imo nu singit, ia tumuu' ka' molumba'mo ka' nusongkohimo na tampat kinatumuu'annyo aijo'.

¹⁷ Bakatnyo mongkalaputimo batu anu kiijo' i tano'; mongkalekodi mahoson hondo, ia madi' dengke na mokohenggo.

¹⁸ Panyo, soba gaut uuka aiya na padang aijo', saba' sumomo ahi' ia madi' tinumuu' i kiijo'.

¹⁹ Sumo aitumo, na kasanangan nu mian anu kinyonyoanyo ma'idek olamo sumo aijo'; mian sangga'at na toka ka' mombolosakon ia.

²⁰ Panyo Tumpu Allah madi' toho' mompojohok mian anu tulu-tulutan, ka' madi' toho' suele ia montulungi mian anu uwesan.

²¹ Nganga' nu beleyum nubaumo da kumojo, biwi nu beleyum lewa'mo molo'ais kalana lame'mo.

²² Anu mongka'ideki beleyum ma'ambangmo, ka' nu oa'i madi'mo ko angga'nyo, ka' laigan nu mian anu uwesan o'ideimo sahingga madi'mo ko buyo'nyo.”