Biblia Todo Logo
Bìoball air-loidhne

- Sanasan -

AYUB 40 - KITAB NU TUMPU ALLA LELE MA'IMAI'

1-2 O Ayub, nu ewa nu beleyum na aku, Tumpu Allah Anu Daka' na kuasanyo; mongka'oho' na beleyum mahungku' kabai mongka'oho' na beleyum monggagakon?”


Ayub

3-4 Jadi tinaamanmo i Ayub na Tumpu, “Aku motatae aiya sumomo mian anu ponga', O Tumpu, Apaamo na bau pontaamingku? Madi'mo daagi' ko anu kahanda' ku taloakon.

5 Talalomo nanjoo' na tinutuhakonku.”

6 Lantas, i uno nu antong anu daka' hondo Tumpu po'ule' mule' notatae hi Ayub.


Tumpu

7 Lantas pinoto'imo nu Tumpu hi Ayub, “Ahopi mae na aku de beleyum mo'ane, ka' taami mae na anu Ku pokilawa aiya iwi-iwi'.

8 Pa' totu'u madi' nutalima nu beleyum na ka'adilan-Ku, ka' mompototu'u posi butong nu beleyum ka' mompisala'i mae aku?

9 Pa' totu'u beleyum mahoson sumo aku? Nupoko ala nu beleyum na motatae sumo gohung pokakana sumo potataengku?

10 Obunga-bungai na butong nu beleyum nu han anu mompotalasanggo ka' han anu mompopodaka', pake pa' apaa na anu timbali da opuji' ka' da kinyonyoa timbali mian anu ma'ima'.

11 Jonohi na aha anu saja' mohangka-hangkat butongnyo; lubatakonmo mae na pusa nu beleyum ka' poki pomohokotmo na aha.

12 Yo, soba jonohi na aha mian anu saja' buulon, hungku'imo na ia! Pateimo na mian anu ma'idek na kinyonyoa kiijo' i kajojoongannyo.

13 Lamunmo na aha iwi-iwi' i uno nu abu'; pojoongmo na aha i dunia nu mian anu sinilakamo.

14 Sahingga beleyum Ku puji'mo kalana beleyum noko alamo nohungku'i ola kalana posi kahosonan nu beleyum.

15 Soba toa hondo-hondo na i Behemot, binatang anu daka' hondo aijo'; sumomo beleyum, ia suele Aku na nompotimbali. Sinin na hemput tinimbalimo ototonnyo susumo sapi'.

16 Panyo soba tonto'i ima-ima' na kahosonan anu aijo' i butongnyo ka' mule' kahosonan anu aijo' i uatnyo iwi-iwi'.

17 Nu potido na ikunyo sumomo kau' aras, uat toto hoso-hoson i pa'anyo mahoson ka' mokut.

18 Iwi-iwi' na bukunyo mahoson sumomo tambaga, tengkenyo suele mahoson sumomo batang besak anu ko aja'nyo.

19 Anu pinotimbaling-Kumo ko ko nyawanyo, iwi-iwi' iamo na anu talalo hondo okabangangi; ola anu nompotimbalimo ia na moko ala mohungku'i ia!

20 I tampat-tampat anu ko bungkutnyo lewa' pahaikan nu binatang anu ma'ela', kiijo' ko hemput anu tinumuu'mo bau ototon nu aha.

21 Ia lumukut i patu nu kuhat anu ko hi'nyo, i olot nu biho' ka' ko tampalangnyo i kiijo'mo na pinaninsulukannyo.

22 Kuhat anu ko hi'nyo na mohohungi ia nu hohungnyo. Kau' gandarusa i sohipi' nu uee na pingkongannyo.

23 Ia madi' mabuhuk maumo Kaunyo nu Yordan mabohos na soloknyo ia tataap sabaan maumo uee monsambuangimo ohupnyo.

24 Ihe na baani mompopaha matanyo, lantas mohakopmo ia, otado' i sumbangnyo?

Lean sinn:



Sanasan