AYUB 38 - KITAB NU TUMPU ALLA LELE MA'IMAI'

Tinaamanmo nu Tumpu Allah na i Ayub

¹ Lapas aijo' notataemo na Tumpu, potataenyo nolengkat mae aijo' i uno nu antong anu daka' hondo hi Ayub sumo uuka:

² “Ihe na beleyum, sahingga baani mae mombata-batai kapandeanku bapikin kalana potatae nu beleyum anu talalo ahi' potun ka' madi' kopatu-patunyo atina'?

³ Uuka aiya, ahopi mae na aku de beleyum mo'ane, ka' soba taami mae na anu ku pokilawa aiya.

⁴ Pa' kinobeleyumo tempo'nyo Aku nompotimbali dunia? De totu'u manjoo' na anu nusumbu' nu beleyum, soba poto'i mae!

⁵ Ihe na nontantukan ko ewanyo nu dunia? Ihe na nombihakon kahohon anu binau pinombobati? Pa' nusumbu' na bau pontaami mae?

⁶ Mosia na ohi' bau pinontungkon dunia da nahoson na tinumin jo? Ihe na nompotimpas hoso-hoson batu anu i pasu'nyo nu dunia da nahoson,

⁷ tempo'nyo to manda-mandala' daagi' subu lewa' nanyanyi hingga-hinggat ka' to mala-malaekat i suluga' ilame'mo na nontaligalai.

⁸ Ihe na noko alamo nontumban ambai salatan lengkat mae i kompong nu tano' nosawe'mo mae na ueenyo?

⁹ Akumo na nontindungi ambai nu kundom, ka' nolupi' nu pintung.

¹⁰ Akumo na nontantukan potempasan nu ambai ka' sabatannyo sinupatan-Kumo da boli mosabat.

¹¹ Aku notataemo hi ia, ‘Aiyamo na potempasannyo. Boli nu liu-liu! Ola toka i aiya na katokaan nu bokonum iwi-iwi' anu toto hoso-hoson belentimo.’

¹² O Ayub, pa' toho'mo na beleyum mau ola minsan, nompokau da toka mae na sinaa ohani mopatas?

¹³ Pa' toho'mo na beleyum nompokau sinaa nontoongi dunia ka' nongkobahakon mian anu ma'idek na kinyonyoanyo lengkat mae kiijo' i tampat paninsulukan nu aha?

¹⁴ Jingka nu sinaa nompotoamo nasa-nasa bungkutnyo ka' bangka'nyo sumomo tano' ponto' anu cinapmo ka' susumo tapi'an nu sa'angu' na baju' juba'.

¹⁵ Jingka nu sinaa talalomo najingka hi mian anu madi' palesaya Tumpu, ka' montewa' aha da bolimo panggaga.

¹⁶ Pa' toho'mo na beleyum nintatau' nokaiyong i bulakan nu ambai, anu maleeng hondo kaiyong mae i lananyo? Pa' toho'mo beleyum kinolalajang i latasnyo nu ndalangon anu talalo hondo ewa?

¹⁷ Pa' toho'mo mian nompotoa hi beleyum sabatan daka' i ahop nu dunia nu mian anu sinilakamo anu pikat hondo?

¹⁸ Pa' timbali na beleyum mongkila-kila ko ewanyo nu dunia? Soba taami mae de nusumbu' nu beleyum.

¹⁹ Pa' nusumbu' nu beleyum iyamae na pinolengkat nu jingka, ka' iyamae na sabenannyo kalubatan nu pintung?

²⁰ Pa' nupoko ala nu beleyum na montantukan potempasan nu pintung ka' jingka? kabai monsai aha de aha tokamo?

²¹ Tantu nupoko ala nu beleyum, kalana beleyum i langkai'mo, ka' salatanmo pe'e dunia aiya pinotimbali, beleyum memang daagi'mo!

²² Pa' toho'mo beleyum namba nontoa gudang-Ku iwi-iwi' tampat nu eis ka' ujan batu,

²³ anu Ku po'una' ponjagai de tokamo na kasusa'an, de mahampatemo ka' de sinaanyomo nu pahampatean?

²⁴ Pa' nusumbu' nu beleyum na tampat nu batu nu sinaa jojoong? kabai lengkat mae iya na pinolengkatan nu mombun sasu kabete'an?

²⁵ Ihe na nongkekeimo got bau po'ilian nu ujan anu talalo hondo mabohos, ka' nombee'i jalan bau potuluan nu gohung tiba kilat?

²⁶ Ihe na nontudunakonmo ujan i tampat anu talalo hondo ewa na tano', ka' hi tano' anu madi' ko mian anu monjojoongi?

²⁷ Ihe na lewa' mondudu'i tano' aiya anu noti'imo ka' mateek sahingga hemput ninsumpemo iwi-iwi'?

²⁸ Pa' ujan ko tuumanyo? Ihe na tuumanyo nu dondu'ok?

²⁹ Pa' eis ko tinanyo? Ihe na nompohampe dondu'ok anu tinobengmo?

³⁰ Ihe na nongabali'mo uee timbali batu, ka' nompotimbalimo ambai da binelengmo?

³¹ Pa' opoko ala na mandala' Kartika anu pinaha segotanmo oposa'angu'mo nu beleyum na monsegoti? kabai anu pinompungu mandala Belantik nubukaimo nu beleyum?

³² Pa' opoko ala nutaka' nu beleyum na mandala', haha aijo' de tokamo mae na lonunyo, ka' mandala' Biduk anu daka' ka'anu ise', nupoko ala nu beleyum na montantukan kajalanannyo?

³³ Pa' nusumbu' nu beleyum na atulan iwi-iwi' nu langit? ka' pa' nupoko ala nu beleyum na opojalan i dunia aiya?

³⁴ Pa' nupoko ala nu beleyum na molobo'akon palentah mokiita' i kundom ka' mompokau ia mongiaba'i mae beleyum nu ujan?

³⁵ Ka' de beleyum mompokau gohung ka' kilat haha aijo' moto-mototaamanmo, pa' aha toka ahi' ka' motatae, “Ii' kita Tuan!”?

³⁶ Hi he na pinonsumbu'an nu tomonsi' ibis, Kaunyo nu Nil mosawe'mo? Ihe na nompoto'i hi laki nu manuk tukoonyo ujan tudunmo?

³⁷ Ihe na anu pande hondo na bapikin moko ala mombilang kundom ka' mombalikakon da tudun na ujan,

³⁸ ujan na anu mompobelengmo abu' ka' tinimbalimo toto sangkompon, ka' tano' nompaha kampi-kampitmo?

³⁹ Pa' nupoko ala nu beleyum na mombebasiakon anu bau pompakan sinin na singa ka' bau pongkobosu kompong nu to ana-anaknyo,

⁴⁰ de aha maninsulukmo i uno nu liang kabai manilukutmo i petanyo?

⁴¹ Ihe na montulungi papa' anu no'ohopmo ka' nahalahapanmo mokiijo' mae ka' mo'uuka mae molio anu nutoluk? Ihe mule' na montulungi de to soma-soma'nyo momoita mae hi Belengku anu otoluk?