AYUB 6 - KITAB NU TUMPU ALLA LELE MA'IMAI'

Ayub

^1-2 Lantas tinaamanmo i Ayub, “De kasusa'an nu kinyonyoangku anu taha-tahahumo aiya otimbang na koboatnyo, tantu lebe maboat molingkuduimo bone' i ambai anu ewa hondo.

³ Mokonyo aitu, bolimo okatalanggangakon de potataengku madi' talalo opotutugakon ka' mule' talalo ko sia-sia'.

⁴ Pana' anu pinana'akon mae nu Anu Daka' hondo na kuasanyo nolampasmo butongku; bisa'nyo nonsongkohimo butongku. Tumpu Allah talalo ahi' okabuhuk, ka' nontumbuhimo mae aku susumo gombuan nu mian anu mongewamo mae.

⁵ Keledai sanangmo na nu oa'i de opo'ototimo londik nu hemput, sumo aitum mule' na sapi' de obee'imo anu o otot.

⁶ Panyo de anu o kaan matawas, ihe na mongka'ima'i? Pute'nyo nu nggalau' te ko nyamitnyo mule'?

⁷ Madi' sanang na aku mongkanyang; bubun na ku oa'i de o kaan.

⁸ Kadaka' Tumpu Allah madi' sanang na mohongo do'angku? Kadaka' madi' mae nu hongo na anu ku poita?

⁹ De timbali Tumpu Allah pahantutukakonmo mae na aku da mahutemo. De timbali da ia mompateimo mae aku!

¹⁰ Hi belengku han anu susumo aijo' timbalimo salaku bau pomposanang kinyonyoa; ka' mule' aku ola mompaka pinsesengko' maumo aku i uno nu kasansala'an. Sinin na palentah nu Tumpu Allah Anu Talalo hondo susi', tinulutankumo totu-totu'u ka' saja'mo binaungku.

¹¹ Apaamo na binau kahosonanku sahingga aku daagi' aiya? Apaa na anu ku taha'imani aiya mae i ahop, sahingga aku daagi' mongkahanda'i tumuu' pin?

¹² Te butongku aiya mahoson sumo batu? Kabai tambaga na binau butongku aiya?

¹³ Ningkotmo na kahosonanku molio anu montulungi; hi belengku madi'mo ko anu montulungi.

¹⁴ I uno nu mongoa'i sansala susumo aiya ku taha'imani da toka mae na sangalu anu mongkanonongi. Pa' aku daagi' sabole-bole tulu-tulutan kabai madi'mo mohongo-hongo Anu Daka' na kuasanyo.

¹⁵ Panyo belemiu to sanga-sangalungku, madi'mo opalesaya ka' otaha'imani. Belemiu sumomo kaunyo anu no'otimo na ueenyo, de ujan madi'mo toho' tudun mae.

¹⁶ Belemiu sumomo kaunyo anu tinumendamo ka' madi' nokokembong, kalana kinulubanmo nu eis ka' uee anu binelengmo.

¹⁷ De tempo'mo nu posinaa, malia' hondo, na eis aijo' madi'mo ko anu otoa. Lananyo nu kaunyo moti'imo hondo, madi'mo ko ueenyo ka' timbalimo i nanggasan.

¹⁸ To mia-mian anu lumambanan aha monsake'i unta tinalasmo kalana molio uee; aha lewa'mo namba noyaya ka' sinilakamo i tampat anu me saja' bone' na tano'nyo.

¹⁹ To mia-mian anu lumambanan aha monsake'i unta lengkat mae i Syeba ka' lengkat mae i Tema molio uee aijo' ka' mongima-imani da mohumpak.

²⁰ Panyo anu ingima-imanan nu aha pinalasuma i biwi nu kaunyo anu madi' ko ueenyo.

²¹ Sumomo kaunyo aijo' na belemiu, to sanga-sangalungku; belemiu tinolosule'mo ka' nabuhukmo na montoa kasansala'anku.

²² Kadaka! Te aku toho'mo nomoita apa-apaa hi belemiu? Kabai nompokaumo belemiu da otamboi na mian mombee'i mae anu ku palalui?

²³ Pa' aku nomoita da oposalamat ka' obayan da boli aku nupatei nu mian anu mongka'ideki aku ka' anu madi' ko kalibosannyo?

²⁴ Jadi, pokinde'i mae na aku, poto'i mae na kasala'anku! Aku momohokotmo ka' mompotombihingmo potatae nu belemiu.

²⁵ Potatae anu sahodi-hodi'nyo mompolumu hondo kinyonyoa, panyo potatae belemiu anu madi' ko kaliangannyo madi' ko alati'nyo!

²⁶ Iwi-iwi' na anu tinaeakonkumo o'anggap miu ola sumo mombuun; madi' ko gunanyo na belemiu montaami aku anu madi'mo ko anu opitaha-taha'imani.

²⁷ Ka' mule' anak anu madi'mo ko tuumanyo ka' tinanyo, obuangakonmo nu belemiu onde na kantumuu'an nu aha, sangalu nu belemiu anu mompahakona hondo belemiu, o'akali nu belemiu da timbali kaya na belemiu.

²⁸ Soba, hongo ima-ima' na aku; te toho' mule' aku aiya momaleko'i belemiu?

²⁹ Boli mombau apa-apaa madi' adin, sampamo ahi' sinsumbu'! Boli mae mongalu aku, aku na totu-totu'u ahi' madi' ko kasala'an.

³⁰ Kabai o, osangka nu belemiu aku aiya baleko', madi' moko ala mombedakon anu ma'ima' ka' anu madi' ma'ima'?